Bwebwenato ko an ijo jokwe ie
Elder Yamashita Ej Kūr Membōr ro an Kabun̄ in n̄an Kabwijer Peba in Mālim n̄an Deļo̧n̄e Tampeļ Eo
Kōketak n̄an mour tiljek āinwōt rikaļoor im kabun̄ jar ilo tampeļ, n̄e ekkar.
“Kabwijer juon mālim n̄an deļon̄e tampeļ,” Elder Kazuhiko Yamashita ej ba.
“Kwoj ke pojak n̄an etal n̄an tampeļ n̄e edikļo̧k m̧o ko kōn wōt ajedeed in nan̄inmej in ekapopo?” ekar kajjitōk. “Peba in Mālim n̄an Deļo̧n̄e tampeļ eo am̧ em̧ōj ke an maat an raan?”
“Ro jeiū im jatū jitōnbōro, jej aikuj kabwijer peba in eo ekāāl n̄an deļon̄e tampeļ, jekdo̧o̧n ilo iien in ejeņoļo̧k me elōn̄ tampeļ ko rej kilōk kōn wōt ajedeed in nan̄inmej in ekapopo COVID-19. Kabwijer juon mālim ekāāl n̄an deļon̄e tampeļ ej juon iaan wāween ko jemaron̄ kwaļo̧k iakwe eo ad n̄an Irooj. Ej juon wāween me jej ļoor kien eo eļap, ‘Kwon yokwe Irooj am̧ Anij kōn aolepān buruōm̧, im kōn aolepān am̧, im aolepān am̧ ļōmņak’ (Matu 22:37).
“Jemaron̄ kwaļo̧k ad mour erreo n̄an Irooj ilo ad kabwijer juon mālim ekāāl n̄an deļon̄e tampeļ. Jeļā bwe jeerreo n̄an deļon̄e tampeļ eo ej bōktok juon en̄jake in lan̄lōn̄ im aeņōm̧m̧an. Kabwijer juon mālim ekāāl n̄an deļon̄e tampeļ ej juon men eo eļap an aorōk n̄an kōj kajjojo.
“Eļan̄n̄e peba in mālim n̄an deļo̧n̄e tampeļ eo tampeļ eo am̧ emaat an raan, ko̧o̧ļe bisoprik ro am̧ n̄an kōm̧m̧ane juon am̧ intōrpiu ikkijeen tampeļ. Kabwijer wōt juon mālim ekāāl n̄an deļon̄e tampeļ. Kōnke ikar bōk menin letok kwojarjar eo aō make ilo Tokyo Tampeļ ilo Japan, ikar wōnm̧aanļo̧k wōt im kabwijer juon mālim ekāāl n̄an deļon̄e tampeļ. Ej juon kōjeraam̧m̧an eļap im menin letok jān Anij.
“Ļōmaro pālele im baba ro, jouj im peeke juon iien n̄an bōk kōrā ro pāleemi im ajri ro nejim n̄an tampeļ.
“Eļan̄n̄e kwojjab kabwijer juon mālim n̄an deļon̄e tampeļ, jino n̄an kōppopo kiiō. Jouj im etal ippān bisop eo am̧ im enaaj jipan̄ eok. Jen etal n̄an m̧weo im̧ōn Irooj ippān doon.
“Irooj ej kapilōk kōj n̄an kōļapļo̧k tōmak eo ad. N̄an kajjojo iaad ej ba: ‘Karōke kom̧ make, kōpooj kajjjojo mennin aikuj; im kajutak juon im̧ōn . . . Anij.’ Ej letok n̄an kōj un ko n̄an kalōk im̧ōn Anij im ba n̄an kōj wāween n̄an kōpooj kōj make n̄an bōk tōl ilo tampeļ.
“Jen kōpooj kōj ilo mour in jetōb, ilo kōļmenļo̧kjeņ, im ilo ānbwin n̄an bōk tōl ilo tampeļ. (Lale Katak im Bujen Ko 88:119–126.)
“Keememej, bun̄tōn eo kein kajuon ej n̄an kabwijer juon mālim ekāāl n̄an deļo̧n̄e tampeļ eo.”
Elōn̄ Armej ro Rekwojarjar ipeļaakin Pacific Eria in ro retiljek n̄an kabwijer juon peba mālim ekāāl n̄an deļo̧n̄e tampeļ eo. Jekjek ko aer reoktak, ak rej aolep wōr aer tōmak ilo Jemedwōj Ilan̄ im Eo Nejin Jisōs Kraist.
Ruo membōr in Kabun̄ in, juon jān New Zealand im juon jān Samoa, kwaļo̧k ļōmņak ko aer kōn kōjeraam̧m̧an ko ilo ad bōk mālim n̄an deļon̄e tampeļ.
Melanie Riwai-Couch, New Zealand: “Kabwijer juon mālim n̄an deļon̄e tampeļ ej juon men eo edik ak kein kakeememej eo eaorōk kōn bujen ko jekar kōm̧m̧ani, kōn ikdeleel eo aō n̄an kōjparok kien ko im n̄an bōk juon jem̧jerā indeeo ippān ajri ro im baam̧le eo.”
Aleni Fuatimau, Samoa: “Mālim in deļon̄e tampeļ eo ej āinwōt juon kii n̄an n̄a n̄an kōpelļo̧k kōjem̧ ko an tampeļ n̄an deļon̄ im bōk koņaad ilo kain̄i ko reļļa im rekwojarjar rej kōm̧m̧an wōt ijeņ. Kabwijer juon mālim ekāāl n̄an deļon̄e tampeļ eo ej kakeememej eō n̄an mour wōt erreo kōn priesthood eo me Irooj ekar letok n̄an eō.”