Paghimo sa Imong Kinabuhi nga usa ka Makapadasig sa Kalag nga Panaw sa Personal nga Paglambo
Ni Elder Jeffrey R. Holland
Sa Korum sa Napulog Duha ka mga Apostoles
Ang pagkat-on, pagpakabuhi, ug pagtudlo sa ebanghelyo anaa sa sentro sa paglambo padulong sa atong balaan nga potensyal.
Mga paghulagway gikan sa Getty Images
Pagkakulbahinam nga panahon nga mahimong miyembro sa Ang Simbahan ni Jesukristo sa mga Santos sa Ulahing mga Adlaw! Kon maghunahuna ko mahitungod sa bag-o lang nga mga kalamboan sa gingharian sa Dios, daw maklaro nga gidala kita sa Dios sa usa ka makapadasig nga panaw nga anaa ang kabungturan ug mga walog ug mga talan-awon nga makatingala kaayo nga lisud natong mahanduraw hangtud nga kita mokatkat og diyutay ug maanaa na kini sa atong atubangan.
Sa milabay nga tuig lang, nanamilit kita sa pinalangga natong propeta ug sa mahigugmaong paagi mipaluyo og bag-o. Nakakuha kita og bag-ong pamaagi sa mga miting sa Relief Society ug sa korum sa Melchizedek Priesthood, inubanan sa mas dakong pagpasabut mahitungod sa pagpanambag alang sa pagtuman sa buluhaton sa Ginoo. Sa sama niana nga diwa, nakita nato nga gidala sa Ginoo ang mga high priest ug mga elder ngadto sa usa ka korum ug nasaksihan ang dakong kausaban sa pamaagi sa pagpangalagad sa atong mga tighupot sa pagkapari ug sa mga sister ngadto sa mga anak sa Dios. Kon dili pa kana igo aron kamo matingala, hunahunaa ang bag-ong pahibalo gikan sa Unang Kapangulohan mahitungod sa bag-ong mga kapanguhaan sa pagsuporta sa personal ug sa pamilya nga pagtuon sa kasulatan, inubanan sa katugbang nga mga kausaban sa mga materyal sa Primary ug sa Sunday School—gani wala pa kini maghisgot mahitungod sa padayong mga paglambo sa misyonaryo nga buhat, pagsiksik sa family history, ug buhat sa templo.
Ug sigurado gayud nga may daghan pang moabut. Sigun sa gipamahayag sa atong ikasiyam nga artikulo sa hugot nga pagtuo, “[Kami] nagtuo sa tanan nga gipadayag sa Dios”—mao kana sa kasagaran ang sayon nga bahin. Nagkinahanglan og linahi nga matang sa pagtuo ang “pagsalig nga Siya mopadayag pa og daghan nga dagko ug mahinungdanon nga mga butang kalabut sa Gingharian,” ug dayon maandam sa pagdawat niini, bisan unsa man kini. Kon kita andam, giyahan kita sa Dios ngadto sa mga dapit nga wala nato panganduya nga maadto—nga sama kataas sa atong mga damgo. Ang Iyang mga hunahuna ug Iyang mga pamaagi mas taas kay sa atoa (tan-awa sa Isaias 55:8–9). Sa pagsabut, dili kita lahi kay sa niadtong didto sa Kirtland nga giingnan ni Propeta Joseph Smith, “Wala kamoy mas labaw pa nga nahibaloan kabahin sa mga kapalaran niini nga Simbahan ug sa gingharian kaysa usa ka gamay nga bata diha sa sabakan sa iyang inahan.”1
Gusto Niya nga Mausab ang Atong Kasingkasing
Mao nga, kon molingi man kita sa atong giagian, manghinaot ko nga makita nato ang mas daghan pa kay sa gipang-usab lang nga mga polisiya, bag-ong mga programa, ug giusab nga mga manwal. Ang buhat sa Ginoo kaniadto pa mahitungod gayud sa katawhan, dili sa mga programa. Bisan unsa nga mga kausaban nga Iyang idumala sa usa ka organisasyon o iskedyul o kurikulum, ang Iya gayud nga gipanghinaot nga mausab mao ikaw ug ako. Gusto Niya nga mausab ang atong kasingkasing ug mapalapad ang atong umaabut.
