ʻEletā Kelly R. Johnson

Fitungofulu Taki Māʻolunga

‘Oku manatuʻi lelei ʻe ʻEletā Keli R. Sionesoni e ʻaho naʻe ui ai ia ko ha pīsope ‘i hono taʻu 31. ʻI he ʻaho pē ko iá, ne ʻilo ai ʻokú ne puke ʻi he mamatea fakafaʻahitahá (Bellʻs palsy)—ko ha tūkunga ʻoku mamatea pe vaivai e ngaahi uoua ʻi he tafaʻaki ʻe taha ʻo e fofongá.

Ko ha taimi faingataʻa ia, ne ʻikai ngata pē ʻi he taʻe-fakafiemālie mo fakamā tupu mei he tūkungá ni ka koeʻuhí foki ko e lahi hono ngaahi fatongia foʻoú. Ka naʻe hoko e taimi faingataʻa ko iá ko ha tāpuaki.

Naʻá ne pehē, “ʻI he ʻikai ke u ʻilo pe ko e hā hono fuoloa ʻo e tūkungá, naʻá ku fakatupulaki ha manavaʻofa ki he niʻihi fakafoʻituitui kuo mau feʻao mai ʻi he toenga ko ʻeni ʻo ʻeku moʻuí. “Naʻá ku ako ʻoku foua ʻe he kakaí ha ngaahi meʻa faingataʻa mo fakamamahi ʻoku ʻikai ke nau lava ʻo mapuleʻi ʻo uesia ai e ngaahi meʻa ʻoku nau malavá, ongoʻí mo e loto-falalá.”

ʻOku ʻikai ha taimi ʻe taʻefaingamālie ai ke ngāue ʻi he Siasi ʻo e ʻEikí. Naʻe pehē ʻe ʻEletā Sionesoni hangē ko e kau ākonga ʻa e Fakamoʻuí “naʻá na liʻaki leva hona kupengá” (Mātiu 4:20) ke muimui ʻiate Ia, “ko e hā pē ʻoku kole mai ke tau faí, ʻoku tau loto fiemālie ke fai ia.”

Neongo pe ko e fē e feituʻu ʻe ui ia ki ai pe ko hono fāmilí ʻe he ʻEikí, te nau ʻalu mo e loto mo e ʻatamai fiemālie, ʻo kumi ki he leleí neongo pe ko e hā honau ngaahi tūkungá.

Naʻe fanauʻi ʻa Keli Lei Sionesoni ʻi Peleseni Viu, ʻIutā ʻi he ʻaho 16 ʻo Sānuali 1963, kia Hāloti Leimoni Sionesoni ko e Siʻí mo Hēleni Kalakoni Sionesoni. Naʻá ne tupu hake ʻi ʻOkiteni, ʻIutā pea mali mo Telesa Lini Petalamu ʻi he Temipale Salt Lake City ʻi he ʻaho 27 ʻo Māʻasi 1986. ʻOku ʻi ai ʻena fānau ʻe toko nima.

Ne ʻosi ʻa ʻEletā Sionesoni mei he ʻUnivēsiti Uepa Siteití ʻi he 1987, mo hono mataʻitohi BA ʻi he tauhitohí pea maʻu hono mataʻitohi MA ʻi hono puleʻi e pisinisí mei he ʻUnivēsiti Pilikihami ʻIongí ʻi he 1989. Kuó ne ngāue ko ha tokotaha fakatotolo fakatauhitohi maʻá e KPMG International Cooperative pea ngāue kimuí ni ko ha fakatotolo fakatauhitohi mo e hoa pisinisi ʻi he Norman, Townsend and Johnson.

ʻI he taimi ne uiuiʻi ai ʻa ʻEletā Sionesoní, naʻá ne lolotonga hoko ko ha Fitungofulu Fakaʻēlia, pea kuó ne hoko ko ha palesiteni fakamisiona ʻi he Misiona Bangkok Thailand, ʻa ia ne ngāue fakafaifekau taimi kakato aí, pea ko ha palesiteni fakasiteiki, tokoni ʻi ha kau palesitenisī fakasiteiki, aleaʻanga māʻolunga, pīsope, palesiteni ʻo e kōlomu ʻo e kaumātuʻá, taki ngāue fakafaifekau fakauooti, pea mo ha faiako teuteu ngāue fakafaifekau fakasiteiki.