Kalig-on sa Pagpili
Ang tagsulat nagpuyo sa California, USA.
Moserbisyo og misyon o mahimong usa ka propesyunal nga bodybuilder? Ang usa ka kasulatan ug kinutlo nga gipaambit sa akong higala kanako nakatabang sa akong paghukom.
Nalipay kaayo ko dihang usa ka adlaw gitawag ko sa usa ka tawo ug giingnan ko nga nakita niya ang akong mga pasundayag sa bodybuilding ug gusto siyang mo-sponsor nako. Siya ang mobayad sa akong mga sinina ug protina ug siya ang mopasakay nako sa eroplano adto sa Europe aron maghimo og mga pasundayag didto. Gani miingon siya nga mapatik pa ko sa magasin. Ang bodybuilding maoy akong ganahan, ug mao kini ang akong pangandoy! Ang problema lang kay napadala na nako ang akong mga papeles para sa misyon pipila na ka adlaw ang milabay. Gisultihan nako ang tawo nga hunahunaon una nako ang iyang tanyag ug tawagan nako siya.
Nag-atubang ko og pinakalisud nga desisyon sa akong kinabuhi. Para sa akong mga ginikanan, ang pagdawat sa sponsor dili usa ka opsyon. Miingon sila, “Tingali maangkon nimo kining oportunidad human sa imong misyon.” Apan dili ko mahunong sa paghunahuna bahin niini. Nasayud kong kinahanglan ko nga magmisyon ug moserbisyo sa Ginoo, apan ang akong pangandoy anaa na gyud sa akong atubangan.
Nangutana ko og daghang higala unsay hunahuna nila nga akong buhaton. Ang uban miingon nga dawaton nako ang sponsor, ug ang uban miingon nga si Satanas mitrabaho batok nako tungod kay dili siya gustong magmisyon ko.
Usa ka adlaw, ang talagsaon nakong higala mipaambit og usa ka kutlo gikan ni Presidente Ezra Taft Benson (1899–1994): “Ang mga kalalakin-an ug mga kababayen-an kinsa mosalig sa ilang mga kinabuhi ngadto sa Dios makadiskobre nga Siya makahimo og daghan pa sa ilang mga kinabuhi kay sa ilang mahimo. Siya makapadaghan sa ilang mga kalipay, mas makapalambo sa ilang panglantaw, makapaabtik sa ilang mga hunahuna, makapalig-on sa ilang mga unod, makapabayaw sa ilang mga espiritu, makapadugang sa ilang mga panalangin, makapadaghan sa ilang mga oportunidad, makahupay sa ilang mga kalag, makahatag og daghang mga higala, ug makabu-bu og kalinaw.”1
Kana nga kinutlo midulot gayud kanako. Mao usab ang kasulatan nga akong nabasa diha sa Basahon ni Mormon: “Ug kon kini mao nga ang mga katawhan maghupot sa mga sugo sa Dios siya moamuma kanila, ug molig-on kanila, ug mohatag og mga paagi diin sila makatuman sa butang diin siya misugo kanila” (1 Nephi 17:3).
Gumikan sa tabang niini nga kinutlo ug sa kasulatan ug sa suporta sa akong mga higala ug pamilya, mihukom ko nga magserbisyo og misyon ug gitawag nga moserbisyo sa Bolivia Cochabamba Mission.
Ang pagserbisyo og misyon mao ang pinakamaayong pagpili nga sukad akong nahimo. Nakita nako ang dili maihap nga mga panalangin lakip ang panalangin nga makakat-on og Espanyol nga dali ra kaayo.
Gipanalanginan usab ang akong pamilya. Samtang naa ko sa misyon, nakadawat ko og email gikan sa akong mga ginikanan nag-ingon nako nga ang akong magulang nga lalaki misimba sa unang higayon sa 12 ka tuig. Dayon iyang giusab ang iskedyul niya sa trabaho aron makasimba siya matag Dominggo, ug mihimo siya og tumong nga mobasa sa Basahon ni Mormon. Ang akong manghud nga lalaki usab kinsa naglisud mihimo usab og mga kausaban sa iyang kinabuhi ug nalig-on ang iyang pagtuo. Ang akong ig-agaw naaktibo og balik ug nagsugod sa pag-adto sa templo matag semana aron maghimo og bunyag para sa mga patay. Napanalanginan gayud kami.