”Unsay Imong Gusto nga Among Buhaton?!”

Michael Magleby

Direktor sa Pagpalambo sa Kurikulum

Samtang ang grupo sa pagpalambo sa kurikulum sa Simbahan mihangyo sa mga miyembro sa pag-testing sa bag-ong Dali, Duol Kanako nga kurikulum alang sa 2019, kasagaran namong nadungog kini nga pangutana, kauban sa mga komentaryo sama sa: “Sa una nagtuo ko nga, ‘Binuang kini!’ Wala ko kasiguro kon magsilbi ba kini.” Apan kining nag-unang mga kabalaka anam-anam nga napulihan sa pagkumpirmar nga ang “atong pagtuon sa kasulatan hingpit nga nausab” o “Kini nagsilbi!”

Nganong ang ilang mga kasinatian importante man kanimo? Tungod kay ang bag-ong kurikulum para man kanimo ug sa imong pamilya diha sa imong panimalay ug dili lang para sa imong magtutudlo sa simbahan.

Sigun sa gisugyot sa Unang Kapangulohan, kini nga isyu niining bulana nagsuhid sa mga baruganan nga nagpaluyo niining pinakabag-o nga hugna sa kurikulum nga Dali, Sunod Kanako—nga susama ra gayud sa giusab nga kurikulum sa kabatan-onan nga gipaila niadtong 2013, Pagtudlo sumala sa Pamaagi sa Manluluwas sa 2016, ug sa Melchizedek Priesthood ug Relief Society nga kurikulum nga gisugdan pagka-2018.

Sugod sa pahina 20, si Elder Jeffrey R. Holland, kinsa mihatag og giya sa buhat sa pagpalambo sa kurikulum, naghatag og mga maayong panabut nga kon gamiton makausab kanato sa talagsaon ug sa mahangturong mga paagi. Dili lang kini basta usa ka kurikulum apan usa ka pamaagi sa inadlaw nga pagkat-on ug pagsunod sa ebanghelyo.

Dihang nagtan-aw ko sa mga propeta, mga manalagna, ug mga tigpadayag nga midumala sa pagpalambo niining bag-o, nakasentro sa panimalay nga suportadong kurikulum sa Simbahan, natingala ko sa pagkahaum niini nga kalihokan sa Simbahan padulong sa dili kaayo lisud nga pamaagi sa pagpakabuhi sa ebanghelyo, nga nagdapit kanato sa paghunahuna sa mas dakong responsibilidad alang sa atong personal nga espirituhanong paglambo. Kon buhaton nato kini, kumbinsido ako nga samtang madawat nato ang mas dakong kahayag ug kamatuoran ug ang atong kapasidad sa pagsunod kang Jesukristo ug pagbiya sa butang nga dautan molambo (tan-awa sa D&P 93:29–40), nga magdala og kalinaw sa atong kinabuhi ug kaayohan sa kalibutan.