Aoaoina mai i Savali o le Konafesi Aoao

O aoaoga a perofeta soifua ma isi taitai aoao o le Ekalesia e tuuina mai se taitaiga musuia ao tatou saili ia auai i le galuega a le Alii. I Aso Sa lona lua ma le lona fa o masina taitasi, e filifili e au peresitene o korama ma le Aualofa se savali o le konafesi e talanoaina, e faalagolago lea i manaoga o tagata o le au paia ma le taitaiga mai le Agaga. I nisi taimi, e mafai foi e le epikopo po o le peresitene o le siteki ona fautua atu se savali. I se tulaga lautele, e tatau i taitai ona tuu atu le faamamafa i savali mai uso o le Au Peresitene Sili ma le Korama a Aposetolo e Toasefululua. Ae peitai, e mafai ona talanoaina soo se savali mai le konafesi e sili ona lata mai.

E tatau i taitai ma faiaoga ona saili ni auala e uunaia ai tagata o le au paia e faitau savali ia ua filifilia ao lei amataina le sauniga.

Mo nisi faamatalaga e uiga i sauniga a le korama a toeaina ma le Aualofa, tagai i le Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, 8.2.1.2, 9.2.1.2, ChurchofJesusChrist.org.

Fuafuaina e Aoao Atu

O fesili nei e mafai ona fesoasoani i faiaoga ao latou fuafua e faaaoga se savali o le konafesi aoao e aoao atu.

O le a se mea o finagalo le failauga ia tatou malamalama i ai? O a ni mataupu faavae o le talalelei o loo ia aoao mai? E faapefea ona faatatau nei mataupu faavae i la tatou korama po o le Aualofa?
O a mau na faaaoga e le failauga e lagolago ai lana savali? O i ai nisi mau e mafai ona tatou faitauina o le a faateleina ai lo tatou malamalama? (Atonu e te ono mauaina nisi i faaiuga o faamatalaga o le savali po o le Topical Guide.)
O a ni fesili e mafai ona ou fai atu o le a fesoasoani ai i tagata o le au paia e mafaufau loloto ai i le savali? O a fesili o le a fesoasoani ia i latou e iloa ai le fesootaiga o le savali i o latou olaga, i o latou aiga, ma i le galuega a le Alii?
O le a se mea e mafai ona ou faia e valaaulia ai le Agaga i la tatou sauniga? O le a se mea e mafai ona ou faaaogaina e faalautele ai le talanoaga, e aofia ai tala, tala faafaataoto, musika, ma galuega faatufugaga? O le a se mea na faaaoga e le failauga?
Na tuuina mai e le failauga ni valaaulia? E faapefea ona ou fesoasoani atu i tagata o le au paia ia lagona le manao e faatino na valaaulia?

Manatu mo Gaoioiga

E tele lava ni auala e fesoasoani atu ai i tagata e aoao mai savali o le konafesi aoao. O ni isi nei o nai faataitaiga; atonu o i ai ni isi au auala o le a sili ona aoga i lau korama po o le Aualofa.

Talanoa i vaega. Vaevae tagata i ni vaega laiti, ma atofa atu i vaega taitasi ni vaega eseese o le savali o le konafesi e faitau ma talanoaina. Ona fai atu lea i vaega taitasi e faasoa mai se upumoni sa latou aoaoina. Pe e mafai foi ona e faatulagaina ni vaega mai tagata o e na suesue i isi vaega ma tuu atu ia i latou e faasoa atu i le tasi ma le isi mea sa latou aoaoina.
Tali fesili. Valaaulia tagata e tali i fesili e pei o [fesili] nei e uiga i le savali o le konafesi: O a ni upumoni o le talalelei o tatou mauaina i lenei savali? E mafai faapefea ona tatou faaaogaina nei upumoni? O a valaaulia ma faamanuiaga na folafola mai na tuuina atu? O le a se mea o aoao mai e lenei savali ia i tatou e uiga i le galuega o loo finagalo le Atua tatou te faia?
Faasoa atu upusii. Valaaulia tagata e faasoa atu ni upusii mai le savali o le konafesi lea na musuia i latou e faataunuu a latou tiutetauave i le galuega o le faaolataga. Uunaia i latou e mafaufau pe faapefea ona latou faasoa atu nei upusii e faamanuia ai se isi tagata, e aofia e pele ia i latou ma tagata latou te auauna atu i ai.
Faasoa atu se lesona faitino. Ia muai valaaulia ni nai tagata e aumai ni mea faitino mai le fale e mafai ona latou faaaogaina e aoao atu ai e uiga i le savali o le konafesi. I le fonotaga, fai atu i tagata e faamatala mai pe faapefea ona fesootai na mea faitino i le savali.
Saunia se lesona e aoao atu i le fale. Fai atu i tagata e galulue i ni paga e fuafua ai se lesona o le afiafi faaleaiga e faatatau i le savali o le konafesi. E mafai faapefea ona tatou faatatauina lenei savali i o tatou aiga? E mafai faapefea ona tatou faasoaina atu lenei savali i tagata tatou te auauna atu i ai?
Fetufaai atu mea na tutupu [ia te oe]. Faitau faatasi ni isi o faamatalaga mai le savali o le konafesi. Fai atu i tagata e faasoa mai ni faataitaiga mai tusitusiga paia ma mai i o latou olaga lea e faaalia ai pe faamalosia ai le aoaoga faavae lea na aoaoina i nei faamatalaga.
Aoao e uiga i se mau. Valaaulia tagata e faitau se mau faasino i le savali o le konafesi. Fai atu ia i latou e talanoa i le auala e mafai ai ona fesoasoani ia aoaoga o loo i le savali latou te malamalama atili ai i le mau.
Sue se tali. Ia muai fatuina ni nai fesili lea e mafai ona taliina e faaaoga ai le savali o le konafesi. Ia taulai atu i fesili ia e uunaia ai le mafaufau loloto po o le faaaogaaga o mataupu faavae o le talalelei (tagai i le Aoao Atu i le Ala a le Faaola, [2016], 31–32). Ona tuu atu lea i tagata e filifili se fesili ona sue lea o tali i le savali. Valaaulia i latou e talanoaina a latou tali i ni vaega toalaiti.
Sue se fasifuaitau. Valaaulia tagata e saili i le savali o le konafesi, e vaavaai ai mo fuaitau lea e taua ia i latou. Fai atu ia i latou e faasoa mai ni fasifuaitau ma mea sa latou aoaoina mai ai. E faapefea ona fesoasoani nei aoaoga ia i tatou e faataunuu ai le galuega a le Alii?
Fatu se mea. Valaaulia tagata e fai se pepa lautele o i ai se savali po o se faailogatusi lea e aofia ai se faamatalaga musuia puupuu mai le savali o le konafesi. Tuu atu ia i latou se avanoa e faasoa atu ai se mea sa latou faia.

Mo nisi manatu e suesue ma aoao atu mai savali o le konafesi aoao, tagai i le “O manatu mo le Aoaoina ma le Aoao Atu mai le Konafesi Aoao” o loo maua i lalo o le Konafesi Aoao i le Gospel Library.