Mga Pagpamalandong
Usa ka Bombilyang Pula nga Nag-inusara
Ang tagsulat nagpuyo sa Oregon, USA.
Usa ka yanong adorno sa Christmas tree nagpahinumdom kanako kon unsa gayud ang ipasabut sa Pasko.
Imahe gikan sa Getty Images
Ang Pasko dili Pasko. Bisan og naningkamot ko nga magsadya pinaagi sa mga kanta sa pasko nga nagtukar sa palibut, giablihan nako ang mga tipiganan dala ang kasubo. Ang garapon sa cookie nga porma og snowman nagpahinumdom lang nako nga wala na koy tawo nga malutoan. Ang figurine nga Santa daw nag-ingon nga gamay ra kaayo ang rason nga magbitay ko og nga medyas, ug ang peppermint nga stripe nga mga papel nga pangputos nagpahinumdom nako nga ang kabuntagon dili makadala sa mga tingog sa mahinamong kabataan.
Niining tuiga ang among kinamanghuran milakaw para sa kolehiyo, ug ang among balay mabati nga subo ug hilum. Gipili lang nako ang dili Santa nga mga dekorasyon ug gipamalik og sulod ang tanan sa mga karton niini.
Samtang naa sa lungsod ang akong bana, giadornahan nako ang christmas tree nga ako ra. Ang akong umagad nga babaye nag-post sa online og mga litrato sa akong mga apo nga nanab-it og mga adorno sa ilang christmas tree, ug ang akong kasingkasing nangandoy sa mga kagahapon. Naghunahuna ko sa unsang paagi ang panahon kalit ra kaayong milabay. Sa unsang paagi nanagko dayon ang akong mga anak? Samtang naghunahuna ko, miduko ko sa bombilya nga diha sa akong kamot. Usa kadto ka bombilyang pula nga nag-inusara.
Akong gisusi ang kolor, pula kaayo nga kolor. Krimson. Akong gianinaw ang kayano sa unsay nahibilin sa mga dekorasyon: diyutay nga dekorasyon sa pagkatawo, usa ka pasungan nga hinimo gikan sa mga stick sa popsicle, ug usa ka dekorasyon nga NOEL sa bulawan nga mga letra. Miluha ang akong mga mata. Pula ang bombilya—pula sama sa maulaong dugo sa Manluluwas.
Akong gihunahuna kon sa unsang paagi nga kanunay may kalabutan para nako ang mga dekorasyon, mga ginunting nga cookie, ug ang kasadya sa mga bata atol sa buntag sa Pasko ngadto sa unsay nagpalipay kanako atol sa Kapaskohan. Dayon naghunahuna ko mahitungod sa akong mga anak ug sa ilang mahangturong mga pamilya. Akong gihunahuna ang tanang kamaya nga akong nasinati sa akong pamilya ug ang kamaya nga gisinati nila sa ilang kaugalingon. Namalandong ko sa unsang paagi ang bata nga naghigda sa pasungan mihimo niini nga posible. Ang katam-is sa kainit mibutho sa akong kasingkasing samtang akong gihinuktukan ang gasa sa Manluluwas—nga dili lang para nako apan sa tanang katawhan.
“Apan ang manolunda miingon kanila, Ayaw na kamo kalisang; kay tan-awa, gidad-an ko kamog maayong balita sa dakong kalipay nga alang sa tanang mga tawo” (Lucas 2:10; emphasis gidugang).
Samtang padayon nakong giadornohan ang christmas tree, akong gipamalandungan ang mapaubsanong pagkatawo ug kinabuhi ni Jesukristo. Mianhi Siya sa pag-ayo sa nasakitan nga kasingkasing, lipayon ang nagbangutan, hupayon ang nanagsubo, magdala og kalinaw sa imperpeksyon, ug paghatag og kalooy sa mga nanag-antus. Natawo Siya ug namatay aron kita mabuhi uban Kaniya sa gingharian sa atong Amahan sa makausa pa. Mianhi Siya aron ang tawo makahibalo sa tinuod nga kalipay. Ang akong kasingkasing midako ug akong nakita ang kalipay diha kang Kristo tungod kay si Kristo mao ang Pasko.