Mga Tingog sa mga Santos sa Ulahing mga Adlaw
Pagpanghatag og Kalipay
Paghulagway pinaagi ni Stan Fellows
Ang akong bana ug ako mga misyonaryo nga nagserbisyo sa Tarbes, France, didto sa Pyrenees Mountains. Bisperas sa Pasko kadto, ug mihukom mi nga moadto sa siyudad sa Verdun Plaza aron manghatag og mga kopya sa Basahon ni Mormon. Ang kadalanan walay mga tawo, ug nangutana mi sa among kaugalingon kon unsa man ang among buhaton sa daghan kaayong mga libro. Sa kalit lang, nakakita mi og batan-ong lalaki nga daw wala makahibalo kon asa paingon.
Amo siyang giduol ug mitanyag kaniya sa usa ka Basahon ni Mormon. Nahimo siyang malipayon samtang naminaw namo nga naghisgut mahitungod sa ebanghelyo. Mipasabut siya nga nag-inusara lang siya nianang Pasko sa gabii ug siya mobasa sa Basahon ni Mormon ug dili na bation nga nag-inusara.
Pagkahuman niya og biya, mitan-aw na usab mi sa kadalanan ug nakakita og usa ka babaye nga hinayng naglakaw paingon namo sa tugnaw nga kagabhion. Makita namo nga may kalipay sa iyang panagway nga misanag sa iyang mga mata sa dihang mipakita kami niya sa Basahon ni Mormon. Miingon siya namo nga nahimo siya nga balo bag-uhay lang ug nalipay nga nagpakabana kami bahin niya. Miingon siya nga mapasalamaton kaayo siya ngari namo. Sa iyang paglakaw, amo siyang nakita nga gigakos ang libro duol sa iyang kasingkasing.
Nianang gabhiuna among napanghatag ang matag kopya sa Basahon ni Mormon nga among gidala. Kadaghanan sa mga tawo nga among nahatagan mga nag-inusara, naguol, ug nagkinahanglan kaayo sa gugma. Namauli mi sa balay nianang gabhiuna uban sa pagbati nga nakadawat kami og labing nindot nga Pinaskohan tungod sa kalipay nga among nahatag sa ubang tawo.