Usa ka Hinungdan sa Pagsaulog
Alang sa mga Santos sa Ulahing mga Adlaw nga nianang higayuna mga hingkud na, ang 1978 nga pagpadayag mahitungod sa pagkapari usa ka hitabo nga napatik sa panumduman.
I.
Ang balita miabut kanako gikan sa telepono nga panagsa rang mobagting. Ang akong duha ka anak nga lalaki ug ako nagtrabaho sa nataran sa balay sa bungtod nga among gitukod isip dapit nga kapahulayan gikan sa bug-at nakong mga responsibilidad isip presidente sa Brigham Young University. Ang nanawag si Elder Boyd K. Packer. Iya kong gisultihan mahitungod sa pagpadayag kabahin sa pagkapari, nga bag-o lang gipahibalo. Nagbinayloay kami og mga pagpahayag sa kalipay, ug mipadayon ko sa akong gitrabaho. Milingkod ko sa naugdo nga yuta nga among gipangbalhin ug gikamay ang akong duha ka anak. Dihang gisultihan nako sila nga ang tanang takus nga mga miyembro nga mga lalaki sa Simbahan karon maordinahan na sa pagkapari [priesthood], mibakho ako sa kalipay.
Nganong ang pagpadayag bahin sa pagkapari ingon man niana ka ikalipay nga okasyon? Isip usa ka batan-on nga nag-eskwela ug nagtrabaho sa legal nga propesyon, nagpuyo ko sa Tunga-tungang kasadpan ug sa Sidlakang mga rehiyon sa Estados Unidos sulod sa 17 ka tuig. Akong naobserbahan ug gibati ang kasakit ug mga kasagmuyo nga nasinati niadtong nag-antus niini nga mga restriksyon ug niadtong nakabantay niini, mibugal-bugal niini, ug nangita og mga rason. Akong gitun-an ang gihatag nga mga rason ug wala mobati og kumpirmasyon mahitungod sa kamatuoran bisan asa niini. Isip kabahin sa akong mainampuon nga pagtuon, akong nakat-unan nga, sa kinatibuk-an, panagsa rang mohatag ang Ginoo og mga rason alang sa mga sugo ug mga direksyon nga Iyang gihatag sa Iyang mga sulugoon. Determindo ako nga magmatinumanon sa among propetikanhong mga lider ug mag-ampo—sigun sa gisaad sukad sa sinugdanan niini nga mga restriksyon—nga ang adlaw moabut diin ang tanan makatagamtam sa mga panalangin sa pagkapari [priesthood] ug sa templo. Karon, pagka-Hunyo 8, 1978, kanang adlaw miabut, ug mibakho ako sa kalipay.
II.
Kon atong ikonsiderar unsay nahitabo ug unsay nanghitabo sa Ang Simbahan ni Jesukristo sa mga Santos sa Ulahing mga Adlaw ug sa kinabuhi sa mga miyembro niini sukad 1978, tanan kita dunay hinungdan sa pagsaulog.
Isip usa ka institusyon, ang Simbahan milihok dayon niini nga pagpadayag mahitungod sa pagkapari. Ang mga ordinasyon ug mga rekomend sa templo gihimo dayon. Ang mga gipanghatag nga rason aron mapasabut ang unang mga restriksyon ngadto sa mga sakop sa kaliwatang mga African—bisan kadtong kanhi gipamahayag sa tinahud nga mga lider sa Simbahan—diha dayon wala na gamita sa kinabag-an. Namulong ang Ginoo pinaagi sa Iyang propeta, ug ang Iyang Simbahan mituman.
Sukwahi niini, ang mga pag-usab sa kasingkasing ug sa naandang mga buhat sa tinagsang mga miyembro wala dayon mahitabo ug sa kinatibuk-an. Ang pipila midawat sa mga epekto sa pagpadayag diha-diha dayon ug sa malipayong paagi, ang uban midawat ra sa hinay-hinay, ug ang uban, sa personal nilang kinabuhi, nagpadayon sa diskriminasyon nga sakit kaayo alang sa daghan sa tibuok kalibutan, lakip sa milabay nga 40 ka tuig. Ang uban gusto pang molingi, nga motutok sa ilang atensyon sa pagsusi sa nangagi, lakip ang pagpangita og mga rason alang sa karon nga wala nay bili nga mga restriksyon. Apan ang kadaghanan sa Simbahan, lakip ang mga senior nga mga pangulo, nakatutok na sa mga oportunidad sa umaabut kay sa mga kasagmuyo sa kagahapon. Ang kadaghanan misalig sa kaalam ug sa tukmang panahon sa Ginoo ug midawat sa mga direksyon sa Iyang propeta. Sa paghimo niana, atong namatikdan ang mahangturon nga kahulugan sa Iyang propetikanhong pagtulun-an nga “ang usa ka binuhat sama ka bililhon sa iyang panan-aw ingon sa uban” (Jacob 2:21). Sa paghimo niini, nakadawat kita og bag-ong pangpadasig aron matuman ang sugo sa Ginoo nga si Jesukristo nga kita kinahanglang motudlo sa mahangturong ebanghelyo ngadto sa tanan—sa “tanan nga mga kanasuran, mga kaliwatan, mga pinulongan ug mga katawhan” (D&P 42:58).
III.