Dili, dili pa nato makita kanang dagko ug importanting mga butang nga anaa sa sunod nga likoanan sa dalan. Apan siguradong may mga ideya kita mahitungod sa katapusang destinasyon:
“Kon maunsa unya kita, kini wala pa ipakita: apan kita nasayud nga sa igapadayag na Siya, kita mahisama Kaniya; kay kita magasud-ong man unya Kaniya sa Iyang pagkamao” (1 Juan 3:2).
“Unsa nga matang sa mga lalaki [ug mga babaye] kamo mahisama? Sa pagkatinuod Ako moingon nganha kaninyo, gani sama nga Ako mao” (3 Nephi 27:27).
“Ikaw makadawat sa iyang kahingpitan, ug mahimaya ngari kanako ingon nga Ako diha sa Amahan; busa, Ako moingon nganha kanimo, ikaw makaangkon og grasya ug dugang pa nga grasya” (D&P 93:20).
Ambut lang kaha ninyo, apan para nako mora og taas kana nga panaw—apan makapadasig! Kana nga balaan kaayo nga tumong, bisan taas man kini, mao gayud ang nakahimong madanihon ug nakapadasig sa gipahiuli nga ebanghelyo. Diha sa kahiladman sa atong mga kalag mao ang usa ka lanog—usa ka panumduman—nga nagsulti kanato nga mao kini ang hinungdan nganong mianhi kita sa yuta. Gidawat nato una sa tanan ang plano sa Langitnong Amahan tungod kay gusto kitang mahisama Kaniya. Nahibalo kita nga usa kadto ka dakong tumong nga dili gayud sayon nga kab-uton. Apan dayag lang nga dili kita matagbaw sa bisan unsang minus kay niini. Gilalang ang atong mga kalag aron motubo, ug gidasig kita gikan kaniadto ug karon sa paghimo sa mao nga panaw.
Pagkat-on ug Pagkahimo
Ang pagtudlo, pagkat-on, ug pagsunod sa ebanghelyo mao ang mahinungdanong mga baruganan nga maoy sentro sa pagtubo padulong sa atong balaan nga potensyal ug pagkahimong sama sa atong Langitnong mga Ginikanan. Usahay kini nga proseso atong gitawag og mahangturon nga pag-uswag. Usahay gitawag nato kini og pagkakabig. Usahay nganlan lamang nato kini og paghinulsol. Apan bisan og unsay atong tawag niini, naglakip kini sa pagkat-on. Miingon si Propeta Joseph Smith, “Kamo kinahanglan makakat-on unsaon nga kamo mismo mahimong mga dios, ug mahimong mga hari ug mga pari sa Dios, … nga makahimo sa usa ka gamay nga pagtubo ngadto-ngadto, ug magsugod sa gamay nga kapasidad ngadto sa pagdako. …
“Kon ikaw mosaka og hagdanan, ikaw kinahanglan magsugod sa ubos, ug motikang sa kada ang-ang, hangtud ikaw moabut sa ibabaw; ug ingon usab niini ang mga prinsipyo sa ebanghelyo—kinahanglan nga ikaw magsugod sa sinugdanan, ug mopadayon hangtud nga ikaw makakat-on sa tanang mga prinsipyo sa kahimayaan.”2
Mao nga atong hisgutan ang mahitungod sa pagkat-on. Tungod kay malingaw ko sa pagtudlo, ganahan ko sa pulong ug sa ideya, bisan og naghunahuna ko nga angayan pa natong ipasabut pa kini og gamay kay sa kasagaran natong gihimo. Alang sa mga katuyoan sa ebanghelyo dili lamang ang pagkolekta og kahibalo ang akong gipasabut, bisan og kana kabahin man niini. Wala usab lamang ako magpasabut sa baliwala nga pagpaminaw sa usa ka lektyur o pagmemorya og mga kamatuoran. Ang akong gipasabut mao ang pagkat-on nga motubo ug mausab, sa panabut nga mosangput sa paglambo, sa pagkahibalo sa kamatuoran, nga moresulta nga mahiduol kita sa Dios nga maoy kamatuoran sa tanan.
