“Naaj Naetan Kabun̄ eo Aō”
Jān Būreejtōn Henry B. Eyring
Rikapilōklōk eo Kein Karuo ilo Būreejtōnji eo Kein Kajuon
N̄e jej kōjerbal jim̧we in etan Kabun̄ in, jej jeraam̧m̧an im jej kōjeraam̧m̧an ro jet.
Ilo Africa, armej ro rej pukote juon kabun̄ eo n̄an kobaļo̧k ie rekar kwaļo̧k ke ekar wōr aer ettōņak. Ettōņak ko aer, kar kapilōk n̄an pukot juon kabun̄ ņaetan kōn etan Jisōs Kraist. Ilo aer kar kappukote, raar lo juon wōt kabun̄ eo ej etan Rilo̧mo̧o̧r ilo io̧lepen—Kabun̄ eo an Jisōs Kraist im Armej Ro Rekwojarjar Ilo Raan Ko Āliktata.
Ilo Latin Amedka, jet iaan Armej ro Rekwojarjar ilo Raan ko Āliktata rekar kwaļo̧k bwe karuwainene eo aer n̄an ro jerāer n̄an kobaļo̧k ilo “Kabun̄ eo an Mormon” ekar kōm̧m̧an ineptata. Men eo ekar oktak ke rekar bōk juon karuwainene n̄an Kabun̄ Eo an Jisōs Kraist im Armej Ro Rekwojarjar Ilo Raan Ko Āliktata. “N̄e kabun̄ eo am̧ ej ņaetan Kabun̄ eo an Jisōs Kraist,” ro m̧ōttāer raar uwaak, “kōm kōņaan iwōj im lale.”
Ilo United States, juon Būraimere ļaddik ekar karuwaineneik ro riturin n̄an peptaij eo an. Juon rikaki jān bar juon kabun̄ ekar ba ejjan̄in kar etal n̄an juon peptaij an “Kabun̄ eo an Mormon.” Ak kōnke ekar jeļā bwe kabun̄ eo an ļaddik eo ej pedped ioon Jisōs Kraist, rikaki eo im kōrā eo ippān rekar etal.
Ke juon iaan rijerbal in baļuun eo ekar kajjitōk ippān membōr eo an Kabun̄ kōn email atōreej eo an, membōr eo ekar uwaak, “ldschurch.org.”
“Kabun̄ ta ne?” rijerbal eo ekar kajjitōk.
Membōr eo ekar uwaak, “Kabun̄ Eo an Jisōs Kraist im Armej Ro Rekwojarjar Ilo Raan Ko Āliktata.”
“Ij etal n̄an jikin jerbal aolep raan ij kōnono kōn Irooj,” rijerbal eo ekar ba. “Jeļā bwe ij kōnono n̄an bar jet Rikūrijin ekōm̧m̧an bwe raan eo en em̧m̧an.”
Membōr eo ekar m̧ōkaj an ukōt airline profile eo an kōn atōreej in email eo an ekāāl an Kabun̄ in: ChurchofJesusChrist.org1
Kallim̧ur eo Ekar Kūrm̧ool
Bwebwenato kein rekabwilōn̄lōn̄ rej kakūrm̧ool juon kallim̧ur Būreejtōn Russell M. Nelson ekar kōm̧m̧ane n̄an Armej ro Rekwojarjar ilo Raan Ko Āliktata ilo Oktoba 2018 im ilo Eprōļ 2020.
Būreejtōn Nelson ekar ba, “Ij kallim̧uri kom̧ bwe eļan̄n̄e jenaaj kōm̧m̧ane ijo em̧m̧antata n̄an kajim̧we et eo ejim̧we an Kabun̄ eo an Irooj, E eo me an Kabun̄ in naaj lelaļtak kajoor im kōjeraam̧m̧an ko n̄an ioon bōran Armej ro Rekwojarjar ilo Raan Ko Āliktata,. “Enaaj wōr ippād jeļāļo̧kjeņ im kajoor eo an Anij n̄an jipan̄ kōj bōk kōjeraam̧m̧an ko an jepļaaktok eo an gospel eo an Jisōs Kraist n̄an aolep laļ ko, kil, lo, im armej im n̄an kōpooje laļ in n̄an Itok eo an Kein Karuo an Irooj.”2
Jet iien remootļo̧k, ilo social media akuōn eo aō, iaar kajjitōk ippān membōr ro an Kabun̄ in n̄an kwaļo̧k n̄an eō kōjeraam̧m̧an ko raar būki jān kōjerbal jim̧we in etan Kabun̄ in. Ikar m̧weiūr n̄an bōk elōn̄ļo̧k jān 2,600 uwaak ko.
Ikōņaan kwaļo̧k jet iaer n̄an kom̧. Renaaj alikkar kōnke em̧ōj am̧ bōk ejja kōjeraam̧m̧an ko ilo am̧ kar ļoor kapilōk eo an Būreejtōn Nelson.
