”Gibuhat Usab Ninyo Kini Kanako”
Shannon Knight
California, USA
Paghulagway pinaagi ni Allen Garns
Ang among pamilya dunay tradisyon sa Pasko nga manghatag og mga naka-bag nga pagkaon, gwantes, mga kalo, ug ubang kinahanglanon sa mga nanginahanglan. Pagka-2016, ang Gabii sa Pasko bugnaw kaayo sa dapit sa California, USA, nga among gipuy-an. Maayo kaayo ang among pagkaputos, apan nanagkurog gihapon kami!
Samtang nagbiyahe kami padulong sa parke duol sa among balay diin tua didto nagpuyo ang daghang tawo nga walay mga balay, nakakita kami og usa ka tawo nga nagtiku-ku sa gamay kaayong kasilungan dapit sa bus stop, nga nagbukot og karaang habol. Ang akong bana, si Dennis, mipahunong sa sakyanan ug midala sa among anak nga lalaking si Jonathan, kuyog niya aron mohatag sa tawo og usa ka bag nga regalo. Ang among anak nga babaye, si Abbey, ug ako nagpabalin sa sakyanan ug nagtan-aw.
Ang tawo mihangad samtang gitunol ni Dennis ngadto kaniya ang bag. Usa ka dakong pahiyum ang miporma sa nawong sa tawo. Naglamanohay sila ug nagsugod sa pag-istoryahanay. Lahi kini tungod kay sa kasagaran dili man kaayo taas ang pag-istoryahanay.
Human sa pipila ka minutos, mibalik si Dennis sa sakyanan ug giablihan ang luyo sa sakyanan.
“OK ra ba ang tanan?” Nangutana ko.
“Oo,” miingon siya. “Akong ihatag kaniya ang akong parka [baga nga jacket nga may pandong sa ulo]. Mas nagkinahanglan siya niini kay kanako.”
Wala ko makatingog. Nindot gayud kaayo kini nga parka nga nasul-ob lang ni Dennis sa diyutay kaayong mga panahon! Mibalik si Dennis ngadto sa tawo ug gitabangan sa pagsul-ob sa init-init nga parka. Misanag ang panagway sa tawo. Si Dennis ug ang tawo padayon sa pag-istoryahanay.
Daw may nagduso kanako nga makighimamat niining tawhana. Akong giablihan ang pultahan sa sakyanan, ug si Abbey misunod kanako. Mipahiyum si Dennis samtang nagkaduol kami, ug iyang gipaila kanako ang tawo. Akong gitunol ang akong kamot ug gipangutana ang iyang ngalan.
Iyang gidawat ang akong kamot, mainitong mipahiyom, ug mitubag, “Jesús.”
Ang among pamilya padayon nga nakig-istorya, apan wala ko kadungog og daghan human niana. Padayon nakong gihunahuna ang kahulugan niining matam-is nga ngalan sa tawo: Jesús—ang pangalan sa atong Manluluwas. Nianang gutloa, napahinumduman ako sa pagtulun-an sa Manluluwas: “Maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:40). Kadto nga kasinatian hangtud sa hangtud nakausab kanako.