Matagofie—Matagofie foi lona Faigofie
Tau ina ia tatou tausisia le faigofie o le talalelei a o tatou tauaveina i o tatou luga o tatou tiutetauave ua tofia mai le lagi.
Faatomuaga
Ou te faafeiloai atu ma le agaga maualalo ia te outou taitoatasi o faafofoga pe maimoa mai i lenei konafesi.
O le asō, ua ou faamoemoe e faamatalatala atu ni elemene se lua o le talalelei toefuataiina a Iesu Keriso, na sosoo ma tala faamomoiloto mai le Au Paia o Aso e Gata Ai i le salafa o le lalolagi e faapupula ai le faaaogaaga o nei mataupu faavae. O le elemene muamua o le talalelei toefuataiina—le galuega a le Atua mo le faaolataga ma le faaeaga—e taulai atu i tiutetauave faigofie e tofia mai le lagi. O le elemene lona lua e faamanatu mai ai o le talalelei e manino, taua, ma faigofie.
O Tiutetauave e Tofia mai le Lagi
Ina ia maua le ola faavavau, e tatau ona tatou “o mai ia Keriso, ma faaatoatoaina ia te ia.”1 A tatou o mai ia Keriso ma fesoasoani atu i isi e faia lena lava mea e tasi, ua tatou auai i le galuega a le Atua o le faaolataga ma le faaeaga, lea e taulai atu i tiutetauave e tofia mai le lagi.2 O nei tiutetauave paia e faaogatusaina i latou lava ma ki o le perisitua na toefuatai mai e Mose, Elaia, ma Elia, o loo tusia i le vaega lona 110 o le Mataupu Faavae ma Feagaiga,3 ma le poloaiga sili lona lua na tuuina mai ia i tatou e Iesu Keriso e alolofa ai i o tatou tuaoi e pei o i tatou lava.4 O loo maua i itulau muamua e lua o le Tusitaulima Aoaoua faafou, ma o loo avanoa mo tagata uma o le au paia.
Afai o le faalogo i upu “Tusitaulima Aoao” po o “tiutetauave e tofia mai le lagi” e afua ai ona e tetemū i le fefe ona o le lavelave, faamolemole ‘aua. O nei tiutetauave e faigofie, musuia, faaosofia, ma mafai ona fai. O tiutetauave nei:
-
Ola i le talalelei a Iesu Keriso
-
Tausiaina o i latou e le tagolima
-
Valaauliaina o tagata uma ia talia le talalelei
-
Tuufaatasiaina o aiga mo le faavavau
Atonu e te vaai atu i ai e pei o a’u: o se faafanua taiala e toe foi ai i lo tatou Tama Faalelagi alofa.
O Le Talalelei e Manino, Taua, ma Faigofie
Na ta’ua faapea o le talalelei a Iesu Keriso e “matagofie ma e matagofie foi lona faigofie.”5 O le lalolagi e le faigofie. E faigata, lavelave, ma e tumu i fesoua’iga ma fefinaua’iga. E faamanuiaina i tatou e le Alii pe a tatou faaaoga le faautautaga ia aua nei faatagaina le lavelave, ua masani tele ai le lalolagi, e ulufale mai i le ala tatou te maua ma faatino ai le talalelei.
Na matauina e Peresitene Oaks: “Ua aoaoina i tatou i mea laiti ma faatauvaa e tele i le talalelei a Iesu Keriso. E manaomia ona faamanatu mai ia i tatou i se tuufaatasiga ma i se taimi umi, o nei mea laiti naua o le a faataunuu ai mea tetele.”6 Ua faamatala mai e Iesu Keriso lava Ia e faapea e avegofie Lana amo, ma o Lana avega foi e mama ia.7 E ao ia i tatou uma ona taumafai malosi e tausisia le faigofie o le talalelei—i o tatou olaga, i o tatou aiga, i a tatou vasega ma korama, ma i a tatou uarota ma siteki.
