ʻEletā Matthew S. Holland

Fitungofulu Taki Māʻolunga

ʻOku ʻikai foʻou kia ʻEletā Mātiu S. Hōlani ʻa e Kau Taki Māʻolungá pe ngaahi konifelenisi lahí.

ʻOku ʻiloʻi ia ʻe he tokolahi ʻo e Kāingalotú ko e foha ʻo ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻE manatu ha niʻihi ki ai ko ha talavou taʻu 17 ne lea lolotonga e konifelenisi lahi ʻo ʻEpeleli 1983 ʻi he fakataha lakanga fakataulaʻeikí.

Naʻe pehē ʻe ʻEletā Hōlani, ʻa ia ʻokú ne lolotonga tokangaʻi ʻa e Misiona North Carolina Raleigh, “Ko ha tāpuaki fakaʻofoʻofa ne u maʻu ʻi heʻeku moʻuí kotoa, ke mātā ʻa e anga e moʻui ʻa ʻeku fineʻeikí mo e tangataʻeikí, ʻa e meʻa kuó na tukupā ki aí, mo e meʻa kuo kole ange ke na fakahokó.”

Naʻá ne tānaki atu ʻo pehē, “Ka neongo ia, koe‘uhí ko e ngaahi fakamatala tonu ko ʻení, ʻoku tau ʻilo lahi ange fekauʻaki mo e uiuiʻi ko ʻení ke tau fakakaukau ʻoku tau mateuteu feʻunga ki ai. Meʻamālié, kuo tau ʻilo ʻoku fakafeʻungaʻi ʻe he ʻEikí ʻa kinautolu ʻokú Ne uí, pea ʻoku tau maʻu ha tui mo ha fakafiemālie ai.”

ʻOku manatu ʻa ʻEletā Hōlani naʻe faingataʻa e lea ʻi he konifelenisi lahí. Ne hoko hono teuteuʻi ha pōpoaki ne faifai pea maʻu ʻi he “ʻotu lea ki he ʻotu lea, ‘a e akonaki ki he akonaki” (2 Nīfai 28:30) ko “ha tāpuaki vave mo fakafiemālie ke ʻiloʻi ko e taimi ʻokú ke tali ai ha ngāue mei he ʻEikí, te Ne tokoniʻi koe pea ʻoatu e ngaahi fakakaukau mo e ngaahi ongo ki he ngaahi meʻa ʻoku fie maʻu ke vahevahé.”

Na‘e fanauʻi ʻa Mātiu Sikoti Hōlani ‘i he ʻaho 7 ʻo Sune 1966, ʻi Polovo, ʻIutā, USA, ko e foha ʻo Sefilī R. mo Petulisa Hōlaní. Naʻá ne mali mo Peisi Petimeni ʻʻi he ʻaho 20 ʻo Mē 1996, ʻi he Temipale St. George Utah. ʻOku toko fā ʻena fānaú.

ʻOku kau ʻi he feinga fakaako ʻa ʻEletā Hōlaní ha mataʻitohi ʻe tolu, ʻi he saienisi faka-politikalé—ko ha BA ʻi he ʻātí mei he ʻUnivēsiti Pilikihami ʻIongí ʻi he 1991 mo ha mataʻitohi MA ʻi he ʻātí mo ha mataʻitohi toketā ʻi he filosofiá, fakatouʻosi mei he ʻUnivēsiti Tiuké ʻi he 1997 mo e 2001.

Lolotonga ʻene hoko ko ha tokoni palōfesa ʻo e saienisi fakapolitikalé ‘i BYU (2001–2009), naʻe ui ia ko e palesiteni ʻo e ʻUnivēsiti ʻo e Teleʻa ʻIutaá ʻi he 2009, peá ne ngāue ai ʻo aʻu ki hono uiuiʻi ia ko ha palesiteni fakamisiona ʻi he 2018.

Kuó ne hoko ko ha pīsope, aleaʻanga māʻolunga, tokoni ʻi ha kau pīsopeliki, ʻetivaisa ʻo e Kau Talavou ʻo e uōtí, taki ngāue fakafaifekau fakauooti, faiako Lautohi Faka-Sāpate, mo ha faifekau taimi kakato ‘i he Misiona Scotland Edinburgh.