Pag-angkon og Mas Dakong Gahum pinaagi sa Bag-ong Kurikulum

Ni Mackenzie Brown

Departamento sa Simbahan sa Priesthood ug Pamilya

Ang 2019 nagdala og dagkong kausaban sa Sunday School!

Hunahunaa kon ikaw gihatagan og mas dakong gahum sa imong kinabuhi—gahum sa pag-usab, sa paghimo og positibong mga kausaban sa imong kinabuhi, pagbuntog sa mga kalisdanan nga naglibut kanimo. Kana nga gahum—ang gahum sa Dios—kanunay nga anaa pinaagi sa Iyang pulong, apan ang bag-ong mga kausaban sa Sunday School ug Primary gituyo aron makagamit kita niana nga gahum sa inadlaw natong kinabuhi.

Ako si Mackenzie, usa ka young adult ug usa sa mga tigsulat sa bag-ong inisyatibo sa Dali, Sunod Kanako alang sa panimalay, Sunday School, ug Primary. Napanalanginan ako aron makatabang sa pagsulat sa Dali, Sunod Kanako, ug akong nakita ang kalainan, ug ang gahum, nga mabatunan sa kinabuhi sa usa ka tawo pinaagi sa mas epektibong pagtuon sa kasulatan—ilabi na kanako mismo.

Sa una nakong pagkakita sa bag-ong inisyatibo sa Dali, Sunod Kanako, wala ko makasiguro unsay hunahunaon. Usahay usa ka tinuoray nga panglimbasog ang paggahin og panahon nga makabasa sa akong mga kasulatan kada adlaw—bisan og gibati nako ang kalainan ug nakamatikud sa mga panalangin nga akong makuha kon ako regular nga magbasa niini. (Duna ba dihay “mobasa lang og bersikulo aron makaingon nga nakabasa una matulog?) Apan ang pagtuon gayud sa mga kasulatan samtang nagtabang sa pagsulat niini nga materyal nakatudlo kanako sa bili sa (1) dili lang paghatag sa akong kaugalingon og igong panahon sa pagtuon sa mga kasulatan apan usab (2) aron ako makadawat gayud og pagpadayag, alang sa akong kaugalingon kon maningkamot gayud ako sa pagbaton sa Espiritu kon ako magtuon.

Ang pagtrabaho sa bag-ong inisyatibo sa Dali, Sunod Kanako nakahatag kanako og lahi nga oportunidad aron mas momaayo ang pagtuon ug pagpangita sa mga kamatuoran diha sa akong mga kasulatan para sa akong trabaho. Ug samtang daghan sa mga young adult dili makabaton og susamang mga oportunidad, masaligon ako nga ang Dali, Sunod Kanako makahimo niana sa matag usa kanato.

Diha sa matag outline giawhag kita sa pagbasa sa mga kasulatan para sa atong kaugalingon ug sa pagrekord sa atong mga hunahuna, inabagan sa ginagmayng doktrinal nga mga pagtulun-an nga nagtudlo mahitungod sa mga baruganan diha sa mga bersikulo ug nagdapit kanato sa pagpangutana sa atong kaugalingon kon unsay atong mga nakat-unan. Kining yano nga pamaagi sa pagbasa sa mga kasulatan makatabang kanato sa pagkat-on og daghan mahitungod sa mga hilisgutan nga makapainteres kanato ug sa pagpangutana sa atong kaugalingon og mga pangutana nga makatabang sa atong pagpamalandong niana nga mga hilisgutan. Apan pinaagi niini nga inisyatibo, ang tanan naghimo usab niini. Nianang paagiha, kon magkatigom kamo, pwede ninyong hisgutan ang mga kamatuoran ug mga baruganan sa ebanghelyo nga naghimo og kalainan diha kaninyo, ug ang uban pwede usab nga mohimo sa samang butang—nga maghatud kaninyo sa inyong tinguha nga maoy katapusang tumong sa tanan: aron mas mahisama kang Jesukristo.

Ang pagsugod og bag-ong kinaiya sa pagtuon sa kasulatan usa ka proseso, ug posibling lisud ang pagsugod. Apan si Jesukristo makatabang kanimo niini, sa samang paagi nga Siya motabang sa bisan unsang butang. Kon naglisud ka sa pagsugod o sa pagpadayon og usa ka kinaiya sa makugihong pagtuon sa kasulatan, siguroha ang pagduol ngadto Kaniya. Kon kini imong buhaton, ikaw ug ang uban sa imong palibut mapanalanginan og mas dakong tinguha nga makabasa sa Iyang pulong.