Katie ug Quincy
Ang mga tagsulat nagpuyo sa Utah, USA.
Si Quincy sa kasagaran motabang ni Katie. Apan karong gabhiona, si Katie gustong motabang ni Quincy!
“Ang usa ka higala mahigugma sa tanang panahon” (Proverbios 17:17).
Si Katie ganahang mokanta. Ganahan siyang mosayaw. Apan labaw sa tanan, ganahan siya sa mga adlawng Dominggo! Mao kanang adlawa nga makita niya ang iyang higalang si Quincy.
Si Katie dunay Down syndrome. Usahay sa simbahan malibug siya ug dili kahibalo unsay buhaton. Apan kahibalo siya nga anaa si Quicy nga motabang niya.
Gunitan ni Quincy ang kamot ni Katie ug kuyugan siya sa paglakaw ngadto sa Primary. Usahay dili mahimutang si Katie atol sa panahon sa pagpakigbahin, ug gakson siya ni Quincy. Kanunay kining makatabang ni Katie nga mokalma. Human sa panahon sa pagpakigbahin, tabangan ni Quincy si Katie sa pagpangita sa iyang klase. Gihigugma ni Katie si Quincy.
Usa ka adlaw nahibaloan ni Katie nga dunay subo nga nahitabo sa pamilya ni Quincy. Ang magulang nga lalaki ni Quincy nga si Cory namatay! Nasayud si Katie nga maguol kaayo ang iyang higala. Nasayud siya nga pinangga kaayo ni Quincy ang iyang magulang nga lalaki.
Gisultihan ni Mama si Katie nga karong gabhiona ang mga tawo mangadto sa simbahan aron ipakita sa pamilya ni Quincy nga gihigugma sila. Dayon ugma ilubong si Cory.
“Gusto ka bang moadto sa simbahan kuyog ni Papa ug nako karong gabii?” Nangutana si Mama ni Katie.
Miyango si Katie. Gusto siyang mosulti ni Quincy nga siya iyang gihigugma!
Gitabangan ni Mama si Katie sa pagsul-ob og nindot nga mga sinina. Dayon nangadto sila sa simbahan.
Sa ilang pag-abut didto, nakakita si Katie og daghan kaayong tawo. Nakaila siya sa uban kanila sa Simbahan. Nakita niya ang iyang bishop. Nakita niya ang iyang titser sa Primary. Apan wala siya makakita sa iyang higala.
“Ma, asa si Quincy?” Nangutana si Katie.
Wala makahibalo si Mama.
“Nganong di man ta mangutana?” Miingon si Mama.
Sa kasagaran si Katie dili ganahang makigsulti sa daghan kaayong tawo. Apan karong gabhiona kinahanglan nga iyang makit-an si Quincy. Mibati og kaisug si Katie. Miduol siya sa bishop.
“Nagsubo si Quincy. Kinahanglang makit-an nako si Quincy!” giingnan niya ang bishop.
Mipahiyum ang bishop ug gikuha ang kamot ni Katie. “Kon mao atong pangitaon si Quincy.”
Nagkuyog, ang bishop, si Mama, ug si Katie milibut sa gambalay sa simbahan. Sa katapusan ila siyang nakit-an! Naglingkod si Quincy sa pikas suok. Guol kaayo siyang tan-awon.
Miduol si Katie sa iyang higala ug iya siyang gigakos. Naghunahuna siya sa dakong kamingaw ni Quincy sa iyang igsoon.
“Walay kaso, Quincy. Amumahan ni Jesus si Cory,” miingon si Katie. Mainampingon niyang giapuhap ang buhok ni Quincy.
Misugod si Quincy sa paghilak. Gigakos siya ni Katie ug mas hugot.
“Walay kaso,” miingon si Katie. “Amumahan ni Jesus si Cory.”
Nagsigi og hilak si Quincy. Padayon lang nga gigakos ni Katie ang iyang higala. Pagkataud-taod, nahilom na si Quincy. Nagbakho gihapon siya, apan dili na kusog ang hilak. Mihangad siya kang Katie.
“Salamat Katie,” miingon siya. “Eksakto ka. Amumahan ni Jesus ang akong igsoon.”
Nalipay si Katie nga nakatabang siya sa iyang higala nga moarang-arang ang pagbati. Gihigugma niya si Quincy!
Mga higala nga may mga Kakulian sa Panglawas
Ang ubang mga kakulian magpalisud sa lawas sa pagtrabaho. Ang ubang mga kakulian magpalisud sa utok sa pagtrabaho. Ang ubang tawo may kakulian nga nakaapekto sa ilang utok ug sa ilang lawas. Bisan sa unsang kahimtang, ang tanang bata mahinungdanon ug hinigugma nga anak sa Dios!
Kon may ikatagbo ka nga tawong may kakulian sa panglawas:
Ayaw …
-
Pagtutok, ipunting imong tudlo, o paghagawhaw bahin kanila.
-
Sila pasagdi.
-
Sila bugal-bugali.
-
Sila tawaga og bati nga ngalan.
Buhata ang …
-
Pagtimbaya ug pagmabination.
-
Pagpangutana sa binuotan nga paagi.
-
Pagpanalipud kanila kon bati ang buhaton sa uban.
-
Hinumdumi nga anak sila sa Dios, sama kanimo!