Gipakita ni Presidente Russell M. Nelson kon sa unsang paagi magkauban ang pagkat-on ug kining makakabig nga kausaban sa kasingkasing dihang gitudlo niya nga kon “ang espiritu mohatag og konbiksyon sa matinguhaong nangita sa kamatuoran“, nag-awhag kini og pagtuo, nga “makapaagni sa paghinulsol ug pagsunod sa mga kasugoan sa Dios.” Kining importanting mga lamas sa pagkakabig mao ang nagtukmod kanato “gikan sa mga paagi sa kalibutan ngadto … sa mga pamaagi sa Ginoo,” nga “makahatag og dakong kausaban sa kasingkasing.”3
Dili kini mahitungod sa pagkaila sa mga ngalan sa dose ka tribu sa Israel o sa pag-diagram sa pasumbingay mahitungod sa mga kahoyng oliba, bisan og ang paghimo niana mapuslanon man. Kini nga matang sa pagkat-on mao ang mahitungod sa pag-usab sa atong kaugalingon, mahitungod sa pagkalahi (pagka-mas maayo) tungod kay mas nakahibalo kita kon unsay nahibaloan sa Dios.
Klaro kaayo nga ang matang sa pagkat-on nga akong gihisgutan dako ra kaayo aron moarang kini sa lawak klasehanan o itudlo sa 45-minutos nga leksyon. Ang mga kasulatan, mga propeta, ang sanag nga adlaw, mga ting-ulan, mga espirituhanong pag-aghat, ug mga leksyon nga nakat-unan sa matag adlaw natong mga kasinatian ang tanan naghatag og mga oportunidad aron makakat-on kita mahitungod sa Dios ug sa Iyang plano, kay sa pagkatinuod ang “tanang mga butang nagsaksi” Kaniya (Moises 6:63). Sa katapusan madiskubrihan natong tanan nga Siya andam nga motudlo kanato dili lang diha sa simbahan apan bisan asa ug bisan kanus-a—sa dili pormal nga mga gutlo kauban sa atong mga anak ug sa atong mga higala, sa atong mga silingan o sa atong mga katrabaho, sa lalaki o babaye nga atong makita sulod sa bus o sa empleyado nga motabang kanato sa merkado—bisan asa ug bisan kanus-a kita gusto nga magkat-on.
Apan kining tanan nga kamatuoran nga gipaningkamutan sa Dios nga itudlo kanato sa matag adlaw mao lamang ang daghang liso nga gisabud sa batoon nga yuta o kauban sa mga tunok nga pagasunugon o pagalumsan gawas kon sundon nato ang tambag ni Alma sa pag-alima niini pinaagi sa pag-eksperimento sa pulong, o sama sa giingon ni Santiago, sa pagkahimong tigtuman sa pulong ug dili tigpaminaw lamang (tan-awa sa Marcos 4:1–20; Santiago 1:22; Alma 32:27–43). Samtang makakat-on kita sa kamatuoran ug mopili sa pagbuhat niini, motubo ang atong mga pagpamatuod (tan-awa sa Juan 7:17). Dayon, kon ang kamatuoran himoon nato nga bahin ngari kanato pinaagi sa paningkamot nga padayong makasunod niini bisan anaa ang mga hagit, mousab kini kanato ug mas mahisama kita sa Amahan sa kamatuoran.4
Ang Pagkat-on sa Ebanghelyo Nakasentro nga Himoon sa Panimalay
Mao nga moingon kita nga ang pagtudlo sa ebanghelyo, pagkat-on, ug ang pagsunod kinahanglang “himoon sa panimalay ug suportado sa Simbahan.”5 Una, ang panimalay maoy dapit diin kita mogahin sa kinadaghanan sa atong panahon—labing siguro mas daghang panahon kay sa igahin diha sa simbahan (bisan sa mga bishop nga daghan kaayog buluhaton). Dili kita makalaum nga makalahutay og dugay ang atong pisikal nga lawas nga mokaon ra og kausa sa usa ka semana—bisan og maayo kaayo kini nga pagkaon. Sa samang paagi, kon ang usa ka oras nga klase sa Simbahan, bisan ang nindot kaayo nga klase sa Simbahan, mao ang pinakaunang dapit sa atong “pagbusog sa pulong ni Kristo” (2 Nephi 31:20), niana namiligro kita sa kakulang sa espiritwal nga pag-alima.
