Mas Momaayo og Gamay Kay sa Kagahapon
Ang tagsulat nagpuyo sa Salta, Argentina.
Kinahanglang ipadayon namo ang pagsunod sa ebanghelyo. Mao kana ang paagi nga si Sergio maamoa pag-usab.
Mga paghulagway pinaagi ni Suzanne Simmons
Dihang nanawag ang iyang presidente sa misyon, hapit na mag-usa ka tuig si Sergio didto. Siya bugtong namong anak nga lalaki, ug siya ang una sa among mga anak nga nakaserbisyo og full-time nga misyon. Ang akong asawa, si Liliana, ug ako mapasigarbuhon kaniya ug sa ehemplo nga iyang gipakita sa iyang duha ka igsoong mga babaye.
Dunay butang kang Sergio nga nahibaloan namong maghimo kaniyang maayo nga misyonaryo. Usa siya ka natural nga lider, malipayon siya ug sinsero, ug makahimo siya sa pagdasig sa uban.
Walay kaso kaniya kon ang tawo miyembro ba sa Simbahan—makighigala siya sa tanan. Ug kon bugal-bugalan siya sa uban tungod sa iyang pagka-Santos sa Ulahing mga Adlaw, dawaton niya kini pinaagi sa maayong pangomedya ug tagsa ra kaayong masilo.
Malipayon kaayo mi dihang nadawat ni Sergio ang iyang mission call para sa Peru Chiclayo Mission. Nagsugod ang iyang pagserbisyo pagka-Nobyembre 20, 2013. Ganahan siya sa iyang misyon. Sa una, sayon ra ang pagsulat kaniya. Apan dihang nanglabay ang mga bulan, nagkinahanglan ko og mas dugang nga panahon sa paghunahuna sa iyang mga sulat ug pagsanong sa iyang espiritwal nga paglambo.
Wala kami kabalaka mahitungod ni Sergio. Naghunahuna kami nga ang natad sa misyon maoy pinakaluwas nga dapit kaniya. Gitawagan kami sa iyang presidente sa misyon pagka-Oktubre 7, 2014.
Wala Gayud Kami Mobati nga Nag-inusara
Gisultihan kami sa presidente sa misyon nga si Sergio ug ang iyang kompanyon nagtudlo og mga investigator mahitungod sa templo ug sa mahangturong mga pamilya. Pagkahuman, dihang si Sergio mihalad sa panapos nga pag-ampo, mihunong siya, sa kalit nawad-an sa panimuot, ug nahagsa sa salog. Nakadawat siya og panalangin ug gidala dayon sa medical center. Natino sa mga doktor nga may mibuto nga ugat sa iyang utok. Walay kahimoan ang pagsulay sa pagluwas kaniya.
Ang balita mipuno diri kanamo og tumang kasubo. Bisan sa among pagbangutan, si Liliana ug ako kinahanglang mobiyahe sa Peru aron kuhaon ang lawas ni Sergio ug ang personal niyang mga gamit. Dili pa kami makahunahuna og klaro, mao nga nagpasalamat kami nga adunay tawo gikan sa Simbahan—sukad sa panahon nga mibiya kami sa among balay hangtud sa among pagbalik—nga mitabang kanamo. Nakadawat usab kami og tabang gikan sa Espiritu Santo, kinsa mihupay kanamo ug mitabang nga kami makasugakod. Wala gayud kami mobati nga nag-inusara.
Lisud ang pagpasalamat sa trahedya, apan nagpasalamat ko sa malumong mga kalooy sa Ginoo kalabut sa kamatayon ni Sergio. Dihang namatay siya, nagserbisyo ko nga bishop, si Liliana nagtudlo og seminary, ug ang among anak nga babaye si Ximena nagserbisyo nga presidente sa Young Women sa ward. Okupado ang among panahon sa pagserbisyo ug paghigugma sa uban, nga mipagamot kanamo sa ebanghelyo. Kon mobiya man si Sergio kanamo, kanunay akong magpasalamat nga gikuha siya sa Langitnong Amahan samtang lig-on ang among pagtuo.
Nagpasalamat usab ako nga mibiya si Sergio niining kinabuhia samtang nagserbisyo sa Ginoo ug samtang anaa sa “pag-alagad sa [iyang] isigkatawo” (Mosiah 2:17). Ang Ginoo mipahayag, “Kadtong namatay tungod kanako dili makatilaw og kamatayon, kay kini matam-is ngadto kanila.”(D&P 42:46).
Gihatagan ako sa Espiritu Santo og daklit nga panglantaw kon unsay gilahutay sa Langitnong Amahan dihang ang Iyang Bugtong Anak namatay alang kanato. Akong naamguhan nga wala akoy bisan unsang katungod nga masuko sa Dios. Nahibalo ang Amahan sa Langit unsay akong gibati. Ang kalinaw miabut kanako nga nagtugot nga akong madawat ang Iyang kabubut-on ug ang tayming sa pagkamatay ni Sergio. Mao usab ang gisinati ug gibati ni Liliana.
“Makapahupay nga mga Pulong”
Na-seal ang among pamilya sa templo niadtong 2005, sa gagmay pa si Sergio ug si Ximena. Si Ruth natawo diha sa pakigsaad sa wala madugay. Sa wala pa siya mobiya sa iyang misyon, si Sergio ang mibunyag kaniya.
Tulo ka adlaw human sa iyang pagkamatay, nagdamgo si Ruth bahin ni Sergio. Gabii kadto sa iyang ikasiyam nga birthday. Nagdamgo si Ruth nga naggunitay silang duha sa pagpanglakaw sa tibuok adlaw ug nga misulti si Sergio og makahupay nga mga pulong ngadto kaniya.
Si Ruth ug Ximena suod kaayo kang Sergio, ug hilabihan ang ilang kamingaw kaniya. Si Ruth padayon gihapon nga nakadawat og kahupayan gikan sa panumduman sa iyang damgo.
Usa ka adlaw samtang nangukay kami sa mga kagamitan ni Sergio, nakit-an nako ug ni Liliana ang iyang mission day planner. Among nabantayan nga diha sa matag panid para sa matag adlaw, gisulatan kini ni Sergio og mga pulong nga “Mas moamaayo og gamay kay sa kagahapon.”
Kadto nga mga pulong wala gayud mawala kanako. Nagpahinumdom kini kanako nga kinahanglan kaming magpadayon sa pagsunod sa ebanghelyo. Mao kana ang paagi nga magkauban kami isip pamilya human niining kinabuhia. Mao kana ang paagi nga si Sergio maamoa pag-usab.
Samtang padayon kami sa lisud nga mga panahon, ang Manluluwas motabang kanamo. Nasayud ko nga kana tinuod, sama nga ako nasayud nga ang Iyang mga saad sigurado. Mao nga nagpadayon kami sa paghupot sa ebanghelyo, ug among gisunod ang ehemplo ni Sergio. Naningkamot kami nga mas momaayo og gamay matag adlaw.