Pagtukod og mga Taytayan
Mga siglo ang milabay, usa ka mapugsanon nga abogado nangutana sa Manluluwas:
“Magtutudlo, unsa man ang dakong sugo sa kasugoan?
“Si Jesus miingon ngadto kaniya, Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.
“Mao kana ang dako ug unang sugo.
“Ug ang ikaduha sulosama ra, nga mao kini, Higugmaa ang imong silingan sama sa imong kaugalingon.
“Niining duha ka mga sugo nagasukad ang tibuok nga kasugoan ug ang mga propeta.”1
Usab niadtong 1831, kini nga instruksyon gipadayag ngadto kang Propeta Joseph Smith, dihang ang Ginoo miingon, “Ug tuguti nga ang matag tawo motamud sa iyang igsoon sama sa iyang kaugalingon, ug magbaton og hiyas ug pagkabalaanon sa akong atubangan.”
Dayon, pinaagi sa paghatag og gibug-aton, midugang Siya, “Ug usab Ako moingon nganha kaninyo, himoa nga ang matag tawo motamud sa iyang igsoon sama sa iyang kaugalingon.”2
Sa tunga-tunga sa panahon ug usab sa ulahing mga adlaw, gipasabut og maayo sa Ginoo ang Iyang mahinungdanon nga doktrina mahitungod sa patas nga oportunidad sa Iyang mga anak. Ug si Presidente Oaks mipahinumdom kanato bahin niini nga pagtulun-an gikan sa Basahon ni Mormon: “[Ang Ginoo] dili maglimud kang bisan kinsa nga moduol ngadto kaniya, itum ug puti, ulipon ug gawasnon, lalaki ug babaye; … ang tanan managsama ngadto sa Dios.”3
Sa matag kontinente ug tabok sa tanang isla sa dagat, ang matinud-anon nga katawhan gipangpundok ngadto sa Ang Simbahan ni Jesukristo sa mga Santos sa Ulahing mga Adlaw. Ang panagkalahi sa kultura, pinulongan, pamayhon, kaliwat, ug nasyunalidad molubad ngadto sa pagkawalay kahulugan kon ang tawong matinud-anon mosulod sa dalan sa pakigsaad ug moduol sa atong pinalangga nga Manunubos.
Sa katapusan, atong maamguhan nga ang pagkasabut lamang sa tinuod nga Pagkaamahan sa Dios ang magdala og hingpit nga pagdayeg sa tinuod nga panag-igsoonay sa mga kalalakin-an ug sa tinuod nga panag-igsoonay sa kababayen-an. Kana nga pagsabut modasig kanato uban ang maayo kaayong tinguha sa pagtukod og mga taytayan sa kooperasyon imbis mga paril sa segregasyon.
Akong pag-ampo ug panalangin nga akong ibilin ngadto sa tanang naminaw nga kita makabuntog sa bisan unsang mga palas-anon sa diskriminasyon ug maglakaw nga matarung uban sa Dios—ug sa usag usa—sa hingpit nga kalinaw ug panaghiusa. ◼