Pagpangandam og Dapit alang sa Ginoo

Ni Bishop Gérald Caussé

Presiding Bishop

Matag higayon nga madungog nako ang istorya bahin sa pagkatawo ug sa pangalagad sa Manluluwas dinhi sa yuta, maghunahuna ko sa atong personal nga responsibilidad sa pag-andam sa maabi-abihong dapit alang Kaniya alang sa adlaw sa Iyang pagbalik.

Sa miaging tuig sa wala pa ang Pasko, mitambong ko og panihapon nga gihatag agig pasidungog sa usa ka taas og ranggo nga opisyal nga French nga dili miyembro sa Simbahan. Ang panihapon gipahigayon didto sa Joseph Smith Memorial Building sa Siyudad sa Salt Lake, Utah.

Sa wala pa manglingkod aron sa among pagpangaon, gidala namo ang among bisita ngadto sa obserbahanan nga bintana sa ika-10 nga andana, nga nagtanyag sa mga bisita og nindot nga talan-awon sa Temple Square. Ang talan-awon labihan ka talagsaon, nga ang Templo sa Salt Lake nagbarug taliwala sa dili maihap nga nagkidlap-kidlap nga mga suga. Nagbarug mi didto og pipila ka minutos, nga hapit walay masulti.

Sa among pagbalik sa lawak nga kan-anan, nangutana ang opisyal og wala damha nga pangutana: “Motuo ba mo og katapusan sa kalibutan?” Miresulta kini sa usa ka makapadasig nga panaghisgutan bahin sa Ikaduhang Pag-anhi sa Ginoo ug sa kaimportante nga kitang tanan maandam sa pagdawat Kaniya sa adlaw sa Iyang pagbalik.

Samtang naghunahuna ko bahin sa templo nga bag-o lang namong gidayeg, usa ka talagsaong butang ang misantup sa akong hunahuna: “Sa Iyang pagbalik, si Jesus sa katapusan duna nay usa ka matahum nga dapit nga kapuy-an!”

Nasulat diha sa Giya ngadto sa mga Kasulatan nga ang templo “sa tinuod ang balay sa Ginoo.”¹ Sa ato pa, dili lamang kini usa ka simbolikanhong dapit. Ang mga templo sa atong dispensasyon giandam ug gipahinungod nga mga balay diin mahimong sa pisikal nga paagi Siya moabut. Ang Ginoo miingon nga ang Iyang Simbahan kinahanglang maestablisar aron “nga ang akong mga katawhan sa pakigsaad pagapundukon ngadto sa usa niana nga adlaw nga Ako moabut diha sa akong templo” (D&P 42:36; emphasis gidugang).

Pagkadakong kalainan sa mapaubsanong sinugdanan sa Manluluwas diha sa mortalidad. Siya, ang Hari sa mga hari ug ang Ginoo sa mga ginoo, natawo sa usa ka yano nga kuwadra ug gipahigda sa pasungan, “kay wala na may luna … sa balay nga abutanan” (Lucas 2:7). Atol sa sayong bahin sa Iyang pagkabata, wala natagamtami kanunay ni Jesus ang kahamugaway sa usa ka permanente nga panimalay, sama sa dihang ang Iyang pamilya milayas paingon sa Ehipto aron moiskapo sa kabangis sa usa ka manlulupig (tan-awa sa Mateo 2:13–14).

Wala kita masayud sa mga detalye bahin sa panahon sa pag-istar sa Iyang pamilya didto sa Ehipto, apan malagmit nga Siya ug ang Iyang mga ginikanan nagpuyo og grabe nga kinabuhi sa mga namakwit—usa ka kinabuhi nga ikatandi nianang daghang migrante sa atong panahon nga miikyas sa mga dapit sa panggubatan ug sibil nga kabangian sa Africa ug sa Middle East.

Bisan atol sa Iyang hamtong nga kinabuhi, gipasabut ni Jesus nga Siya walay permanente nga panimalay. Usa ka adlaw usa ka tawo ang miduol Kaniya ug miingon, “Ginoo, mosunod ako kanimo bisan asa ikaw moadto.” Mitubag ang Manluluwas, “Ang mga milo adunay kalubloban, ug ang mga langgam sa kalangitan adunay kabatugan; apan ang Anak sa Tawo walay dapit nga kapahulayan sa iyang ulo” (Lucas 9:57, 58).

Mga kaigsoonan, sa matag higayon nga madungog nako ang istorya bahin sa pagkatawo ug sa pangalagad sa Manluluwas dinhi sa yuta, maghunahuna ko sa atong personal nga responsibilidad sa pag-andam sa maabi-abihong dapit alang Kaniya alang sa adlaw sa Iyang pagbalik. Unsa ang atong mabuhat?

