Bōktok Zaion
Jān Elder Gerrit W. Gong
Jān Doulul eo an Jon̄oulruo Rijilōk ro
Ilo an Armej ro Rekwojarjar ilo Raan ko Āliktata kar jeraam̧m̧an kōn jepļaaktok in gospel in, kar kūr kōj n̄an kōkajoorļo̧k Kabun̄ in n̄an kalōk Zaion.
PIJA IN MĀP JĀN PIJA KO JĀN GETTY
Ilo aolep bwebwenato, armej ro an Irooj raar kappukot n̄an bōktok pedped in gospel in ijo E emaron̄ pād ie. N̄an erom̧ juon jukjuk in pād an ro Rekwojarjar, jej aikuj in jeļā n̄an kakwojarjar im kakobaik būruwōd ilo wānōk bwe en ejjeļo̧k rijeram̧ōļ ilubwiljid (lale Moses 7:18).
N̄an waanjon̄ak, ālkin an Jon im Maria Linford kobatok ilo Kabun̄ eo an Jisōs Kraist im Armej Ro Rekwojarjar Ilo Raan Ko Āliktata ilo Gravely, England, ilo 1842, Jon ekar būreejtōn eo an branch eo ijo ej jokwe ie. Bōtaab, ro nukuier im m̧ōttāer, rekar jab kwaļo̧k m̧ōņōņō eo kar loe ilo Jepļaaktok in. N̄e ren kar jab kipel Jon n̄an likūt kabun̄ eo an ekāāl, innām en kar “pen men ko jet” n̄an e ilo an kōm̧m̧an juuj.
Ilo 1856 jāān in jipan̄ eo ņaetan Perpetual Emigrating Fund kar leļo̧k n̄an Jon im Maria juon iien em̧m̧an n̄an em̧m̧akūttok n̄an Salt Lake Valley. Raar jerak n̄an New York koba ļaddik ro jilu nejierro. Jān ijeņ raar etal n̄an Iowa City, Iowa, jān ijeņ rekar em̧m̧akūt ilo Juļae 1856 ippān James G. Willie ilo kom̧bani in handcart eo.
Ilo Oktoba 21, epaakeļo̧k tōļ ko ilo Sweetwater River ilo Wyoming, Jon ekar kwaļo̧k naan ko an āliktata.
“Ij m̧ōņōņō bwe jaar itok,” eaar ba n̄an Maria ke liin ekar kajjitōk ippān eļan̄n̄e ekar inepata ke rekar etal jān England. “Iban mour n̄an tōpar Salt Lake, bōtaab kwe im l addik ran e kom naaj, im ij jab ajļo̧k kōn ta ko jekar deblo̧ke n̄e ļaddik ran e nejirro remaron̄ rūttoļo̧k im kōkkaajriri baam̧le ko aer ilo Zaion.”1
Ta in Zaion?
Jejjo̧ katak ko kōn ļotak eo an Irooj Jisōs Kraist ekar im̧we rikanaan ro etto im raan kein im ro Rekwojarjar n̄an aiintok im̧ōņ Israel im n̄an kalōk Zaion n̄an kōppopo n̄an Itok eo an Rilo̧mo̧o̧r Kein Karuo.2
Etke Zaion eaorōk n̄an Armej ro Rekwojarjar ilo Raan Ko Āliktata—m̧okta im kiiō, ijoko armej ro an Irooj rej pād ie?
Elder Bruce R. McConkie (1915–85) jen Doulul eo an Jon̄oulruo Rijilōk ro, “Jān raan ko an Adam tok n̄an kiiō—ijo ewōr ie armej ro an Irooj make; jekdo̧o̧n n̄e ewōr en ekar ron̄ ainikien im kōjparok kien ko an; jekdo̧o̧n armej ro an rekwojarjar rekar jerbal n̄an e kōn eļap kōttōpar ilo bōro—ekar wōr wōt Zaion.”3
Jeje ko rekwojarjar rej kōmeļeļeik juon jukjukin pād an Zaion. Inok, juon rikanaan eo eļap tōmak ilo tōre ko an Noa, “kar kalōk juon jikin kweilo̧k kar etan Jikin Kweilo̧k Ekwōjarjar, em̧ool Zaion” (Moses 7:19). Irooj eaar jokwe ippān armej ro An, kōjeraam̧m̧an er im āneo (lale Moses 7:16–18). Irooj ekar ba n̄an Inok, “Lo, N̄aij Anij; Armej in Kwōjarjar ej Eta” (Moses 7:35).