A o outou faafogafoga mai i tala nei o le a ou faasoa atu ia te outou, ia outou silafia sa filifilia ma le toto’a ina ia musuia ma faailoa atu ai. O faatinoga a nei Au Paia o Aso e Gata Ai taitasi e avea ma faataitaiga mo i tatou taitoatasi i le faaaoga ai o le talalelei i ala manino, taua, ma le faigofie a o faataunuuina ai se tasi o tiutetauave na tofia mai le lagi lea faatoa folasia atu.
Ola i le Talalelei a Iesu Keriso
Muamua, ola i le talalelei a Iesu Keriso. E tatalo Jens o Tenimaka i aso taitasi ia ola i le talalelei ma ia matau uunaiga mai le Agaga Paia. Na ia aoao ia vave ona gaoioi pe a ia lagonaina le taitaiina ai e le Agaga.
Sa faasoa mai e Jens le mea lenei:
“Matou te nonofo i se tama’i fale manaia e ‘afa le puipui laupapa e atolau, i le ogatotonu o se pitonuu laiiti taugalemu, e lata i le vaituloto o le nuu.
“I le po lea o le tau pito i sili ona matagofie o le taumafanafana e mafai ona e manatu i ai i Tenimaka, sa matala faitotoa ma faamalama, ma sa manavaina e mea uma le toafilemu ma le lē gaoiā. Ona o le matuai matagofie ma le uumi o po o le taumafanafana, ou te le’i faanatinati ai e toe sui se matauila ua pa o le potu o masini.
“Na faafuasei ona ou maua se lagona malosi ua tatau ona ou suia loa lava! O le taimi foi lea, sa ou faalogo ai i lo’u toalua o Miriama, o valaau mai a’u ma le fanau e fufulu o matou lima aua ua saunia le meaai o le afiafi!
“Ua lava le umi na ou faaipoipo ai ua ou iloa e le o se taimi lenei e fai ai se isi mea, ae o le fufuluina o lima, ae sa ou faalogoina a’u lava o valaau atu ia Miriama se’i ou oso tasi atu lava i le faleoloa e faatau mai se matauila fou. Sa malosi le uunaiga o a’u ia ou alu loa lava.
“O le faleoloa e i le isi itu o le vaituloto. E masani lava ona matou savavali, ae o le asō sa ou toso maia ai la’u uila. A o ou tietie ma pasi atu i le vai, sa ou iloa atu i o’u si’u mata se tamaitiiti, pe a ma le lua tausaga le matua, o savalivali na o ia, i autafa o si’ui o le vaituloto, sa matuai latalata tele i le vai—na faafuasei ona pa’ū i totonu! Tasi le minute sa vaaia ai iina—a o le isi ua leai!
“Sa leai se isi na vaai o tupu lea mea, ae na o au. Sa ou atoina i lalo la’u uila, tamo’e, ma oso atu i le vaituloto ua oo i lo’u puimanava. Sa punitia vave le fogāvai i vaovai, ma sa le mafai ai ona iloa atu se mea i le vai. Ona ou lagonaina lea o se mea o gaoioi i le isi itu. Sa tuu atu lo’u lima i totonu o le vai, ma mau i se mitiafu, ma toso mai le tamaitiiti i luga. Sa amata ona fitivale, tale, ma tagi. E le’i leva mulimuli ane ae toe faatasia le tamaitiiti ma ona matua.”
A o tatalo Uso Jens i taeao taitasi mo se fesoasoani ia iloa uunaiga mai le Agaga Paia, e oo lava i se mea e le masani ai o le suia loa lava o se matauila, sa tatalo foi o ia ia mafai ona faaaoga o ia e fai ma meafaigaluega e faamanuiaina ai fanau a le Atua. E ola Jens i le talalelei e ala i le sailia o le taitaiga mai le lagi i aso taitasi, taumafai malosi ia agavaa, ona ia faia lea o le mea sili e mulimuli ai i lena taitaiga pe a oo mai.
