Hugot nga Pagtuo, Paglaum, ug Gugma nga Putli: May Kalabutan nga mga Hiyas

Ni Elder Chi Hong (Sam) Wong

Sa Seventy

Samtang atong hiusahon ang hugot nga pagtuo, paglaum, ug gugma nga putli sa atong inadlaw-adlaw nga mga kinabuhi, kita mahimong tinuod nga mga sumusunod sa Manluluwas nga si Jesukristo.

Bisan ang basahon ni Moroni sa Basahon ni Mormon mubo ra, nga dunay 10 lamang ka kapitulo, naghatag kini og daghang talagsaong tambag. Sila si Moroni ug Mormon pulos nagtudlo og bililhong mga baruganan sa ebanghelyo. Samtang gikompleto ni Moroni ang minubo sa iyang amahan nga Basahon ni Mormon, balik-balik niyang gihinumduman ang mga pagtulun-an sa iyang amahan mahitungod sa pagkasumpay sa hugot nga pagtuo, paglaum, ug gugma nga putli. Sila si Mormon ug Moroni klaro nga gusto mohatag og gibug-aton sa kaimportante niining tulo ka mga baruganan.

Sa akong unang pagtuon sa Basahon ni Mormon, sa kasagaran akong gikonsiderar kining tulo ka mga baruganan nga sama sa mga building block. Ang hugot nga pagtuo maoy mag-una, dayon ang paglaum, ug dayon ang gugma nga putli. Ingon og kini usa ka resonable nga pag-uswag. Samtang motubo ang atong hugot nga pagtuo, atong dugangan ang atong pagtuon ug kahibalo, ug kita magsugod sa paggamit sa mga baruganan sa paglaum. Ang hugot nga pagtuo ug paglaum mohulma nato ug mogiya nato sa mga dalan nga gilaktan sa Manluluwas, ug kita magsugod sa pagdawat sa mga hiyas sa gugma nga putli.

Hinoon, sa mas bag-o nga mga pagtuon, ako nakasabut sa hugot nga pagtuo, paglaum, ug gugma nga putli sa lahi nga paagi. Karon ako naghunahuna niini nga sila mas may kalabutan nga mga hiyas, kada usa dunay gikinahanglang bahin sa pagpalambo ug pagpalig-on sa atong mga pagpamatuod.

Ang among anak nga babaye, nga si Joy, ganahan nga maghimo og mga hayop ug mga butang pinaagi sa pagsapid sa mga balloon. Samtang nagtan-aw ko niya usa ka adlaw niana, naghunahuna ko kon sa unsang paagi ang pisi naporma pinaagi sa pagsapid og daghang mga hilo. Nakatabang kini nako sa paghanduraw sa akong bag-ong nakaplagan nga pagsabut sa hugot nga pagtuo, paglaum, ug gugma nga putli isip mga hilo nga gihiusa aron maporma nga usa ka lig-on nga pisi.

Hugot nga Pagtuo: “Ikaw Makabaton og Gahum”

Ang hugot nga pagtuo sa Langitnong Amahan ug sa Ginoong Jesukristo usa ka pundasyon dili lamang sa pag-angkon og kinabuhing dayon apan usab sa atong kinabuhi dinhi sa yuta. Si Jesukristo mitudlo, “Kon kamo adunay hugot nga pagtuo kanako kamo makabaton sa gahum sa pagbuhat sa bisan unsa nga butang nga maayo ngari kanako” (Moroni 7:33). Nagamit nako kini nga gahum pinaagi sa hugot nga pagtuo sa daghang mga higayon sa akong kinabuhi. Ug misalig ko sa hugot nga pagtuo sa pagdala nako agi sa pipila ka malisud nga mga higayon.

Samtang nag-eskwela sa Brigham Young University–Hawaii, diha ko sa bag-ong palibot ug ang Iningles mao ang ikaduhang pinulongan. Usa kadto ka hagit, ug nasayud ko nga nagkinahanglan ko og tabang kon buot ko nga magpabilin ang akong scholarship. Kon wala ni, dili na ko makaeskwela. Dugang pa, ako nakapasalig nga dili magtuon sa mga Dominggo.