Juon Zaion ekwojarjar ej jutak n̄an kobaik juon jikin ritōmak kar loi ilo pedped in katak ko kōn aelōn̄ eo an celestial, ijo armej ro an Anij remaron̄ etetal Ippān im Anij Make emaron̄ pād.
Bok in Mormon ej kam̧ool bwe ālkin jerkakpeje eo an Rilo̧mo̧o̧r ekar loļo̧k Laļ eo Ekāāl, aolep armej ro raar oktaktok n̄an Irooj, ioon aolepān mejān āneo. …
“Im eaar aer men otemjej ilo ejjeļo̧k kalijekļo̧k; kōn menin eaar ejjeļo̧k rim̧weie im rijeram̧ōl, kōm̧akoko im anemkwōj, a raar aolep anemkwōj, im ribōk mennin letok in lan̄ eo. …
“Im ālikin men kein eaar ejjeļo̧k jum̧ae doon ilo āneo, kōnke iakwe eo an Anij eo eaar pād ilo būruōn armej ro” (4 Nipai 1:2, 3, 15).
Tariņae kōn Wānōk im Kajoor
Raan ko an Inok ekar juon iien tariņae, katoorļo̧k bōtōktōk, mijak, marok, im kōjdāt—“kajoor eo an Setan eaar pād ioon aolep mejān laļ” (Moses 7:24; bar lale eoon 16, 17, 33). Ak Inok ekar tiljek wōt, Irooj ekar kūr e bwe en kwaļo̧k kōn ukweļo̧k.
Irooj eaar ba n̄an Inok bwe ejja “en̄taan ko reļļap” (Moses 7:61) renaaj waļo̧k ilo Itok eo An Kein Karuo. “Āinwōt Aō mour, em̧ool āindein I naaj itok ilo raan ko āliktata, ilo raan ko in nana im idenoņe, n̄an kakūrm̧ool e kanejnej eo me Iaar kōm̧m̧ane n̄an eok kake ro nejin Noa” (Moses 7:60).
Ilo tōre in ad, Būreejtōn Russell M. Nelson ekar ba, “Ij lo nan̄inmej in kiiō [COVID 19] eo ej juon iaan nan̄inmej ko me ekakkure laļ in ad, ekoba kōjdāt, jorrāān ilo jukjukin pād, kōn kōļar in armej, jorrāān, riab, im jab kautiej doon.”4 Aaet, em̧ōj ad bōk kanaan in. Būreejtōn Nelson ekar bar ba:
“Jej mour ilo juon raan eo me ‘ro jemād rekar kōttare kōn eļap kōtmāne.’ [Katak im Bujen Ko 121:27.] Jej pād ilo jea ko m̧aantata n̄an kam̧oole kōn mejād ta eo rikanaan Nipai ekar loe wōt ilo visōn, bwe ‘kajoor eo an Ļaam an Anij’ naaj jilkinlaļtak “ioon armej in bujen ro an Irooj, ro raar ejjeplōklōk ioon aolepān mejān laļ; im raar pojak kōn jim̧we im kōn kajoor in Anij ilo aiboojoj eļap.’ [1 Nipai 14:14.]
“Kom̧, ro jeiū im jatū, kom̧ ej pād ilubwiljin em̧m̧aan, kōrā, im ajri ro me Nipai ekar lo wōt etto.”5
Kūr eo n̄an aiintok im kōjeraam̧m̧an ro jim̧or ilo ron̄ōļ eo juon, ej n̄an kalōk Zaion, im kōpooj laļ in n̄an Itok eo Kein Karuo an Rilo̧mo̧o̧r ekoba kōj kajjojo. “Jān aolep armej ro rekar mour ioon laļ in,” Būreejtōn Nelson ekar ba, “jej armej ro rej bōk koņaer ilo m̧akūtkūt in āliktata, an aiintok doon in eļap.”6
Elmen Ad Tōpar Ijeņ?
