Steven J. Lund

Palesiteni Lahi ʻo e Kau Talavoú

ʻI he hoko ʻa Sitīveni J. Lani ko e Palesiteni Lahi ʻo e Kau Talavoú, kuó ne tali ha fekau toputapu ke tokoni ʻi hono tataki ha kau maʻu Lakanga Taulaʻeiki Faka-ʻĒlone ʻe laumano–ko ha kau talavou ʻi ha Siasi fakamāmanilahi.

Kapau naʻe lava ke feʻiloaki fakataautaha mo kinautolu kotoa, ʻokú ne ʻiloʻi lelei ʻa e meʻa te ne lea ʻakí: “ʻOku ʻikai faingataʻa e hoko ko ha mēmipa tuʻukimuʻa ʻi he puleʻanga ʻo e ʻOtuá. ʻOku ʻofa e Tamai Hēvaní ʻiate koe. ʻOku fiemaʻu pē ke ke ʻofa kiate Ia. Pea kapau te tau fai ia, te tau malu mo fiefia. … ʻE ʻi ai leva ha ʻuhinga ʻo ʻetau moʻuí.”

ʻOku ʻikai ko e Siasí ke toki fakamātoatoʻi pē ʻi he ʻaho Sāpaté. Ko ha faingamālie ia ʻi he ʻaho kotoa pē, ‘o fakatatau ki he lau ʻa e loea ne hoko ko ha pule pisinisí.

Naʻá ne pehē, “Ko hono lau e folofolá, ʻalu ki he lotú, fakatomala ʻi he taimi pē ʻoku tau mavahe ai [mei he hala totonú], fakaava hotau ngutú pea hoko ko e sīpinga ʻo e ongoongoleleí—ko e palani ia ʻa ʻetau Tamai Hēvaní.”

Naʻe fanauʻi ʻa Brother Lani ʻi he ‘aho 30 ʻo ʻOkatopa 1953, kia Siei mo Toy ʻĒleni Lani pea tupu hake fakatouʻosi ʻi Kalefōnia Noate (Santa Rosa), mo Kalefōnia Saute (Long Beach), USA. Naʻe fakafoki ia ʻe heʻene ngāue fakakautau ʻi he Kautau ʻa e U.S. ki ʻIulope, ko ha konitinēniti ne ʻofa ai lolotonga ʻene ngāue ʻi he Misiona Netherlands Amsterdam.

Hili ‘ene ngāue fakakautaú, naʻá ne hū ki he ʻUnivēsiti Pilikihami ʻIongí, ʻo ne toe fetaulaki ai mo Kalini Kaki, ko ha finemui naʻá ne maheni mo ia lolotonga ʻene ngāue fakakautau ʻi Siamané. Naʻe mali ʻa Sitīveni mo Kalini ʻi he Temipale Salt Lake ʻi he ʻaho 8 ʻo ʻAokosi 1980. Ko ha ongomātuʻa kinaua ki ha fānau ʻe toko fā.

Hili hono maʻu ʻe Brother Lani ha mataʻitohi BA ʻi he laó mei BYU, naʻá ne ngāue ko ha loea kimuʻa peá ne toki hoko ko e palesiteni mo e Pule Lahi (CEO) ʻo e Nu Skin Enterprises. ʻOkú ne lolotonga hoko ko e sea pule ʻo e poate ʻo e kau talēkita ʻo e kautahá. ʻOkú ne toe hoko foki ko ha pule ʻo e Polokalama Ako Māʻolunga Ange ʻa ʻIutaá (Utah System of Higher Education).

Kuo hoko ʻa Brother Lani ko ha palesiteni ʻo e Misiona Georgia Atlanta pea mo e kouʻotineita ʻo e Kōmiti ki hono Fakatapui ʻo e Temipale Provo City Center. Kuó ne hoko foki ko ha mēmipa ʻo e poate lahi ʻa e Kau Talavoú pea mo ha Fitungofulu Fakaʻēlia.