Epakeļo̧k Jisōs Kraist
Ikar m̧weiir kōn naan in kam̧ool eo an Jekab ilo an kar kōjerbal jim̧we in etan Kabun̄ in eo ekar jipan̄ e mije wōt Rilo̧mo̧o̧r: Ekar kwaļo̧k n̄an eō: “Ikar kile bwe aō mije wōt Rilo̧mo̧o̧r ekar ajedeedlok ilo aolepen kōm̧m̧an ko aō ilo mour eo aō.” N̄e ij bōk kwojkwoj eo, ij ļōmņak kōn E im en̄taan in pinmuur eo An. N̄e ij riiti jeje ko rekwojarjar, ij lukkuun leļo̧k aō n̄an naan ko An im eoon in jipan̄ ko jet kōn E. Menin ekar kepaakeļo̧k eō n̄an E im ekar jipan̄ kōkm̧anm̧anļo̧k aō meļeļe kōn jerbal eo An āinwōt juon aō Rilo̧mo̧o̧r im Ripinmuur.
Ij jeraam̧m̧an n̄e ij meļeļe ta meļeļein etan Rilo̧mo̧o̧r n̄an Beth im Bryce: Beth ekar ba, “Iaar en̄jake juon ekkeijeļo̧k epaak n̄an aō Rilo̧mo̧o̧r.” “N̄e rej kajjitōk kabun̄ ta eo ij kobaļo̧k ie, im ij uwaak ij uwaan Kabun̄ eo an Jisōs Kraist im Armej ro Rekwojarjar Ilo Raan Ko Āliktata, ij en̄jake aō lukkuun m̧ool in ro uwaan. Ij kobaļo̧k ippān armej ro An. Ij kobaļo̧k ippān baam̧le ro An. Ij kobaļo̧k Ippān.”
Bryce ekar ba n̄an eō bwe jim̧we in etan Kabun̄ in ejipan̄e “keememej wōn eo ij jerbal n̄an e im wōn eo ij kappukot n̄an erom̧ āinwōt. Ej kakeememej eō bwe Rilo̧mo̧o̧r eo ej e eo ekar letok katakin kein im bwe rej itok jen armej.”
“Ewōr Kajoor ilo Etan Rilo̧mo̧o̧r”
Haley, juon mijenede ej jerbal aolep raan, ekar ba: “Kōjerbal jim̧we in etan Kabun̄ in an Irooj ej bōktok eļapļo̧k kajoor im mālim n̄e jej katakin ro jet kōn jepļaaktok in gospel in An. N̄e ij ba Kabun̄ Eo an Jisōs Kraist im Armej Ro Rekwojarjar Ilo Raan Ko Āliktata,’ Jetōb in Irooj ej kapen im kam̧ool bwe en̄in ej Kabun̄ eo an Irooj ekar jepļaaktok ioon laļ in rainin. Em̧m̧an ippa kōjerbal jim̧we in etan kōnke ij barāinwōt kobaik naan in kam̧ool eo aō bwe em̧ool!”
Im Nicola ekar ba n̄an eō: “Mokta, n̄e ij ba ‘Mormon,’ ekkā an wōr pere ippān ro rejjab jān kabun̄ in ad. Komaron̄ kar ron̄ elōn̄ ememļo̧kjeņ ko kwaar ron̄ kōn ‘Mormon ro.’ Ak kiiō ewōr juon aenōm̧m̧an, ekkā an aolep bōke. Ewōr kajoor ilo etan Rilo̧mo̧o̧r. E ej bōktok aenōm̧m̧an. Naan in kam̧ool eo aō kōn m̧ool ko an gospel in ekar kajoor ilo aō baj kōjerbal jim̧we in etan Kabun̄ in. Ij en̄jake Jetōb kajjojo iien n̄e ij ba. Jet iien ej ede in men imaron̄ ba kōn ta eo jej tōmak kake, ak ebwe.”
Kalikkar Katak ko Rebōd
Harold, juon rikatakin ilo university ilo United States, ekar ba bwe kōjerbal m̧ool in etan Kabun̄ in ekar jipan̄ e kalikkar katak ko rebōd. Ekar ba n̄an eō kōn juon rijikuuļ, eo ekar kajjieon̄ in kōmeļeļeik juon ekkatak kōn kabun̄, ekar ba, “ij ļōmņak aolep kabun̄ ko rej Rikūrijjin, ijjelo̧kin wōt Mormon ro.”
Lo juon iien em̧m̧an n̄an kalikkar katak ko rebōd, Harold ekar ba, “ikar ba n̄an rijikuuļ ro bwe Mormon ekar juon āt bajjōk kar leļo̧k n̄an membōr ro an Kabun̄ in kōnke jej tōmak ilo Baibōļ im ilo Bok in Mormon āinwōt ruo jeje ko etto rej kam̧ool kōn Jisōs Kraist.
