Pagserbisyo diha sa Simbahan
Milambo gumikan sa Pagserbisyo
Ang mga tagsulat nagpuyo sa Utah, USA.
Nadasig kami nga ang among bag-ong mga miyembro sa ward mahatagan dayon og mga calling aron molambo sila pinaagi sa pagserbisyo.
Ang Ikapitong Branch sa Kaohsiung sa Taipei Taiwan Temple pagka-Disyembre 2001.
Niadtong 2000 gitawag kami nga moserbisyo isip presidente sa branch ug presidente sa Primary sa kinagamyang unit sa Kaohsiung Taiwan Stake. Duna kami mga 20 ka tawo sa sakrament miting, lakip sa among bag-o pang pamilya, upat ka aktibong mga elder, ug mga misyonaryo. Wala madugay nakapadala kami og duha ka elder sa mga misyon, misalig nga pun-an ra sa Ginoo ang among branch.
Samtang nagtrabaho kami sa among branch, among nahinumduman ang tambag ni Presidente Gordon B. Hinckley (1910–2008) nga ang matag kinabig nagkinahanglan og “usa ka higala, usa ka responsibilidad, ug pag-amuma pinaagi ‘sa maayo nga pulong sa Dios.’”1 Nadasig kami nga ang among bag-ong mga miyembro sa ward mahatagan dayon og mga calling aron molambo sila pinaagi sa pagserbisyo. Ang mga misyonaryo mipaila kanamo ngadto sa matag investigator, ug sulod sa duha ka semana sa matag usa sa ilang pagpabunyag, nakadawat sila og calling. Napalambo nila ang panaghigalaay samtang nagserbisyo sila kauban sa ubang mga miyembro.
Sulod sa usa ka bulan, ang matag bag-ong nabunyagan nga brother nakadawat sa Aaronic nga Pagkapari, ug ang matag usa mipanalangin ug mipasa sa sakrament. Giandam usab namo sila sa pagdawat sa Melchizedek nga Pagkapari para sa sunod nga komperensya sa stake.
Ang bag-ong mga elder gitudloan unsaon sa paghimo sa mga ordinansa, ug dayon kini nga mga elder mitudlo sa mas bag-ong mga elder. Mituo kami sa pagkat-on pinaagi sa pagtrabaho ug nga mapabilin ang nakat-unan pinaagi sa pagtudlo. Ang mga miyembro sa branch responsable sa pagkahimong modelo ug paggiya, pagtudlo, ug pagbansay, ug pagpaluyo ug pagsuporta sa usag usa.
Among gigamit ang home ug visiting teachers, mga family home evening, mga kalihokan sa ward, ug mga potluck [pagdala og mga pagkaon] sa pag-fellowship sa bag-ong mga kinabig. Giamumahan sila pinaagi sa pulong sa Dios sa adlawng Dominggo ug sa adlaw sa semana nga mga pang-relihiyon nga instruksyon. Ang institute mitubo gikan sa 2 ngadto sa 25 ka mga estudyante. Aron madugangan pa ang pag-amuma sa among gamay nga branch, motambong kami sa Taipei Taiwan Temple matag bulan—10 ka oras nga balikan nga biyahe sa bus. Sa kasagaran, ang among stake maglisud og puno sa ikaduhang bus para sa templo. Samtang mitubo ang among branch ug ang mga pamilya nangandam alang sa ilang mga panalangin sa templo, nagtakda kami og tumong nga among mapuno ang kaugalingon namong bus. Kaduha nianang una nga tuig, samtang ang uban sa stake nakapuno og usa ka bus sa templo, ang among gamay nga branch nakapuno sa ikaduha nga bus. Wala madugay, ang stake mihangyo nga pun-on sa matag ward ang usa ka bus sa templo pinakaminus kausa sa usa ka tuig.
Sa pagka-ikaduhang tuig, mitaas ang among retensyon sa mga kinabig gikan sa 30 porsyento ngadto sa kapin sa 90 porsyento, ug ang among mga miting sa sakrament mitubo ngadto sa mga 100 ka tawo lakip ang 25 ka aktibong mga elder. Nahimong ward ang among branch, ug ang among karaang gambalay giusab nga gihimong bag-o nga kapilya.
Ang kinagamyang branch nahimong kinalig-unang ward sa stake tungod kay ang matag kinabig gipanalanginan og mga higala, mga calling, ug pag-amuma pinaagi sa pulong sa Dios.