Usa ka adlaw samtang nagbasa ko sa Doktrina ug mga Pakigsaad, usa ka partikular nga bersikulo nakahimo og dako nga impresyon nako. Samtang nagbasa ko sa seksyon 109, bersikulo 7, nasugatan nako kini nga linya: “Pangita og kasayuran gani pinaagi sa pagtuon ug usab pinaagi sa hugot nga pagtuo.” Kana nga bersikulo nahimong yawe sa akong akademik nga kalampusan. Uban sa hugot nga pagtuo ug kakugi sa pagtuon unom ka adlaw sa semana, napanalanginan ko sa akong mga pagtuon. Ang uban sa klase nahibulong kon giunsa nako nga maayo kaayo nga dili magtuon sa Dominggo, sama sa ilang gibuhat. Unsay akong nakat-unan mao nga ang pagkat-on pinaagi sa hugot nga pagtuo makabuntog sa daghang mga hagit.

Usa ka susama nga kasinatian nahitabo samtang nagpadayon ko sa akong negosyo. Gitanyagan ko og nindot nga oportunidad sa trabaho, apan gikinahanglan ko nga motrabaho sa Dominggo. Nakapasalig na ko nga dili motrabaho sa Dominggo. Sa katapusan, akong gibalibaran ang tanyag. Dili nako mabutang sa kompromiso ang akong pasalig sa pagbalaan sa Igpapahulay nga adlaw. Ingon sa akong pasalig sa kolehiyo, napanalanginan ko og laing daghang mga oportunidad sa negosyo nga wala magkinahanglan nga akong ibutang sa kompromiso ug nga nagtugot nako sa paggahin sa mga Dominggo sa pagsimba sa Ginoo.

Samtang maghimo kita og imaginary nga pisi nga mokonektar nato sa balaan nga mga panalangin, sugdan nato sa lig-on nga hilo sa hugot nga pagtuo.

Paglaum: “Aron Mabanhaw ngadto sa Kinabuhing Dayon”

Naglaum kita og daghang mga butang: nga molambo unta kita sa atong panarbaho; nga ang atong mga anak maningkamot pag-ayo; nga kita makatagbaw sa gipaabut sa atong pagserbisyo sa Simbahan; nga magpabilin kita nga himsog; nga kita aduna sa atong gikinahanglan sa pagpadayon sa kinabuhi ug pagsangkap sa atong mga pamilya. Apan asa gikan ang labing taas nga matang sa paglaum, ug asa kita dad-on niini?

Si Mormon miingon, “Ako mamulong nganha kaninyo nga anaa sa simbahan, nga malinawon nga mga sakop ni Kristo, ug nga nakabaton sa igo nga paglaum diin kamo makasulod ngadto sa kapahulayan sa Ginoo” (Moroni 7:3).

Samtang si Mormon nagpadayon sa iyang pagdapit nato nga mahimong tinuod nga mga sumusunod ni Kristo, siya sa makausa mibalik sa hilisgutan sa paglaum sa dihang siya nangutana, “Ug unsa kana nga kamo molaum?” Dayon iyang gitubag kining importante nga pangutana: “Tan-awa ako moingon nganha kaninyo nga kamo magbaton og paglaum pinaagi sa pag-ula ni Kristo ug sa gahum sa iyang pagkabanhaw, aron mabanhaw ngadto sa kinabuhi nga dayon, ug kini tungod sa inyong hugot nga pagtuo diha kaniya sumala sa saad” (Moroni 7:41).

Kini nga matang sa paglaum lahi gikan sa ordinaryo nga paglaum. Kini nga balaan nga paglaum nagagikan sa Pag-ula ni Jesukristo. Mao kini ang mahangturong paglaum. Kon wala ang maong paglaum mosimba kita kada semana nga wala makahibalo niining tanan nga talagsaong mga panalangin nga anaa duol nato. Pinaagi ni Kristo ang atong paglaum makagiya nato balik ngadto sa atong Langitnong Amahan ug ngadto sa kinabuhing dayon.

