Usa ka Matam-is nga Pasko

Wilson Correia dos Santos

Pernambuco, Brazil

Gihulagway ni Enya Todd

Ang akong pamilya mihimo sa Pasko nga halandumong okasyon kutob sa akong mahinumduman. Dihang mibiya ko alang sa Brazil Porto Alegre Mission, wala ko makamatikud unsa diay kalisud para nako ang paggahin sa Pasko nga layo kanila sa unang higayon.

Atol sa una nakong Pasko sa misyon, nangandoy kong kauban ang akong pamilya, apan ako ug ang akong kompanyon nag-inusara. Usa ka pagbati nga kalooy sa kaugalingon ug kasubo ang mibugkos kanako.

Sa Gabii sa Pasko, usa ka minahal nga pamilya midapit sa akong kompanyon ug kanako alang sa panihapon. Nindot ang among gabii, apan ang kalipay niining pamilyaha nagpahinumdom lang kanako nga ako nalayo sa kaugalingon nakong pamilya. Nianang gabhiona namauli mi, ug gisulayan nako sa pagkatulog ug paghikalimot nga ang sunod nga adlaw Pasko na. Sa unang higayon sa akong kinabuhi, nahupay ko dihang nahuman na ang Pasko.

Usa ka tuig human niadto, gihinumduman nako ang milabayng Pasko ug naghunahuna unsa kahay akong mahimo aron makabaton og mas maayong Pasko sa misyon. Akong naamguhan nga ang akong mga pagbati sa kasubo sa milabayng tuig miabut tungod kay nag-focus lang ako sa akong kaugalingon imbis sa Manluluwas. Naamguhan pud nako nga ang Pasko usa ka panahon sa paghinumdom sa pagkatawo sa Manluluwas ug nga kinahanglan kong malipay sa pagserbisyo Kaniya isip Iyang representante.

Sa pagpakig-istorya sa akong kompanyon, nakahukom kaming mamalit og lollipop nga ikapanghatag sa mga miyembro, mga investigator, mga bata, ug kang bisan kinsa nga among maagian sa Adlaw sa Pasko. Nagpraktis usab kami og mga himno sa Pasko nga kantahon. Kalipay ang midagayday sa akong kasingkasing sa Adlaw sa Pasko samtang nakatagbo kami og mga tawo, mikanta og mga himno, ug nanghatag og mga lollipop.

Sa among pagpamauli nianang gabhiona, nakatagbo kami og usa ka gulangon na nga tawo nga naglingkod sa daplin sa agianan. Nangutana kami kon nakadawat na ba siya og regalo nianang adlawa. Miingon siya nga oo—nakaistorya na niya ang iyang mga anak sa telepono nga nagpuyo sa layo.

“Duna kami usa pa ka regalo nga ihatag kanimo,” miingon kami. Gihatagan namo siya og lollipop.

“Dili lamang kini mopatam-is sa akong ba-ba,” miingon siya, “apan mopatam-is usab kini sa akong espiritu.”

Nakabaton ko og pinakangil-ad nga Pasko sa akong misyon tungod kay nag-focus lang ako sa akong kaugalingon. Nakabaton usab ako og pinakamaayong Pasko tungod kay nag-focus ako sa Manluluwas. Nahibalo ko nga kon mag-focus kita Kaniya, Siya magdala og katam-is sa atong mga espiritu atol sa Pasko ug sa matag adlaw sa tuig.