Tausiga o i Latou e lē Tagolima
O se faataitaiga lenei o le tausia o i latou e lē tagolima. I se tasi aso, sa o ai se peresitene o le siteki i le siteki a Cúcuta i Kolumipia faatasi ma le peresitene o Tamaitai Talavou a le siteki e asiasi i ni tamaitai talavou se toalua—ma lo la tuagane matua talavou—o ē sa feagai ma ni tauiviga matautia. Talu ai nei na maliu ai lo latou tama, ma sa maliu lo latou tina i le tausaga i luma atu. Ua tuua nei na o si nei fanau e toatolu i lo latou malutaga laitiiti, ma le faatauvaa. O puipui e fai i laau e le teleina, ma pepa palasitika, ma na o le vaega e momoe ai e ato apa.
Ina ua maea le la asiasiga, sa iloa e nei taitai e manaomia ona latou fesoasoani atu. E ala i le aufono a le uarota, sa amata ona atia’e se fuafuaga e fesoasoani i nai tamaiti. O taitai o le uarota ma le siteki—Aualofa, korama a toeaina, Alii Talavou, Tamaitai Talavou—ma le tele o aiga sa tau fai galulue mo le faamanuiaina o lenei aiga.
Sa faafesootai e faalapotopotoga a le uarota ni tagata eseese o le uarota o e faigaluega faufale. Sa fesoasoani nisi i le mamanu, o isi sa ofo atu o latou taimi ma galuega, o isi na saunia meaai, ma sa foai atu lava foi e isi mea faufale sa manaomia.
Ina ua mae’a si tama’i fale, o se aso fiafia mo i latou o e sa fesoasoani ma mo le autalavou e toatolu o le uarota. Sa lagonaina e nei fanau ua matuaoti ia noataga mafanafana ma le mautinoa o lo latou aiga faaleuarota, i le iloa ai e le o tuulafoa’ia i latou ma e i ai pea lava le Atua iina mo i latou. O i latou na aapa atu, sa lagonaina le alofa o le Faaola mo lenei aiga ma sa galulue ai e avea ma Ona aao e auauna atu ia i latou.
Valaaulia Tagata Uma e Talia le Talalelei
Ou te manatu o le a outou olioli i lenei faataitaiga o le valaauliaina o tagata uma ia talia le talalelei. E le’i iloa e Cleiton e sefulufitu tausaga o Cape Verde pe o le a le mea o le a tupu ona o le savali i le vasega seminare a lana uarota i se aso se tasi. Ae o le a suia e faavavau lona ola ma ola o isi ona sa ia faia.
O Cleiton, faatasi ai ma lona tina ma lona uso matua, sa papatiso i le Ekalesia i se taimi ua mavae, ae na lē toe o i le lotu le aiga. O lana taga e tasi o le alu i le seminare o le a faamaonia ai se suiga musuia mo le aiga.
Sa agalelei ma talileleia o ia e isi talavou o le vasega seminare. Sa latou faia ia lagona e Cleiton le talileleia o ia, ma sa latou faamalosiauina o ia e sau i se isi gaoioiga. Na ia faia lava, ma e lei pine ae amata ona sau i isi sauniga a le Ekalesia. Sa vaaia e se epikopo poto le gafatia faaleagaga o loo ia Cleiton ma sa valaaulia o ia e fesoasoani ia te ia. “Mai lava i lena taimi,” na saunoa Epikopo Cruz, “Na avea Cleiton ma faataitaiga ma se tosinaga i isi talavou.”
O le tagata muamua na valaaulia e Cleiton e toe foi mai i le lotu o lona tina, ona sosoo ai lea ma lona uso matua. Ona ia faalautele lea o lana li’o i uo. O se tasi o na uo o se alii talavou o lana tupulaga, o Uilisone. O lana uluai feiloaiga ma faifeautalai, sa faaali atu ai e Uilisone lona manao ia papatiso. Sa faagaeetia ia faifeautalai ma maofa ona o le tele o mea ua uma ona faasoa atu e Cleiton ia Uilisone.