Ikaduha, ang panimalay mao ang lawak klasehanan ug laboratoryo, diin ang pagkat-on ug ang pagsunod sa ebanghelyo maayo kaayong pagkasumpay nga daw dili kini mabantayan. Kining buhi nga laboratoryo sa kasinatian dayag lang nga dili mamugna sa sulod sa lawak klasehanan lamang.
Tingali ang pinakaimportante, nga ang panimalay mao—o mahimo—nga usa ka lanog nga tingog sa langit,usa ka pahinumdom sa mahangturon nga tumong nga atong buhaton sa pag-anhi dinhi. Sama sa gihimong paghan-ay niini ni Presidente Henry B. Eyring, Ikaduhang Magtatambag sa Unang Kapangulohan: “Bisan og ang kalibutanong mga pamilya layo pa sa pagkahingpit, gihatagan nila ang mga anak sa Dios sa labing maayong higayon nga moanhi sa kalibutan uban sa bugtong gugma dinhi sa yuta nga popareho sa unsay gibati nato didto sa langit—gugma sa ginikanan. Ang mga pamilya mao ang labing maayong paagi sa pagpreserbar ug pagpasa sa moral nga mga hiyas ug baruganan nga labing siguro modala kanato balik sa presensya sa Dios.”6
Mga ginikanan ako ba nakapahadlok kaninyo? Hinaut nga wala. Kini nga pagpasabut mahitungod sa pagtudlo, pagkat-on, ug pagpakabuhi sa panimalay dili tuyo nga mahimong dugang nga palas-anon para sa mga indibidwal ug mga pamilya. Daw sa sukwahi, sa tinuod lang—among panghinaot nga pinaagi sa pag-ila ug pagsuporta sa inyong mga paningkamot diha sa panimalay, kami sa pipila ka paagi makapagaan sa palas-anon nga inyong gipas-an didto. O, mas maayo pa, tingali kami makapalig-on kaninyo aron mahimong sayon ang pagpas-an [niini].” (Mosiah 24:15).
Pagsuporta sa Pagkat-on sa Ebanghelyo diha sa Simbahan
Kining gipalapad nga panglantaw sa paghangop sa ebanghelyo sa gawas sa lawak klasehanan wala magpasabut nga ang lawak klasehanan dili importante. Siyempre maoy atong panghinaot nga ang makahuluganong pagkat-on mahitabo gihapon sa simbahan. Gani, ang pangsuporta nga tahas sa mga klase sa Simbahan importante kaayo alang sa pagkat-on nga gihimo sa panimalay. Apan aron makatabang sa pag-usab og mga kinabuhi, ang pagtudlo diha sa simbahan dili pweding mao ray hinungdan sa unsay nanghitabo diha niana nga mga kinabuhi. Kinahanglan nga tukma kini ug gikuha gayud gikan sa mga kasinatian sa mga magtutudlo ug sa mga tigkat-on.
Niana maklaro, nga ang pag-focus sa manwal o sa pisara o sa pagkahanip sa mga lingkuranan o gani sa pipila ka maayo kaayong mga pangutana sa diskusyon posibling dili maoy eksakto nga focus. Ang tinagsa-tagsang anak sa Dios ug ang iyang mahangturong paglambo kinahanglan nga maoy tuyo sa atong paningkamot ug pagbati. Naningkamot kita sa pagtandog og mga kinabuhi, ug mohikap lamang kita og mga lingkuranan o audiovisual nga mga ekipo kon makatabang kana kanato sa pagtandog og kinabuhi. Sa pag-summarize sa gisulti sa Manluluwas, unsay maangkon sa usa ka magtutudlo o sa klase kon nagtanyag man kini sa kinamaayuhang doktrinal nga pasundayag sa kalibutan ug makita nga walay usa niana nga doktrina ang motuhop sa kinabuhi ug sa gugma, sa hunahuna ug sa mga pagbati sa tinagsa-tagsang miyembro, sa tawo nga mao gayud ang gusto sa Dios nga luwason ug himayaon?