Sa usa ka bag-ong pakigpulong sa kinatibuk-ang komperensya, si Presidente Henry B. Eyring, Unang Magtatambag sa Unang Kapangulohan, mipahayag, “[Ang Amahan] mitugot Niya nga ang Iyang Anak, pinaagi sa maulaon Niyang pagsakripisyo, mohatag og paglaum nga mohupay kanato bisan og lisud ang dalan pabalik ngadto Kaniya.”¹ Pinaagi sa paglaum makita nato ang mga panalangin ug mga oportunidad nga naghulat nato kon kita magpabilin nga tinuod sa ebanghelyo ni Jesukristo ug moserbisyo Kaniya uban sa atong tibuok kasingkasing, gahum, hunahuna, ug kusog.

Uban niana nga pagsabut, dugangan nato ang hilo sa atong pisi, nga mao ang paglaum.

Gugma nga Putli: Gihatag sa Tinuod nga mga Sumusunod

Ang ikatulo nga hiyas aron dugang nga malig-on ang atong pisi mao ang gugma nga putli. Magsugod kita sa pagpalambo sa gasa sa gugma nga putli pinaagi sa atong sinsero nga mga paningkamot sa pagsunod sa Manluluwas. Hinoon, ang tibuok sukod niini nga gasa ihatag ngari nato sa Dios kon kita magtinguha niini pinaagi sa pag-ampo. Samtang kita mosunod Kaniya kinsa mihatag nato og kinabuhi, magsugod kita sa pagkat-on sa tinuod nga kahulugan sa gugma nga putli, nga mao “ang tiunay nga gugma ni Kristo” (Moroni 7:47).

Sama sa gitudlo ni Mormon, “Pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo; aron mahimo kamo nga mga anak sa Dios” (Moroni 7:48). Isip malinawon nga mga sumusunod, tingali nakaangkon ta og igo nga paglaum, apan aron makaangkon og gugma nga putli, kinahanglan kita nga mahimong tinuod nga mga sumusunod. Kon kita tinuod nga mga sumusunod, mahimo kitang mas sama Kaniya, nga mao ang katuyoan sa kinabuhi.

Pinaagi sa pagtanom diha sa atong mga kasingkasing sa putli nga gugma ni Kristo, mas hangupon nato ang diosnon nga hiyas sa gugma nga putli—sa pagserbisyo sa isig ka tawo ug sa Dios. “Kon ang tawo magmaaghup ug magmapainubsanon sa kasingkasing, ug mokumpisal pinaagi sa gahum sa Espiritu Santo nga si Jesus mao ang Kristo, siya kinahanglan gayud adunay gugma nga putli; kay kon siya walay gugma nga putli, siya walay kapuslanan; busa siya kinahanglan gayud nga makabaton og gugma nga putli” (Moroni 7:44).

Karon duna kitay tulo ka importante nga mga hilo sa atong pisi. Tan-awon nato kon sa unsa nga paagi kini magamit.

Kining Tulo Magkahiusa

“Busa, kinahanglan adunay hugot nga pagtuo; ug kon kinahanglan adunay hugot nga pagtuo kinahanglan usab adunay paglaum; ug kon kinahanglan adunay paglaum kinahanglan usab adunay gugma nga putli.

“Ug gawas kon kamo adunay gugma nga putli kamo dili mahimo nga maluwas sa gingharian sa Dios; ni kamo maluwas sa gingharian sa Dios kon kamo walay hugot nga pagtuo; ni kamo makahimo kon kamo walay paglaum” (Moroni 10:20–21).

Kon hiusahon, ang hugot nga pagtuo, paglaum, ug gugma nga putli dili na sama sa mga building block alang kanako; hinoon kini nagkalambigit sa usag usa. Dili kita makahuman sa pagtukod og hugot nga pagtuo, ug dayon magbaton og paglaum, o human makabaton og paglaum, sa katapusan makapalambo og gugma nga putli. Kining tanan nagkahiusa. Ug samtang kini magkalambigit, kini tanan makatabang paghulma sa atong kinaiya ug pagpamatuod.