Ang atong pagkabalaka sa mga butang nga wala ipadayag o sa nangaging mga pagpasabut nga gihatag sa mga tawo nga may limitado rang panabut moresulta sa pagpangagpas ug kapakyasan. Alang sa tanan nga aduna niana nga mga kabalaka, atong ipaabut ang atong gugma ug kining espesyal nga pagdapit. Tanan kita motan-aw sa unahan uban ang pagkahiusa sa atong pagtuo ug pagsalig sa saad sa Ginoo nga “siya nagdapit kanilang tanan sa pagduol ngadto kaniya ug sa pag-ambit sa iyang kaayo; ug siya wala maglimud kang bisan kinsa nga moduol ngadto kaniya, itum ug puti, ulipon ug gawasnon, lalaki ug babaye” (2 Nephi 26:33).
Samtang lantawon nato ang umaabut, ang usa sa pinakaimportanting mga epekto sa pagpadayag mahitungod sa pagkapari mao ang balaanong tawag niini nga talikdan ang mga kinaiya sa pagkamahukmanon batok sa bisan unsang pundok sa mga anak sa Dios. Ang diskriminasyon tungod sa kaliwatan tingali maoy pinakakomon nga tinubdan sa pagpanghukom karon, ug gitawag kita sa paghinulsol niana. Apan sa tibuok kasaysayan, daghang pundok sa mga anak sa Dios ang gipanglutos o anaa sa disbentaha tungod sa diskriminasyon, tungod sa kustombre o kultura o nasyunalidad o edukasyon o ekonomikanhong mga kahimtang.
Isip mga sulugoon sa Dios kinsa dunay kahibalo ug mga responsibilidad sa Iyang talagsaong plano sa kaluwasan, kinahanglan nga magdali kita sa pagpangandam sa atong mga kinaiya ug atong mga lihok—sa simbahan ug sa personal—nga talikdan ang tanang personal nga diskriminasyon. Sama sa gisulti ni Presidente Russell M. Nelson human sa among bag-o lang nga miting kauban sa nasyunal nga mga opisyal sa National Association for the Advancement of Colored People: “Naghiusa kami sa pagdapit sa tanang katawhan, mga organisasyon, ug [mga] gobyerno sa paglihok uban ang mas dakong kamabination, sa pagwagtang sa diskriminasyon sa tanang matang.”1
Bisan kon maghiusa kita sa pagwagtang sa mga kinaiya ug mga buhat sa diskriminasyon, angay natong hinumduman nga ang Simbahan wala magmahukmanon sa pagpabuhat sa pihong mga lagda nga i-insister ang mga rekisito sa Ginoo kabahin sa katakus sa pagsulod sa templo. Gipamahayag sa Ginoo nga ang pagtuman sa mga pakigsaad ug sa mga sugo usa ka mahinungdanong rekisito aron matagamtam ang sagradong mga panalangin. Ang bisan unsang pagpangahas sa pagpapas sa balaang mga rekisito alang sa kinabuhing dayon ug sa mahangturong mga pamilya susama ra sa paninguha nga maestablisar ang plano ni Satanas nga “ang tanan maluwas.” Kitang mga mortal misalikway na sa plano ni Satanas didto sa atong premortal nga kinabuhi. Mipili kita sa plano sa atong Langitnong Amahan, nga naghatag og kagawasan sa pagpili ug pagtuman sa mahangturong mga pakigsaad ug mga sugo nga sa patas nga paagi magamit sa tanan. Ang pagkapatas sa Dios wala magpasabut nga patas nga sangputanan sa tanan, apan patas nga oportunidad alang sa tanan.
IV.
Ang atong tumong niini nga programa sa anibersaryo mao ang pagsaulog sa ika-40 nga anibersaryo sa pagpadayag mahitungod sa pagkapari pinaagi sa pagtan-aw sa unahan. Sa atong paghimo niini, ipahayag nato ang espesyal nga pasalamat alang sa talagsaon natong mga miyembro nga naggikan sa African nga kaliwat, ilabi na sa atong mga miyembro nga African-American kinsa mipadayon pinaagi sa pagtuo ug kamatinud-anon latas sa malisud nga kapanahunan sa transisyon sa nagkahanap nga diskriminasyon. Karon naghiusa kita sa pagtutok sa atong atensyon ngadto sa mahimayaong epekto niadtong 1978 nga pagpadayag sa pagpanalangin sa mga anak sa Dios sa tibuok kalibutan. Sumala sa gipamahayag sa atong mapanagnaong mga lider nianang higayuna:
Ang Ginoo karon mipadayag sa iyang kabubut-on alang sa panalangin sa iyang tanan nga mga anak ngadto sa tibuok bahin sa yuta kinsa mopatalinghug sa tingog sa iyang tinugyanan nga mga sulugoon, ug pag-andam sa ilang mga kaugalingon aron sa pagdawat sa matag panalangin sa ebanghelyo.”2
Karon gipangtukod na ang mga templo sa daghang kanasuran alang sa pagpanalangin sa mga anak sa Dios sa duha ka kilid sa tabil. Diha sa yuta ug sa langit, dungan kitang nagmaya. Usa kini ka bahin sa atong pagpangandam alang sa Iyang Ikaduhang Pag-anhi kinsa namahayag pinaagi sa propeta sa Basahon ni Mormon nga “siya walay gisugo nga sila dili moambit sa iyang kaluwasan” (2 Nephi 26:24) ug kinsa namahayag pinaagi sa modernong propeta nga “kon kamo dili magkahiusa kamo dili akò” (D&P 38:27).