ʻEletā William K. Jackson

Fitungofulu Taki Māʻolunga

Hili ha taʻu ʻe 23 ʻo e hoko ʻa Viliami K. Siakisoni ko ha ʻōfisa fakafaitoʻo fakavahe ʻi he Vaʻa Ngāue ki Muli ʻa e ʻIunaiteti Siteití, naʻe fai ha kole kiate ia ke ne vahevahe e ngaahi a‘usia tuʻukimuʻa ʻe 20 kuó ne maʻu lolotonga ʻene nofo mo ngāue ʻi he ngaahi feituʻu mamaʻo ʻo e māmaní.

ʻI heʻene fakakaukau ki he kole ko iá kimuʻa pea fakahoko e kātoangaʻi fakalāngilangi ʻene mālōlō mei he ngāué, naʻá ne fakatokangaʻi ai peá ne pehē ko e “kotoa ʻo e ngaahi meʻa tuʻukimuʻa ʻe 20 ne u aʻusiá, ne fekauʻaki ia mo e Siasí pe ko e fāmilí.”

Naʻe fanauʻi ʻa Viliami Kingi Siakisoni ʻi he ʻaho 29 ʻo Māʻasi 1956 ʻi Uāsingatoni, D.C., USA, kia E. Viliami mo Loisi ʻAnitulia Siakisoni. Naʻá ne tupu hake ʻi Ojai, Kalefōnia, USA, ka koeʻuhí ko e ngāue tokoni (volunteer) ʻa ʻene ongomātuʻá, naʻá ne toe ako foki ʻi Honitūlasi, ‘Alisīlia mo ʻAfikanisitani.

Hili e ngāue fakafaifekau ʻa ʻEletā Siakisoni ʻi he Misiona Bolivia La Paz, naʻá ne fetaulaki ai mo ʻAna Kesila ʻi he faʻahitaʻu māfana ʻo e 1977.

Naʻá ne pehē, “Naʻá ku ʻofa ai ʻi heʻema fuofua fesiofakí pē. “Naʻá ku feinga he toenga e faʻahitaʻu māfana ko iá ke fakalotoa ia ko e tokotaha totonú au.”

Naʻá na mali ʻi he ʻaho 29 ʻo Tīsema 1977 ʻi he Temipale Los Angeles California. Ko e mātuʻa kinaua ki ha fānau ʻe toko valu, pea ko e toko tolu ai ne ohi mai— mei ʻInitia, Nepolo mo Kemipoutia.

Ne ako ʻa ʻEletā Siakisoni ʻi he ʻUnivēsiti Pilikihami ʻIongí, maʻu ha mataʻitohi BSc mei he ʻUnivēsiti ʻo Kalefōnia, Pekilií, pea maʻu ha mataʻitohi toketā fakafaitoʻo mei he ʻUnivēsiti ʻo Kalefōnia, Seni Felenisisikoú ʻi he 1983.

Hili ʻene akoako ngāue fakafaitoʻó, naʻá na ngāue ki muli ʻi ha taʻu ʻe 26. Naʻá ne ngāue fakamuimuitaha ko e talēkita fakafaitoʻo ʻo e Valley Family Health Care, ʻa ia ʻoku ʻi he ngaahi feituʻu ʻo ʻAitahō mo ʻOlikoni, USA.

ʻI he taimi naʻá na mavahe ai mei he ʻIunaiteti Siteití, naʻá na feohi mo Sisitā Siakisoni he konga lahi ʻo hona taimí pea mo e ʻuluaki toʻu tangata ʻo e kāingalotu ʻo e Siasí.

Naʻá ne pehē, “Ko e taha ʻo e ngaahi konga lahi taha ʻo ʻeku fakamoʻoni ki he ongoongoleleí ko ʻeku mamata ki he meʻa ʻoku fakahoko ʻe he ongoongoleleí ki he kakai ko ʻeni ʻokú ma ʻofa aí. ʻOkú ne liliu kinautolu.”

Kuo hoko ʻa ʻEletā Siakisoni ko ha Fitungofulu Fakaʻēlia, palesiteni ʻo e Misiona India New Delhi, palesiteni fakakolo ʻo e Kau Talavoú, faiako ʻinisititiuti, mo e faiako ʻo e Tokateline ʻo e Ongoongoleleí. ‘I he taimi ne uiuiʻi ai ia ko ha Fitungofulu Taki Māʻolungá, naʻá ne lolotonga hoko ko ha pīsope.