Ang tinuod nga sukod sa kalampusan dili mag-agad sa kahapsay sa leksyon, giunsa nato sa paghurot ang oras, kon unsa ka daghang pagdayeg ang naangkon sa magtutudlo pagkahuman, o bisan ang kon unsa kadaghan ang mga sakop sa klase nga miapil. Ang kalampusan mag-agad kon unsay mahitabo sa kinabuhi sa tigkat-on. Si Brother Herrero ba nakakita og butang diha sa mga kasulatan sa milabayng semana nga klase nga nakatabang niya sa pagsugakod sa mga hagit nga iyang giatubang? O, kaha, may nahitabo ba sa klase nga mipalambo sa iyang katakus aron nianang semanaha makakita sa mga tubag nga iyang gikinahanglan? Dihang gipaambit niya kana nga kasinatian niining semanaha, nakita ba ni Sister Schmidt ang paglaum ug pagtuo nga iyang gikinahanglan aron motuo nga ang Dios motabang usab kaniya? (Tan-awa sa “You Don’t Get Fit by Watching Others.”)
Tanan kini nagpasabut nga, kon magtutudlo ka, unsay imong makita diha sa usa sa atong bag-o nga mga kapanguhaan sa pagkat-on posibling may pagkalahi kay sa kasagaran nimong makita sa karaan natong mga manwal. Mabantayan nimo nga diyutay ra ang pihong mga instruksyon mahitungod sa unsay buhaton ug unsaon kini sa paghimo. Gituyo kana, alang sa pag-aghat kanimo sa pag-ampo, pagbantay, ug pagkuha gikan sa kaugalingon nimong mga kasinatian ug sa kaugalingon nimong inspirasyon, ingon man gikan sa mga tawo nga imong gitudloan. (Tan-awa sa “Are You Soloing or Leading the Choir?”)
Karon ibutang nato nga ang atong tun-an mao ang Bag-ong Tugon ug ako ang magtutudlo sa Sunday School, wala ko moadto sa klase dala ang walay hinungdang mga ideya mahitungod sa panghitabo sa Mateo 5, dinasig nga mga kinutlo gikan sa maalamong katawhan bahin sa Wali sa Bungtod, ug mamugnaong mga kalihokan kon unsaon sa pagkahimong tighimo og kalinaw, ang tanan gihan-ay ug giorasan aron saktong mahuman sulod sa lima ka minutos sa dili pa matapos ang klase. Kondili, akong gitun-an ug gisunod ang mga baruganan nga naa sa Mateo 5 sama sa akong gilauman nga buhaton sa mga tigkat-on. Ang bugtong kalainan mao nga kini posibling buhaton nako inubanan sa mas daghang paghunahuna ug pag-ampo mahitungod sa matag sakop sa akong klase ug kon sa unsang paagi kini nga mga baruganan mahimong makahuluganon kanila. Dayon, sa klase, ubos sa impluwensya sa Espiritu, giawhag nako sila sa paglig-on ug pagsuporta sa usag usa sa ilang mga paningkamot sa pagtuon ug pagpakabuhi nga nahiuyon sa Mateo 5. Mitabang ko nila nga ilang makita ang mga koneksyon tali sa ilang kinabuhi ug sa bililhong doktrina nga anaa sa mga kasulatan. Labaw sa tanan, nag-ampo ko alang sa inspirasyon nianang gutloa nga ang usa ka kamatuoran mahimo nga pagtuo, nga ang usa ka pangutana mahimo nga usa ka pagsiksik.
Siyempre, sa Primary ang akong papel posibling lahi ra og gamay. Apan ang akong tumong dili aron padayong malingaw ang gagmayng mga bata sulod sa 45 minutos o aron padayon silang maghilom aron akong masulti unsay angay nakong isulti nga walay pagkabalda. Ang akong tuyo mao ang paghimo nilang mga independente nga mga tigkat-on, sa pagtabang nga ilang makita kon sa unsang paagi nabuhong ang ilang kinabuhi pinaagi sa mga kamatuoran sa ebanghelyo, ug pagsuporta sa ilang mga ginikanan—nga maoy ilang pinakaimportanting mga magtutudlo sa ebanghelyo.
