Mga Desisyon ug mga Milagro: Ug Karon Akong Nakita

Ni Irina V. Kratzer

Mahitungod ni Sister Kratzer

Kwadro sa litrato gikan sa Getty Images

Si Irina Valentinovna Kratzer (b. 1965) nagpuyo sa Barnaul, Siberia, diin mieskwela siya sa medikal nga eskwelahan ug nahimong cardiologist. Ang pagkadoktor dili pa dako nga pangwarta; molabay ang mga bulan nga walay isweldo ang hospital. Human makig-diborsyo sa iyang abusado nga bana niadtong 1996, mibati si Irina og kaluya ug kawalay paglaum samtang nagtrabaho siya og mga panggabii nga ekstrang mga oras sa gagmayng sweldo aron isuporta sa iyang inahan ug anak nga babaye.

Si Irina nagdako sa ateista nga palibut ug dili motuo og Dios. Bisan pa, usa ka gabii namasin siya og usa ka hangyo: “Sige, O Dios, kon naa ka man diha, pahibaloa lang ko, kay tingali ikaw wala gani magpakabana kanako. Kinsa ba ako para nimo, usa ka gamayng butang dinhi nga naningkamot nga mabuhi?”

Pipila ka semana ang milabay, pagka-Agosto 1996, nakatagbo ni Irina ang usa ka lalaki nga mopaila kaniya sa Simbahan ug mitabang kaniya nga makabiyahe sa Estados Unidos aron makatuon og Iningles. Walo ka bulan human sa iyang pag-abut sa Utah, USA, pagka-Abril 1998, naminyo si Irina kang Tay Kratzer.

Si Sister Kratzer usa ka magtutudlo sa Orem, Utah, Relief Society, dihang gidapit siyang mamulong sa Komperensya sa Kababayen-an sa Brigham Young University. Ang punctuation ug capitalization gi-standard.

Dunay panahon sa akong kinabuhi nga gitandog ko sa gugma ug Kahayag ni Kristo. Sukad niadto nausab ang akong kinabuhi.

Nasayud ko unsa ang kinabuhi nga wala ang ebanghelyo. Ingon niana ang akong pagpakabuhi sulod sa 30 ka tuig. Natawo ko sa Russia sa matarung nga mga ginikanan. … Dihang midako na ko, naminyo ko ug nanganak og usa ka matahum nga batang babaye. Sa wala madugay malampuson ko nga nakagradwar sa unibersidad ug nakatrabaho sa ako gayud nga ganahan. Ug sa gihapon, … layo pa kaayo ako sa pagkamalipayon.

… Ang akong kaminyoon … anam-anam nga nabungkag. … Maglisud na gani ko sa pagsangkap og baratuhong pagkaon alang sa akong anak ug kanako. Nakasala ko. Nakahimo kog usa ka sayop nga pagpili human sa lain. Gutom, depresyon, ug ngil-ad nga mga desisyon ang naghimong miserable sa akong kinabuhi. Akong [gibasol] ang ngil-ad nga palad, wala makamatikud nga sa daghang paagi nag-antus ko sa natural nga mga sangputanan sa akong mga sala. Apan unsaon nako sa pagkahibalo niana? Walay sala sumala sa mga gitudlo diri kanako. …

Ang relihiyon sa [ang Unyon Sobyet] gidili human sa Rebolusyon sa mga Komunista niadtong 1917. Gikan pa a kindergarten gitudloan na ko nga walay gitawag nga Dios ug nga ang Partidong Komunista lamang ug si Lolo Lenin ang makadala og kalipay sa katawhan sa Russia. Ang relihiyusong mga tawo hilabihan nga gilutos sa among katilingban. Ang mga tumutuo nawad-an sa ilang mga trabaho, dili tugutang maka-eskwela, ug tawagon nga “boang.” Ang tanan paeskwelahon gayud og ateista nga mga klase sa unibersidad, diin among pamatud-an nga wala gayuy Dios. … Wala na lang gyud ko maghunahuna bahin sa Dios. Apan may gibati akong kahapdos sa akong kasingkasing mahitungod sa ngil-ad nakong mga pagpili. Sa wala madugay akong nahibaloan nga ang kahapdos nga akong gibati mao ang Kahayag ni Kristo nga naghatag kanako og pagbati sa konsensya nga makahibalo sa eksakto gikan sa sayop. …