Āinwōt Armej ro Rekwojarjar ilo Raan Ko Āliktata kar jeram̧m̧an kōn gospel in em̧ōj an jepļaaktak, jaar “kūr n̄an jerbal ilo jikin kallib [eo an Irooj], im n̄an kalōk kabun̄ eo [An], im kōjerkak tok Zaion” (Katak im Bujen Ko 39:13). Jerbal in ekitbuuj iakwe, ippān, tōmak, jerbal in jipan̄, kaarmijete, im pokake.
“N̄e armej rej iakwe Anij kōn aolepān būruweer n̄an kajjieon̄ kwojarjar im erom̧ āinwōt E, edikļo̧k nana im jum̧ae ilo jukjukinpād. Eļapļo̧k juon wōt,” Elder Quentin L. Cook ekar ba jān Doulul eo an Jon̄oulruo Rijilōk. Ekar ba: “Juon Wōt ej … lōn̄ kain meļeļein ak men eo eaorōk kōn waanjon̄ak ko kōn kien eo m̧oktata im eļap n̄an iakwe Anij im iakwe armej ro ad. Ej kwaļo̧k armej in Zaion ro būruweer im ļōmņak ko aer rej ‘bōrokuk im juon wōt’ [Mosaia 18:21].”7
Kōn iakwe im juon wōt in, jej kōjerbal tōmak n̄an kepaakļo̧k kōj n̄an Pinmuur eo an Rilo̧mo̧o̧r eo, eo ej ukōt kōj ilo ad kokwojarjar būruwōd im mour ko ad (lale Mosaia 3:19; Katak im Bujen Ko 97:12). Jej aiintok ro rej kōņaan itok n̄an Irooj ilo wāppen. Kōn kain̄i ko rekwojarjar im pedped ko an selestial, jej karuwaineneiktok kajoor in anij n̄an mour ko ad (lale Katak im Bujen Ko 105:5). Kwojarjar jān bujen ko ippān Anij im ro kajjojo, jej kalōk Zaion im kōpooje n̄an Itok eo Kein Karuo.
“Iakwe-em̧ool ej iakwe eo erreeo an Kraist,” Būreejtōn Henry B. Eyring ekar ba, Rikakpilōklōk eo Kein Karuo ilo Būreejtonji eo Kein Kajuon. “Im ej tōmak ilo E im tarlep in jelet ko an Pinmuur eo An indeeo me enaaj kōkarbōb kom̧, im ro kom̧ij iakwe im jerbal n̄an er, bwe menin letok eo eaiboojoj n̄an mour ilo jukjuk in pād eo im wāween mour ilo Zaion me kar kallim̧ur kake etto.”8
Pojak n̄an Raan ko rej Itok
Rikanaan ro raan kein rej kwaļo̧k bwe itok n̄an Rilo̧mo̧o̧r eo ej pokake eo an juon armej make, ejjab kōn jikin.
“Ilo tōre ko m̧okta an Kabun̄ in, oktak meļeļein em̧akūt” Būreejtōn Nelson ekar kōmeļeļeiki. “Ak kiiō aiintok ej bōk jikin ilo kajjojo laļ. Irooj ekar kakien kōn ejaak eo an Zaion ilo kajjojo laļ ko ijo Ekar leļo̧k n̄an Rikwojarjar ro An laļ in aer ļotak im rijikin eo.”9
Ilo ad dipuk apan̄ im kōjeraam̧m̧an n̄an kalōk Zaion ilo baam̧le ko ad, branch ko, ward ko, stake ko, im jukjukin pād ko, jej kōtmene kōn ejja kōjatdikdik eo me Jon im Maria Linford n̄an raan eo n̄a ro nejid im jibud “maron̄ rūttoļo̧k im ejaake baam̧le ko ad ilo Zaion in” ilubwiljin aolep laļ, kajin, im lo.
Ilo ad kūr ioon Irooj im kwojarjar eo An, jej jar, “bwe aelōn̄ eo An en maron̄ wōnm̧aanļo̧k ioon laļ, bwe ro rej pād ie ren maron̄ bōk e, im pojak n̄an raan ko rej itok, ko me ilo er eo Nejin Armej enaaj wanlaļtak ilo lan̄, kōpālpel ilo meram in aiboojoj eo An, n̄an ioon aelōn̄ eo an Anij eo em̧ōj kar kajutake ioon laļ” (Katak im Bujen Ko 65:5).