Karon, kay napakalitan nako ang mga ginikanan, tingali gihadlok sab nako ang mga magtutudlo. Kon mao, akong ipaniguro kaninyo ang duha ka panghunahuna: (1) Nagtudlo kamo og mga tawo, dili mga leksyon, ug mas nakaila kamo sa mga tawo kay sa bisan unsay posibling mahimo sa manwal sa leksyon. (2) Ang imong personal nga mga paningkamot sa pagkat-on ug pagsunod sa ebanghelyo posibling maoy pinakamaayong pangandam sa pagtudlo sa ebanghelyo ngadto sa uban. Hinumdumi nga ang pinakamaayong paagi sa pagdapit sa Espiritu sa atong kinabuhi—ug diha sa atong pagtudlo—mao ang pagkat-on ug pagsunod sa ebanghelyo sa atong kaugalingon mismo. Ang Espiritu mao ang pinakalabaw nga magtutudlo niini nga Simbahan, ug sa dakong palad, walay limit niana nga impluwensya.
Gimarkahan Niya ang Agianan ug Migiya sa Agianan
Kini ang dako natong tinguha nga ang Ginoo motabang kanato sa pagkab-ot sa bag-ong mga gitas-on sa espirituhanong paglambo pinaagi sa bag-ong mga pamaagi sa pagkat-on ug pagsunod sa ebanghelyo. Pinaagi sa Iyang tabang, atong mapaambit ang ebanghelyo ngadto sa atong mga higala, dili tungod kay gibati nato nga obligasyon kini apan tungod kay ang ebanghelyo usa ka bahin sa inadlaw natong kinabuhi, ug dili nato mabuka ang atong mga ba-ba nga dili makapaambit sa pipila ka mga kamatuoran sa ebanghelyo! Sa kasagaran, ang atong mga higala gikan sa laing mga tinuohan makakita sa nagtubo nga kahayag sa atong kinabuhi ug mangita sa mga misyonaryo—bisan sa dili pa sila makit-an sa mga misyonaryo—aron maangkon sa kaugalingon nilang mga pamilya ang pipila sa ilang nakit-an. Ang mga kaminyoon nga himoon sa templo, mga buhat sa family history, mga gahum sa pagkapari [priesthood] ug mga ordinansa, moral nga kaputli, pag-atiman sa mga kabus—tanan kana maoy bulahang resulta sa maayong pagkakabig nga mga disipulo ni Kristo nga nagkat-on ug nagsunod sa ebanghelyo matag adlaw, uban sa hingpit, tukma, padayong suporta gikan sa mga klase sa Dominggo. Mao kana ang gigiya kanato sa Ginoo, ug tinuod kini nga usa ka makapadasig nga panaw!
Gigamit nato ang mga pulong nga “Pagtudlo sa Pamaagi sa Manluluwas,” apan nanghinaot ko nga dili gayud kini mahimong walay hinungdan nga ekspresyon nga nawad-an sa orihinal nga kahulugan. Sa tinuod lang, ang buot gayud namong ipasabut niini mao nga kita kinahanglang mahisama kang Kristo, isip mga magtutudlo ug mga tigkat-on, nga maningkamot sa pagpaambit sa ebanghelyo sama sa Iyang gihimo. Kahigayunan kini nga makaapil sa mga disipulo, aron makasunod sa mga lakang ni Jesus, nga mangita sa usa nga posibling nawala. Kahigayunan kini nga makakatkat sa Bungtod sa mga Kabulahanan kauban sa mga duso sa katawhan ug makalingkod sa baybayon sa Galilea kauban sa pundok sa katawhan. Kahigayunan kini alang sa tanan kanato nga makahikap sa sidsid sa saput sa Agalon ug mamaayo.
Ganahan ko kanunay niining balaknong mga pulong nga sinulat ni Eliza R. Snow nga usa sa makatandog kaayo nga mga himno sa Simbahan:
Mga kaigsoonan, akong dungog nga ikauban kamo sa paglakaw padulong sa mahimayaong kaugmaon nga giandam sa Amahan sa Langit alang kanato. Nahibalo ako sa inyong mga kasingkasing. Nahibalo ako nga gihigugma ninyo ang Ginoo ug gusto nga mobuhat sa Iyang kabubut-on. Mosaksi ko nga samtang magkat-on kita sa Iyang kabubut-on, samtang pundukon nato ang kahayag ug kamatuoran ug himoon kini nga bahin kanato sa matag adlaw, kana nga kahayag molambo diha kanato, “mag-anam og labaw sa kahayag ug labaw sa kahayag hangtud sa hingpit nga adlaw” (D&P 50:24; emphasis gidugang) kon kita Iya nang ikauban tungod kay mahisama na kita Kaniya.