Ipahibalo nga Ikaw Nagpakabana

Dunay daghang paagi nga kita makapakita nga kita nagpakabana, ilabi na panahon sa Pasko. Pwede nato kining isulti, i-text, isulat, ihatag, ipaambit, iampo, iluto, ikanta, igakos, idula, itanom, o ilimpyo. Sulayi lang kini.

Ang pagpakita og gugma sa uban mao gayud ang sentro sa pagpangalagad. Ang Kinatibuk-ang Presidente sa Relief Society nga si Jean B. Bingham miingon: “Ang tinuod nga pagpangalagad mabuhat sa tinagsa-tagsa uban sa gugma isip ang hinungdan.… Kon ang gugma maoy nagdasig, ang mga milagro mahitabo, ug makakita kita og mga paagi sa pagdala sa atong ‘nawala’ nga mga kaigsoonan ngadto sa hingpit nga pagdawat sa ebanghelyo ni Jesukristo.”¹

Ang pagpahibalo sa uban nga kita nagpakabana usa ka mahinungdanong elemento sa pagpalambo og personal nga mga relasyon. Apan ang managlahing katawhan adunay managlahi nga paagi sa pagsabut sa mensahe. Unsaon diay nato nga mapahayag sa tukma ang atong gugma alang sa uban sa mga paagi nga ilang masabtan ug mapasalamatan? Aniay pipila ka paagi nga atong masulti nga kita nagpakabana, kauban sa pipila ka mga ideya aron masugdan ang kaugalingon nimong panghunahuna.

Isulti Kini

Usahay walay ikabaylo sa imong pagsulti kon unsay imong gibati mahitungod sa usa ka tawo. Samtang nagpasabut kini sa pagsulti sa tawo nga imo siyang gimahal, naglakip usab kini sa pagpaambit unsay imong giganahan mahitungod kaniya o sa paghatag og sinserong pagdayeg. Kini nga matang sa paghimatuod makatabang sa paglig-on sa mga relasyon. (Tan-awa sa Mga Taga-Efeso 4:29.)

Pangita og oportunidad aron ang indibidwal mahibalo unsa ka dako ang imong pagdayeg sa usa sa iyang mga kalig-on.
Hapita siya, tawagi, o padad-i og email, text, o kard nga magpahibalo sa indibidwal nga ikaw naghunahuna kanila.

Pakigsulti

Ang paggahin og panahon nga makigsulti ug maminaw sa laing tawo usa ka impluwensyal nga paagi nga ikapakita ang gidak-on sa imong paghatag og bili kaniya. Mag-istorya man kamo sa balay, sa simbahan, o bisan asa, dunay daghang tawo nga nagkinahanglan og tawo nga ilang ikasulti. (Tan-awa sa Mosiah 4:26; D&P 20:47.)

Sumala sa indibidwal nga panginahanglan, pag-iskedyul og panahon sa pagpakig-istorya. Gahini og panahon ang pagpaminaw ug pagsabut gayud sa iyang mga kahimtang.
Kon ugaling lisud ang pagpakig-istorya nga moadto sa mga balay tungod sa gilay-on, sa naandang mga kultura, o ubang mga sitwasyon, ikonsiderar ang pagpangita og panahon human sa mga miting sa Simbahan.

Moserbisyo nga dunay Katuyoan

Pagmahunahunaon kon unsay mga gikinahanglan sa indibidwal o sa pamilya. Ang paghatag og makahuluganong serbisyo maoy magsulti nga ikaw nagpakabana. Mohiusa kini sa bililhong mga gasa sa panahon ug sa mahunahunaong paningkamot. “Ang yanong mga buhat sa pagserbisyo mahimong dunay dako nga impluwensya sa uban,” miingon si Sister Bingham.²

Motanyag og serbisyo nga makalig-on sa mga indibidwal o sa ilang mga pamilya, sama sa pagbantay sa mga bata aron ang mga ginikanan makaadto sa templo.
Pangita og mga paagi nga makapagaan sa buluhaton kon lisud ang kinabuhi, sama sa pagpanglimpyo sa mga bintana, pagpasuroy sa iro, o paglimpyo sa nataran.

Magtambayayong sa Pagtrabaho

Dunay mga indibidwal nga dili makalahutay og lawom nga pag-istoryahanay. Ang ubang tawo, makalahutay sa pagpakig-istorya pinaagi sa paghisgot unsay ilang komon nga mga interes ug sa pagbuhat og mga butang nga magkauban. Giawhag kita sa Ginoo sa “pagpaduol ug paglig-on” (D&P 20:53) sa atong mga kaigsoonan.

