Rūm̧m̧an Ded ro
Maron̄ Kile Em̧m̧an eo ilo Kōj Make
Rijeje eo ej jokwe ilo Utah, USA.
Elmen am̧ maron̄ kōmeļeļeik menin letok eo n̄an maron̄ kile? Mae kiiō, ikar lukkuun in jebwābwe jān juon iaan jibadbad ko raorōk an menin letok in.
Kōmeļeļe in Pija ko jān Getty Images ko
Ilo aolepān mour eo aō, iaar kile menin letok eo n̄an maron̄ kile jim̧we jān bōd, m̧ool jān riab. Ilo an m̧ōttan in eaorōk kōn menin letok in, jet iien remootļo̧k ikar jeļā ke elōn̄ļo̧k.
Iaar lo juon men eaorōk ilo footnotes eo an juon kōnono kar waļo̧k ilo Eprōļ 2020 kweilo̧k eo eļap. Rikōnono eo ekar kout jen Būreejtōn Stephen L. Richards (1879–1959), kar Rikakpilōklōk eo Kein Kajuon ilo Būreejtōnji eo Kein Kajuon, eo ekar ba, “Maron̄ eo eutiejtata n̄an kile ippān ro jet im kwaļo̧k n̄an er em̧m̧anļo̧k in piktokier em̧ool, eo ej ped ippāer.”1
Ej ke āinwōt juon bwebwenato?
Jetōb Kwojarjar emaron̄ jipan̄ kōj loe em̧m̧an ilo ippān ro jet. Mool eo an ennaan in ekar kanooj em̧m̧an ippa jon̄an ikar kōņaan jeļā eļapļo̧k. Iaar lo bwe Elder David A. Bednar jān Doulul eo an Jon̄oulruo Rijilōk ro ekar bar kwaļo̧k kōn menin letok eo n̄an maron̄ kile eo enej jipan̄ kōj “loe im kwaļo̧k ta eo emaron̄ in ennojak ilo kōj.”2
Jen menin, iaar jeļā ewi aorōk in m̧ōttan menin letok eo n̄an maron̄ kile. Jej aikuj in lo karbab ko rem̧m̧an ilo kōj make me jemaron̄ ejaaki. Ilo ad kōm̧m̧an āindein, jenaaj en̄jake im mour eļapļo̧k āinwōt ro nejin Anij eo jej lukkuun m̧ool (lale Sam Ko 82:6; Mosaia 5:7; Moronai 7:19).
Elmen ad maron̄ jinoe kappukot em̧m̧an eo ilo kōj make? Erkein rej jet ļōmņak ko komaron̄ jino kaki:
Mije n̄an Kōjerbal Kajoor ko Am̧ n̄an Kōjeraam̧m̧an ro Jet
Ej juon katak em̧ool ke ewōr an aolep menin letok ko jān Anij (lale Katak im Bujen Ko 46:11)—im ejjab menin utiej bōro kaki n̄an ļōmņaki. Ilo m̧ool, Irooj ekar kajjitōk ippād n̄an kōm̧m̧ane! Jeje ko rekwojarjar rej katakin kōj n̄an kappukot “menin letok ko rem̧m̧aantata, keememej iien otemjej n̄an ta rekar litoki” (Katak im Bujen Ko 46:8; katak eo eaorōk kar kobaiktok).
Ilo ad jeļā eļapļo̧k kōn menin letok ak taļōn ko ad, jej aikuj kappukot wāween ko n̄an kōjerbali n̄an jipan̄ ro jet.
Juon wāween n̄an kile menin letok ko am̧ ej jān am̧ kajjitōk ippān juon eo kwoj lōke! Kajjitōk ippāer ta kajoor ko am̧. N̄e en kar kwe n̄a, kwon kar ļōmņak epen. Ak keememej, ejjab kōn juwa, ej kōn lo ta eo ippān ro jet ak m̧wiļ ko kwaar liļo̧k n̄an ro jeim̧ im jatum̧ ilo laļ in (lale Mosaia 8:18).