Adto sa Templo

Una, mangandam kita sa pagdawat Kaniya diha sa Iyang kaugalingong panimalay—ang templo. Kinsa man kanato ang wala mangandoy nga makabisita sa mga dapit diin natawo, nagpuyo ang Manluluwas, ug mipahigayon sa Iyang pangalagad dinhi sa yuta? Daghan, uban sa dakong sakripisyo, mibiyahe ngadto sa Balaan nga Yuta. Apan unsa kini ka importante nga mobisita kita sa mga dapit kon asa mahimong mobalik Siya sa usa ka adlaw. Usa sa labing maayo nga mga paagi nga kita, isip Iyang mga disipulo, makaandam alang sa Iyang Ikaduhang Pag-anhi mao ang kanunay nga pag-adto sa Iyang balaan nga balay ug sa pagbugkos sa atong kaugalingon ngadto kaniya pinaagi sa sagradong mga pakigsaad.

Andama ang Inyong Panimalay

Ikaduha, makahimo kita sa atong mga panimalay nga mga dapit diin ang Ginoo ganahang mopuyo. Diha sa mga kasulatan, mabasa nato ang daghang mga istorya bahin sa buotan nga mga tawo kinsa miabi-abi ug midawat sa Manluluwas diha sa ilang mga panimalay. Busa atong pangutan-on ang atong kaugalingon niining mga pangutana: Madawat ba sa Ginoo ang akong panimalay? Luwas ba kini, malinawon, ug puno sa Espiritu nga dapit diin mobati Siya nga komportable? Dili kinahanglan nga ang atong mga panimalay dako o maluho. Ang yano nga kapuy-an, nga nakasentro sa ebanghelyo ug puno sa maamumahong pamilya ug mga higala, makapalipay Kaniya.

Punduka ang mga Pinili

Ikatulo, makatabang kita sa pagpundok sa Iyang mga pinili gikan sa tibuok kalibutan—bisan kon nagpasabut kana nga mobiya sa atong mga panimalay sulod sa usa ka panahon aron motabang sa pagtukod sa Iyang gingharian dinhi sa yuta. Ang kasaysayan sa katawhan sa Dios usa ka kasaysayan sa mga Santos nga kanunayng andam ug mosugot nga moadto kon asa gusto sa Ginoo nga sila moadto. Naghunahuna ko sa mga propeta sa karaan, sama nila ni Abraham, Isaac, Jacob, Jose, Moises, Lehi, ug daghan pa. Naghunahuna ko sa mga Apostoles sa Ginoo sa tunga-tunga sa kapanahunan kinsa walay hunong nga mipakatap sa ebanghelyo sa tibuok Mediteranea.

Ang mga propeta ug mga apostoles sa ulahing mga adlaw, kauban sa liboan ka mga misyonaryo, midala ug padayon nga midala sa mensahe ni Kristo ngadto sa tanang dapit sa kalibutan. Andam sila nga mobiya sa kaharuhay sa ilang mga panimalay aron mohalad sa ilang serbisyo diha sa ubasan sa Ginoo.

Pagtabang Niadtong Nanginahanglan

Sa katapusan, usa ka talagsaong paagi sa pag-andam og dapit alang sa Ginoo mao ang pagtabang sa atong mga silingan nga walay panimalay. Ang unang mga adlaw sa Pagpahiuli naglakip sa mga higayon sa dihang ang mga Santos walay kapuy-an. Sa ilang pagpaningkamot alang sa Zion, ang pagkawalay pailub ug kadautan sa ilang mga kaaway sa kasagaran mipugos kanila sa pagbiya sa ilang mga panimalay.

Si Presidente Brigham Young (1801–77) migamit niining makapatandog nga mga pulong sa paghulagway sa ilang kalisud: “Kanunay kaming gipapahawa gikan sa among malinawong mga panimalay, ug ang among kababayen-an ug mga kabataan napugos sa pagpuyo sa kasagbutan, sa kalasangan, sa kadalanan, ug sa mga tolda, sa tunga-tunga sa labihan katugnaw, nag-antus sa tanang matang sa kalisdanan, gani sa kamatayon mismo.”²

Usa sa labing makapatandog nga mga kasinatian gikan niini nga panahon mipaila sa gamayng balangay sa Quincy, Illinois, atol sa tingtugnaw sa 1839. Nianang panahona, kini nga komunidad sa mga lumulupyo ug mga mag-uuma, nga nahimutang sa daplin sa Mississippi River, naglakip sa mga 1,500 ka mga tawo nga nagpuyo sa lisud nga mga kahimtang. Sa tunga-tunga sa mapintas nga tingtugnaw, kalit lang nila nga nasagubangan ang pag-abut sa gibana-bana nga 5,000 ka mga miyembro sa Simbahan nga miikyas tungod sa mando nga puohon nga giisyu sa gobernador sa Missouri. Ang mga Santos anaa sa hilabihan nga kalisud ug kaluya, nga mao pay paglabang nga naglakaw ra sa mibagtok nga katubigan sa Mississippi. Uban sa talagsaon nga kamanggihatagon, ang mga lumulupyo sa Quincy bukas nga miabi-abi kanila, miabli sa ilang mga panimalay ug mipakigbahin sa gamay nilang pagkaon.