Mary ekar kōpeļļo̧k būruwōn n̄an eō, kwaļo̧k elmen an dipio in etan Kabun̄ in kar kōjeraam̧m̧an e n̄an katakin ajri ro nejin: “Ajri ro neju raar pok jidik ke ij katakin er bwe kōj jej ro Rekwojarjar an Kabun̄ eo an Jisōs Kraist ilo raan kein āliktata ijjelo̧kin ņaetad kōjmake ‘Mormon ro.’ Rekar pok im kar kajjitōk, ‘Etke Mormon? Meļeļein bwe jejjab Rikūrijin ke? Ij en̄jake bwe oktak in ekar jipan̄ er n̄e rej kōnono n̄an ajri ro jet ilo jikuuļ me rejjab membōr in Kabun̄.”
“Ij juon Mijenede n̄an Jisōs Kraist”
Būreejtōn Nelson ekar kallim̧ur bwe ilo ad kōjerbal jim̧we in etan Kabun̄ in, “jenaaj bōk jeļāļo̧kjeņ im kajoor an Anij” n̄an kajedeed gospel in. Teresa ekar im̧we eō kōn bwebwenato eo an kōn ta eo ekar waļo̧k ke juon m̧ōttan ilo jikin jerbal eo ekar kajjitōk ippān kōn Kabun̄ in. Ļoor kapilōk eo an Būreejtōn Nelson, Teresa ekar jino kwaļo̧k m̧ool in etan Kabun̄ in.
Ekar ba n̄an eō, “ekar itok limoin ilo Kabun̄ in.” “Ekar ekkatak kake ium̧win allōn̄ ko innām, men eo kabwilōn̄lōn̄, ekar peptaij jen ļaddik eo neju, eo ej bisop. Ikar m̧ōņōņō raan eo, im bar baam̧le eo aō. Kallim̧ur ko rej m̧ool.”
Jordan ekar ba bwe elōn̄ wōt iaan armej ro rejjab jeļā kōn etan Kabun̄ in. “Kōjerbal m̧ool in etan Kabun̄ in,” ekar ba, “ej letok n̄an eō juon iien em̧m̧an n̄an kōmeļeļeik elmen an Kabun̄ in mije wōt Jisōs Kraist im etke jej ba kōj make Armej ro Rekwojarjar.”
Ke juon em̧m̧aan ekar kajjitōk ippān Chloe n̄e ej juon “Mormon mijenede,” liin ekar kam̧ool, “Jaab, ij juon mijenede n̄an Jisōs Kraist.” Chloe ekar jiron̄ eō ke em̧m̧aan eo ekar kwaļo̧k an kōņaan ļoor Rilo̧mo̧o̧r, kōn menin liin ekar katakin e bwe Kabun̄ eo an Jisōs Kraist im Armej Ro Rekwojarjar Ilo Raan Ko Āliktata ej tōl jān Rilo̧mo̧o̧r eo. Innām liin ekar kōmeļeļeik e kōn Kabun̄ in An.
“Kom̧ naaj ņa etan Kabun̄ eo ilo Eta”
Āt eo etan Kabun̄ in kar letok jān revelesōn n̄an Rikanaan Josep Smith, Rilo̧mo̧o̧r eo ekar kwaļo̧k, “Bwe āindein naaj etan Kabun̄ eo Aō ilo raan ko āliktata, em̧ool Kabun̄ eo An Jisōs Kraist im Armej ro Rekwōjarjar ilo Raan Ko Āliktata” (Katak im Bujen ko 115:4). Im n̄an riNipai ro, ekar ba, “Kom̧ naaj ņa etan kabun̄ eo ilo Eta,” bwe “enaaj ekōjkan kabun̄ eo Aō ijello̧kun wōt n̄e ej etņake Eta?” (3 Nipai 27:7–8).
Ij kam̧ool ippānļo̧k juon Armej eo Ekwojarjar etan in Tommie bwe n̄e jej kōjerbal jim̧we in etan Kabun̄ in, jej jeraam̧m̧an im jej kōjeraam̧m̧an ro jet. Tommie ekar ba n̄an eō, “Ilo aō kwaļo̧k n̄an ro jet kōn kōjeraam̧m̧an ko āinwōt juon membōr in Kabun̄ Eo an Jisōs Kraist im Armej Ro Rekwojarjar Ilo Raan-ko Āliktata ilo iien ko n̄e armej ro rej illu im mijak, ij kile ij jipan̄ ro jet jeļā bwe ewōr juon jikin kone jān anjiwiwi ko an mour in ippānļo̧k rijilōk ro an Jisōs Kraist, eo ej kea kake er n̄an ro rej ļoor E.”