N̄an waanjon̄ak, juon ritūru eo ejouj ekar ba n̄an eō juon iien bwe ewōr juon menin letok eo ippa n̄an jipan̄ armej ro en̄jake aenōm̧m̧an. Ijelļo̧kin m̧ōkaj in leļo̧k naan in nōbar, iaar jino lale menin letok eo ilo mour eo aō. Ke ikar kōm̧m̧ane, iaar kile bwe Jemedwōj Ilan̄ emaron̄ jipan̄ eō kōjerbal kapāāl ko aō n̄an m̧ōttāik ro jet n̄an kōjeraam̧m̧an elōn̄ļo̧k mour ko jān baj n̄a make.
N̄an kile menin letok ko am̧, komaron̄ kālet n̄an kōjerbali n̄an kōjeraam̧m̧an ro jet (lale Katak im Bujen Ko 82:18).
Meļeļe kōn Kōjeraam̧m̧an in Petriak eo Am̧
Pija ko jān Judith Ann Beck
Kōjeraam̧m̧an ko an petriak ej bar juon menin jipan̄ eo em̧m̧an n̄an lo aorōk eo ad, menin letok ko an Anij. Elder Larry R. Lawrence, juon kar membōr in Jiljilimjuonn̄oul ekar ba: “Jetōb emaron̄ kwaļo̧k n̄an kōj m̧ōjņo̧ ko ad, ak E emaron̄ bar kwaļo̧k kajoor ko ad. … N̄e jej riiti kōjeraam̧m̧an in petriak ko ad, ej kakememej kōj bwe Jemedwōj Ilan̄ ejeļā maron̄ ko ad rekwojarjar.”3
Ekkatak kōjeraam̧m̧an in petriak eo am̧ enaaj jipan̄ eok kōļapļo̧k m̧wil ko me emaron̄ jipan̄ eok tōpar aorōk eo am̧.
Ilo jekjek eo aō, ekkā aō pijaiļo̧k kain rōt m̧am̧a eo ij kōtmene juon raan. Ilo aō jab kile, iaar ļōmņak kōn juon m̧am̧a eo ej ļōn̄aj, ejaak, im aiboojoj—im bwe cinnamon roll ko ej kōm̧m̧ani rej n̄an Doulul eo an Kōrā ilo ward eo an. Ilo an men ko jab nana, ekkatak kōjeraam̧m̧an in petriak eo aō ekar kwaļo̧k n̄an eō bwe Irooj ej kea eļapļo̧k bwe ij jouj im m̧am̧a eo ej iakwe. N̄an n̄a, Mwiļ Āinwōt Kraist rej men ko ij aikuj in ejaaki.
Keememej im Kōļmenļo̧kjeņ ilo iien Kwojkwoj
Pija ko jān Jerry Garns
Kwojkwoj eo ej juon iien n̄an ļōmņak kōn Rilo̧mo̧o̧r eo. Ej bar juon iien n̄an kōļmenļo̧kjeņ kōn eddōkļo̧k eo ad n̄an erom̧ eļap āinwōt E. Ilo am̧ jerbal n̄an lo em̧m̧an eo am̧, reilikļo̧k kajjojo wiik kōn tōprak ko am̧, en̄jake ko, im men ko iooni remaron̄ jipan̄ eok lo iien ko ijo menin letok ko am̧ rej waļo̧k.
Būreejtōn Henry B. Eyring, Rikakpilōklōk eo Kein Karuo ilo Būreejtonji eo Kein Kajuon, ekar ba: “Ilo am̧ lale mour eo am̧ ilo iien eo kwoj bōk kain̄i eo an kwojkwoj eo, ij kōjatdikdik lōmnak ko am̧ rejjab wōt ilo men ko rebwōd kwar kōm̧m̧ani ak barāinwōt men ko rejim̧we kwoj kōm̧m̧ani—iien ko kwar en̄jake bwe Jemed Ilan̄ im Rilo̧mo̧o̧r raar m̧ōņōņō ippam̧. Em̧o̧o̧l komaron̄ bōk jidrik iien ilo iien kwojkwoj eo n̄an kajjitōk ippān Anij n̄an jipan̄ eok loe men kein.”4
Erkein jet iaan kajjitōk ko kwomaron̄ kajjitōk ippam̧ make ak Anij ilo iien kwojkwoj eo:
-
Elmen aō kar ļoor waanjon̄ak eo an Kraist wiik in?
-
Wōn ro ikar jerbal in jipan̄ n̄an er?
-
N̄āāt eo ikar en̄jake Jetōb ilo wiik in? Etke?