… Ang kinabuhi para nako daw sama sa usa ka ngiob nga kuweba nga bugtong lubnganan ra ang naa sa kinatumyan. Akong gibati nga anam-anam kong namatay. … Dili ko kahibalong mag-ampo, mao nga nagdamgo ko. … Nagdamgo ko nga usa ka adlaw mopalayo ko gikan sa miserabling mga butang sa akong kinabuhi ug magsugod og usab gikan sa sinugdanan—malipayon ug masanagon. Gusto kaayo kong adunay mas maayong kinabuhi ang akong anak kay kanako. …

[Dayon] miabut ang Basahon ni Mormon sa akong kinabuhi. Mobasa ko og usa ka kapitulo matag buntag sa dili pa ko motrabaho. Sa pagbasa niini nga libro, akong nahibaloan nga ang Dios buhi, nga si Jesus Iyang Anak, [kinsa] mianhi dinhi sa yuta aron motabang sa mga makasasala nga sama kanako. Dihang mibasa pa ko og daghan niini nga libro, mas nagkadako ang kal-ang nga akong nakita tali sa mga pagtulun-an ni Kristo ug sa pamaagi sa akong pagpakabuhi. Akong nakat-unan nga mao diay nganong miserable kaayo ang akong kinabuhi. …

… Andam na ko alang sa mahinuklugon nga kausaban. Kanunay nakong mahinumduman ang gabii … dihang tibuok gabii kong naghilak, nasayud nga dili maayo ang akong kinabuhi, nga ang ngil-ad nakong mga desisyon mipasakit sa mga tawo nga akong gihigugma pag-ayo. Kadto ang pinakasakit nga kasinatian sa akong kinabuhi. Nagbakho ko ug nangamuyo sa tibuok gabii. … Sa pagtapos sa kagabhion naluya ko ug nahubsan na sa mga luha. Dihang mibidlisiw ang unang kabuntagon, ang kalinaw ug kahupayan miabut kanako. Akong nadungog ang mga pulong: “Ania ang akong mga kamot. Tultulan ug giyahan ko ikaw. Apan imong isaad kanako nga mag-usab ka.” Ug akong gibuhat, ako misaad. Ganahan ko niini nga giya ug tabang labaw sa tanan. …

Wala ko mahibalo, nga nianang mahapdos ug malipayong kagabhion sa Russia, pagkatalagsaon diay sa mga saad ni Kristo. Wala ko masayud niadto nga sulod lang sa mubo nga panahon mobiyahe diay ko sa Amerika diin mas daghan pa akong makat-unan mahitungod sa ebanghelyo, ug sa dili madugay mabunyagan ko. … Wala ko masayud nga ang akong anak diay moadto sa Amerika aron makig-uban kanamo sa kalipay. …

… Gihatagan ko Niya og daghan kaayong milagro nga ako wala na gani gamayng higayon sa pagduha-dua sa Iyang balaang kamot sa akong kinabuhi. …

Lakaw kauban ni Kristo! Gunit sa Iyang kamot! Pagbusog sa Iyang pulong. Inom diha sa Iyang kahayag pinaagi sa matag lungag sa imong panit, sa tibuok nimong kalag. Sa mga panahon sa kalisud, dili ka pasagdan nga anaa sa mangitngit nga kuweba apan diha sa kahayag sa Iyang gugma anaa ang mas masilaw nga kahayag nga kanunayng nagauna kanimo.