3 ka Butang nga Hinumduman kon Mobati ka nga Ikaw Napakyas

Ni Leah Barton

Ang tagsulat nagpuyo sa New Mexico, USA.

Tanan kita gustong mas momaayo og gamay, apan lisud ang pagkahibalo kon asa magsugod.

Sa kasagaran maghunahuna ko kon ang akong mga paningkamot sa pagkamasulundon nakakab-ot ba sa usahay daw imposibling mga sumbanan sa pagkahingpit. Kanunay kong maghunahuna og mga butang nga akong mahimo sa mas maayong paagi, sama sa paggahin og dugang nga oras sa pagbasa sa akong mga kasulatan o gani sa pagpraktis og dugang nga pagkontrolar sa akong kaugalingon kon moagi na ko sa ice cream dapit sa baligyaanan og pinakaging nga mga pagkaon.

Daw dili kaayo kini dako nga mga problema, apan unsaon man nako sa pagkahibalo kon unsaon sa pagpalambo, ilabi na kon maglisud ko sa pagpugong inig agi nako dapit sa may nagtinda og rocky road nga ice cream? Ug unsa ang mahimong tinuod nga kalainan sa akong kinabuhi kon mas magmasulundon ko?

Ang pagsunod kang Jesukristo dili lamang paglakip sa paghimo og dagkong mga kausaban sa managlahing higayon. Sigun sa gitudlo ni Elder Larry R. Lawrence sa Seventy, “Mianhi kita [sa yuta] aron magkat-on ug molambo hangtud nga mahimo kitang balaan o mahingpit diha ni Kristo. …

“… Samtang nagbiyahe kita subay sa higpit ug pig-ot nga dalan, ang Espiritu padayon sa paghagit nato sa pagkahimong mas maayo ug sa pagpadayon.”¹

Ang matag paningkamot nga atong gihimo nga mas momaayo og gamay mopalambo sa atong kinabuhi. Aniay tulo ka pamaagi nga nakatabang kanako nga mas momaayo og gamay sa matag adlaw.

1. Maghinulsol Kada Adlaw

Sama nga dili nato makab-ot ang pagkahingpit nga wala ang Manluluwas ug ang Iyang Pag-ula, dili kita makapalambo sa atong kamasulundon nga wala ang paghinulsol. Si Stephen W. Owen, Kinatibuk-ang Presidente sa Young Men mitudlo, “Mahimong kita ray mosulay og usab sa atong kinaiya, apan ang Manluluwas lamang ang makatangtang sa mansa ug mopagaan sa atong palas-anon, aron makapadayon kita sa dalan sa kamasulundon uban sa pagsalig ug kalig-on.”² Kon makakita ka og sayop sa imong kaugalingon nga gusto nimong usbon, dad-a kini ngadto sa Ginoo pinaagi sa pag-ampo.

2. Iprayoridad ang pagpakig-uban sa Espiritu

Ang pag-ila sa kaugalingon nakong mga sayop lisud—sa kasagaran dili ko makahibalo asa ko magsugod. Pwede kitang mag-ampo aron mahibalo unsay angay natong usabon niining panahona. Si Elder Lawrence mitudlo, “Ang Espiritu Santo mohatag gayud sa haum nga tambag. Usa Siya ka matinuoron nga kauban ug mosulti nato sa mga butang nga wala mahibaloi sa uban o walay kaisug sa pagsulti.”³ Bisan og wala kinahanglana nga maghulat pa kita alang sa mga pag-aghat aron mas momaayo, ang Espiritu motabang kanato sa paghimo og prayoridad.

3. Pagpatubo sa Espiritwal nga Kamasaligon

Padayon akong natingala sa kadak-on sa panalangin sa Langitnong Amahan kanako sa akong paningkamot sa pagtuman sa mga sugo. Mobati ko og igong pagtubo sa kalinaw ug kamasaligon sa matag higayon nga akong ipataas og gamay ang sumbanan. Si Presidente Russell M. Nelson misaad, “Samtang kamo magpadayon nga magmasulundon, … pagatagaan kamo sa kahibalo ug pagsabut nga inyong gipangita. Ang matag panalangin sa Ginoo alang kaninyo—gani ang mga milagro—mosunod.”⁴ Ang pagka-mas masulundon dili lang mopabati kanimo og mas maayo mahitungod sa imong kaugalingon ug sa imong mga desisyon, apan moabli usab kini og dugang nga mga oportunidad alang sa Ginoo nga makapanalangin kanimo sa mga paagi nga wala nimo paabuta.

Nakaila ang Langitnong Amahan sa atong mga kasingkasing, ug Iyang maila ang matag paningkamot nga atong himoon sa pagkamasulundon. Wala Siya maglaum nga ugma dayon hingpit na kita. Ang pagpaningkamot sa paghimo og mas maayo og gamay matag adlaw—pagminus man sa ganahan kaayong lamian nga ice cream o sa paggahin og mas daghang panahon sa mga kasulatan—makatabang kanato sa pagkamatikud nga ang tanang ang-ang sa pag-uswag mga bililhon og mahimo rang kab-uton.