-
Ta juon iaan Mwiļ Āinwōt Kraist eo ij kajjieon̄? Ej et aō kōm̧m̧ane?
-
Ewōr ke jabdewōt men ilo mour eo aō ij aikuj jar n̄an jipan̄ kake?
-
Ewōr ke jabdewōt eo ij aikuj jeo̧rļo̧k an bōd?
-
Ta juon iaan būrabōļōm̧, ļap ak dik, me Jemedwōj Ilan̄ im Jisōs Kraist rekar jipan̄ eō ilo wiik in?
Kōļmenļo̧kjeņ kōn em̧m̧an eo an Anij im etale mour eo aō ilo iien kwojkwoj eo ijelo̧kin lale likjab ko im bōd ko rejipan̄ eō likūt aō lōke ilo E.
Kōm̧m̧ane kūr eo am̧
Jej kōm̧m̧ani kūr ko ad kōn juon un, men̄e jejjab jeļā un eo ilo jinoin.
Ikar kūr n̄an būreejtōnji eo an Doulul eo an Kōrā ro ilo ward eo an ro rejjan̄in m̧are. Ikar m̧ōņōņō in jinoe jerbal. Ak ālkin jejjo̧ allōn̄ ko, ikar en̄jake ebbweer. Ikar jab maron̄ lo jabdewōt jetōb in eddōkļo̧k ippān ro ikar kajjieon̄ in jerbal in karejar ippāer. Kijejeto ko aō n̄an loļo̧k im m̧ōttāik ro ekar jab tōprak.
Juon Jabōt, ikar en̄jake āinwōt n̄e ejako menin letok ko ilo jetōb me emaron̄ jipan̄ juon bwe en em̧m̧an ilo jerbal in karejar. Aō jar ilo iien kwojkwoj raan eo ekar juon en̄jake ke ikar ekkar n̄an kūr eo aō. Iaar en̄jake im̧we n̄an kajjitōk kōn juon kōjeraam̧m̧an an priesthood.
Iaar ioon bisop eo aō, im ekar likūt pein ioon bōra, juon iaan men ko jinontata ekar ba n̄an eō ekar, “Jemedwōj Ilan̄ ej m̧ōņōņō kōn jouj ko am̧ n̄an ro jet.”
Iaar en̄jake Jetōb ekajoor, im ikar en̄jake bwe Irooj ekar m̧ōņōņō kōn kijejeto ko aō. Ikar en̄jake ikar bōk jidikin menin letok eo kar aikuji kōn iakwe ilo jerbal in karejar. Iaar aikuj in kwaļo̧k likjab ko aō ijelo̧kin tōprak ko aō.
Kūr ko am̧ rej iien ko reļļap n̄an kappukot im kōjerbal menin letok ko an jetōb.
Komaron̄ Jino Kiiō
Kwojjab aikuj in kōttar n̄an jino lo em̧m̧an eo ilo kwe make.
Būreejtōn Dieter F. Uchtdorf kar, Rikakpilōklōk eo Kein Karuo ilo Būreejtōnji eo Kein Kajuōn, ekar ba:
“Jet iien jej en̄jake ebbwer kōnke jejjab ‘ļap ļo̧k’ kōn jabdewōt—ļap ļo̧k ilo jetōb, kautiej, meletlet, ājmour, m̧weie, jouj, ak maron̄.
“Iaar katak ilo mour bwe jejjab aikuj in ‘ļap ļo̧k kōn jabdewōt n̄an jino erom̧ armej eo Anij ekōņaan bwe jān erom.”5
Jemaron̄ ijjino kōn jar. Kwaļo̧k n̄an Jemedwōj Ilan̄ ewi am̧ en̄jake kiiō, im elmen am̧ kōņaan n̄an en̄jake kōn kwe make. Kajjitōk kōn menin letok eo n̄an maron̄ kile n̄an jipan̄ eok lo em̧m̧an eo am̧. Jet iaan iien ko rem̧m̧an ilo mour eo aō raar itok jān jar. Ij tōmak Jemedwōj Ilan̄ ej kijōrjōr in jipan̄ kōj lo aolep men ko Ej loi.
Kōnke piktokid āinwōt ro nejin Anij, jej aorōk eļap (lale Katak im Bujen Ko 78:17). Kōn maron̄ eo n̄an kile, jej maron̄ in itok n̄an jeļā kōn kōj make.