E lei gata ai iina taumafaiga a Cleiton. Sa ia fesoasoani i isi tagata o le au paia ua le toaaga mai, e faaopoopo i le faasoa atu o le talalelei i uo mai isi faatuatuaga. O le taimi nei ua 35 talavou toaaga a le uarota, ma se polokalama lauolaola o le seminare, faafetai tele i taumafaiga a Cleiton e alofa, faasoa atu, ma valaaulia. O Cleiton ma lona uso matua, o Cléber, ua sauniuni nei e faamisiona talai.
Tuufaatasia o Aiga mo le Faavavau
Ma le mea mulimuli, sei ou faasoa atu se faataitaiga matagofie o le tuufaatasia o aiga mo le faavavau. O Litia mai Kharkiv, Iukureini, na muai aoao e uiga i le malumalu mai faifeautalai. Na lagona loa lava e Litia se manaoga naunautai e alu i le malumalu, ma ina ua mavae lona papatisoga, sa amata ana tapenaga ia maua se pepa faataga o le malumalu.
Na auai atu Litia i le Malumalu o Freiberg Siamani ia maua ona faaeega paia ona ia faaalu ai lea o ni aso e faia galuega sui iina. Ina ua mavae le faapaiaga o le Malumalu o Kyiv Iukureini, sa alu soo ia Litia i le malumalu. Sa faamauina o ia ma lona toalua, o Anatoly iina ma mulimuli ane sa valaauina e avea o ni faifeautalai i le malumalu. Na la mauaina faatasi le silia ma le 15,000 igoa o augatuaa ma sa la galulue ai e faia sauniga o le malumalu mo i latou.
Ina ua fesiligia o ia i ona lagona e tusa ai ma galuega o le malumalu fai mai Litia, “O le a se mea sa ou mauaina i le malumalu? Ua ou osia ni feagaiga fou ma le Atua. Ua faamalosia la’u molimau. Ua ou aoao e maua faaaliga patino. Ua mafai ona ou faatinoina sauniga faaola mo o’u augatama ua maliliu. Ma ua mafai ona ou alofa ma auauna atu i isi tagata. Sa ia faaiu mai i le faamatalaga moni lenei: “E finagalo le Alii e silasila soo mai ia i tatou i le malumalu.”
Faaiuga
Ua musuia lava a’u i le lelei o nei Au Paia o Aso e Gata Ai, i latou uma ma ni talaaga matalasi eseese e totonugalemu i nei tala e fa. E tele mea e mafai ona aoao mai taunuuga ofoofogia e ala i le faaaogaaga faatauvaa o mataupu faavae faigofie o le talalelei. Na pau le mea sa latou fai o mea foi ia e mafai ona tatou faia.
Se’i o tatou tausisia ia le faigofie o le talalelei a o tatou tauaveina o tatou tiutetauave na tofia mai le lagi: E ola i le talalelei a Iesu Keriso ina ia nofouta ai i uunaiga e faapei ona faia e Jens i Tenimaka. Ia tausia ē lē tagolima, e faapei ona faapupula mai e tagata o le Siteki a Cúcuta i Kolumipia i le saunia o se malutaga i tagata ua matuaoti o le uarota. Ia valaaulia tagata uma ia maua le talalelei, i le ala na faia ai e Cleiton mai le atumotu o Cape Verde o le atunuu o Aferika, i ana uo ma le aiga. Ma le mea mulimuli, ia tuufaatasia aiga mo le faavavau, e pei ona sa faataitai mai e Sister Litia mai Iukureini, e ala i ona lava sauniga o le malumalu, taumafaiga o talafaasolopito o aiga, ma le auauna atu i le malumalu.
O le faia o na mea o le a mautinoa le aumaia ai o le olioli ma le filemu. Ou te folafola atu ma molimau atu i nei mea—ma ia Iesu Keriso lo tatou Faaola ma lo tatou Togiola—i le suafa o Iesu Keriso, amene.