Usa ka residente sa Quincy mihulagway sa pag-abut niining mga namakwit: “Daghan sa mga Santos ang nalipay nga nakakita og kapasilungan diha sa akong balay gikan sa mga unos, hangtud nga makakita sila og dapit nga kapuy-an. Daghan kaayong mga gabii nga ang mga salog, didto sa taas ug sa ubos, napuno sa mga higdaanan nga sikit kaayo nga imposible nga molakang bisan asa nga dili makatunob og usa ka higdaanan.”³

Alang kanato nga napanalanginan nga makapuyo sa mas linaw ug mauswagong mga kahimtang, kining mga istorya dunay dakong kamahinungdanon. Nagtudlo kini kanato nga mahimong katawhan nga kanunayng andam sa pagtabang sa walay mga panimalay ug sa mga nagkalisud-lisud. Dili igsapayan kon nagpuyo kita sa mga dapit nga nakasinati og daghang namakwit o sa gamay, nalahi nga mga komunidad, dunay daghang mga paagi nga makaserbisyo kita niadtong nanglimbasug aron makabaton sa nag-unang mga panginahanglan sa kinabuhi. Makatampo kita sa pundo sa humanitarian sa Simbahan. Mahimo kitang makigtambayayong sa uban diha sa atong mga komunidad nga naghatag og mahigugmaong serbisyo niadtong mga nanginahanglan. Mahimo kitang mopadangat sa atong pakighigalaay niadtong napugos sa pagbiya sa ilang mga panimalay kon moabut sa atong mga komunidad. Mahimo kitang tinuoray nga makaabi-abi sa mga estranghero nga mobisita sa atong mga ward ug branch.

Usa sa labing nindot nato nga mga himno nagsaysay sa istorya sa usa ka estranghero nga nakakita og kapasilungan pinaagi sa tawo nga dunay dakong gugma nga putli.

Gabii kadtong nagbagyo
Baha ug bugnaw kaayo.
Tingog niya nadunggan ko
Nangayo’g kapasilungan.
Ako siyang giatiman
Gihatagan og katulgan;
Daw yuta, katulganan ko
Hardin sa Eden gidamgo. …

Sa kalit akong nailhan
Estrangherong nagtakuban.
Uwat sa kamot nakit-an;
Dios diha sa atubangan ko.
Gipamulong akong ngalan,
“Wa ko ikaulaw nimo.
Kini imong handumanan;
Sa tanan nimong binuhatan.”4

Mapasigarbuhon ko nga mahisakop sa usa ka Simbahan nga wala gayud mohunong sa pagtabang sa mga kabus ug timawa dinhi sa yuta. Natandog ko sa dili maihap nga mga binuhatan sa gugma ug gugmang putli, gamay ug dako, nga gipahigayon matag adlaw sa Simbahan ug sa mga miyembro niini. Kining mga binuhatan kanunay nga mahimong usa ka mahinungdanong bahin sa misyon sa Simbahan tungod kay kini mao ang Simbahan ni Jesukristo ug naningkamot kita nga mosunod sa Iyang ehemplo.

Si Jesus mao ang atong Manluluwas ug Manunubos. Ako mopamatuod nga Siya natawo sa tunga-tunga sa kapanahunan, nga Siya buhi, ug nga usa ka adlaw Siya mobalik diha sa himaya aron sa pagmando ug paghari sa Iyang gingharian dinhi sa yuta.

Agig pagpangandam, dapiton ko kamo nga moadto pirme sa Iyang balaang balay; magmugna og luwas, mahigugmaon, ug malinawong kahimtang diha sa inyong panimalay; ug moapil sa pagpundok sa Iyang pinili gikan sa tanang dapit sa kalibutan. Nag-ampo usab ako nga mobati kamo og espesyal nga tinguha sa pagtabang diha sa gugma ngadto niadtong anaa sa taliwala nato nga walay mga panimalay ug nagkalisud. Sa pagbuhat sa ingon, makaandam kamo og usa ka dapit diha sa inyong kasingkasing ug panimalay sa pag-abi-abi sa Manluluwas, ug ang Iyang pagbalik sa pagkatinuod mahimong usa ka mahinungdanon ug talagsaon nga adlaw.