Maglakaw-lakaw, magplano og mga dula nga panggabii, o magtakda og panahon nga magkadungan sa pag-ehersisyo.
Magdungan sa pagserbisyo sa komunidad o sa proyekto sa Simbahan.

Mohatag og Regalo

Usahay ang panahon o mga oportunidad sa pakig-inter-aksyon limitado ra. Sa daghang kultura, ang paghatag og mga regalo usa ka timailhan sa pagpangga ug pagbati. Bisan ang panagsa, yano nga regalo maoy makasulti sa imong interes aron maugmad ang mas maayong pakigrelasyon. (Tan-awa sa Mga Proverbio 21:14.)

Libreha sila sa unsay ilang paborito.
Mopaambit og mga kinutlo, kasulatan, o ubang mensahe nga gibati nimong sila makabenipisyo.

Usa ka Paghago tungod sa Gugma

Kon mahibaloan na nimo kinsa ang imong pangalagaran ug ang tawo diin nagtinguha ka og inspirasyon nga maalagaran, mas daghan ka og makat-onan ilabi na unsaon nimo sa pagpahibalo nga ikaw nahigugma ug nagpakabana kanila sa tinagsa-tagsang paagi.

Si Kimberly Seyboldt sa Oregon, USA, misugilon sa istorya bahin sa pagtinguha og inspirasyon ug paghatag og mga gasa alang sa pagpakita og gugma:

“Kon makita nakong naluya ko sa kinabuhi, mobarug ko ug maghimo og pan nga zucchini, sa kasagaran mga walo ka piraso. Ang akong espesyal nga lamas mao ang hilum nga pag-ampo nga akong ihalad samtang magluto ko aron mahibalo kinsa ang nagkinahanglan sa maong mga piraso sa pan. Mas nailhan nako ang akong mga silingan sa palibut samtang ang pan nga zucchini nga init-init pa maoy modapit kanako sa ilang mga panimalay ug sa ilang kinabuhi.

“Usa ka igang nga panahon sa ting-init, mihunong ko sa tupad sa usa ka pamilya nga namaligya og linata nga mga blackberry sa daplin sa karsada. Wala ko magkinahanglan og mas daghang blackberry, apan ang batan-on, daut nga batang lalaki nga diha sa baligyaanan dasig kaayong nakakita kanako, nagtuo nga ako ang sunod niyang kustomer. Mipalit ko og pipila ka blackberry, apan may regalo usab ako kaniya. Akong gihatagan ang bata og duha ka pirasong pan. Milingi siya sa iyang amahan sa pag-uyon, dayon miingon, ‘Tan-awa Pa, may pagkaon na ta karon.’ Napuno ko sa pasalamat alang niini nga oportunidad aron ikapakita ang gugma sa yano nga paagi.”

Si Elder Jeffrey R. Holland sa Korum sa Napulog Duha ka mga Apostoles nangamuyo “nga ang matag lalaki ug babaye—ug atong mga hamtong nga young men ug young women—mahimong mas [mo]hugot ang kamasaligon sa kinasingkasing nga pagpakabana alang sa usag usa, dinasig lamang sa putli nga gugma ni Kristo sa pagbuhat sa ingon. … Hinaot nga maghago ta uban sa Ginoo sa ubasan, sa pagtabang sa Dios ug Amahan sa Iyang dakong buluhaton sa pagtubag sa mga pag-ampo, paghatag og kahupayan, pagpahid sa mga luha, ug paglig-on sa huyang nga mga tuhod.”³

Si Jesukristo Nagpakabana

Sa wala pa gibuhi og balik ni Jesukristo si Lazaro gikan sa mga patay, “si Jesus mihilak.

“Busa ang mga Judeo nanag-ingon, Tan-awa, pagkadaku gayud sa iyang paghigugma kaniya!” (Juan 11:35–36).

“Ako adunay kalooy diha kaninyo; ang akong kasingkasing napuno sa kalooy. Dayon gitawag nila ang ilang mga masakiton, ang ilang mga bakol ug mga buta, ug “siya miayo kanila” (tan-awa sa 3 Nephi 17:7–9).

Si Jesukristo mipakita og ehemplo alang kanato samtang Siya nag-atiman sa uban. Mitudlo Siya kanato:

“Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.

“Mao kana ang dako ug unang sugo.

“Ug ang ikaduha sulosama ra, nga mao kini, Higugmaa ang imong silingan sama sa imong kaugalingon” (Mateo 22:37–39).

Kinsa ang nagkinahanglan sa imong pag-atiman? Unsaon nimo sa pagpakita kanila nga ikaw nagpakabana?