Potutusi
O Le Malumalu ma Lou Faavae Faaleagaga
Novema 2021
18:59

O Le Malumalu ma Lou Faavae Faaleagaga

Saunia e Peresitene Russell M. Nelson

Peresitene o Le Ekalesia a Iesu Keriso o le Au Paia o Aso e Gata Ai

Soo se taimi lava e tulai mai ai soo se ituaiga o falavelave i lou olaga, o le nofoaga sili ona saogalemu e faaleagaga o le ola ma soifua lea i totonu o au feagaiga o le malumalu!

O’u uso e ma tuafafine pele, ou te faafetai i le faatasi ai ma outou i lenei taeao e faasoa atu ni lagona o lo’u loto.

E pei ona tou silafia, o loo tatou faatinoina ni galuega tetele o le faafouga i le Malumalu faasolopito o Sate Leki. O lenei polōketi faigata ma lavelave ua aofia ai le faamalosia maoae o lona uluai faavae, lea sa tautua lelei ai mo le silia ma se seneturi. Ae o lenei malumalu e tatau ona tu mo se taimi umi atu. I le faai’uga o Me, sa ou asiasi atu ai i le gasologa o lenei polōketi telē na’ua. Sa ou manatu o le a outou talisapaia le vaaia o le mea na ma vaaia ma lo‘u toalua o Wendy. Ou te manatu o le a outou vaai i le mafuaaga ua i ai se uiga fou o le viiga “Le Faavae Malosi”1 mo i tatou.

2:4

Vitio mai le nofoaga o le faafouga o le Malumalu o Sate Leki: “O loo tatou vaavaai atu i le uluai faavae o le Malumalu o Sate Leki. O loo ou tu i se vaega i lalo ifo o le mea sa i ai le Potu o le Faatoaga. A o ou su’esu’eina ia faiva ālofilima o faatufugaga o lenei maota atoa, sa ou maofa i mea sa ausia e paionia. Ou te matuā maofa tele pe a ou mafaufau na latou fauina lenei maota maoa’e tele e faaaoga ai na o meafaigaluega ma metotia na latou maua i le silia ma se seneturi ua alu.

“Peitai, i nei mau tausaga e tele mulimuli ane, afai tatou te su’esu’eina ma le toto’a le faavae, e mafai ona tatou vaai i aafiaga o le pala, ta’eta’ei i uluai galuega simā, ma tulaga eseese o le mausali i piliki.

“O lenei e pei ona ou molimauina mea e mafai ona fai e enisinia faaona po nei, au tusiata o fale, ma tagata faufale tomai faapitoa, ou te matuā ofo lava. O le latou galuega e ofoofogia!

“O le faavae o soo se fale lava, aemaise se fale e telē e pei o lenei, e tatau ona malosi ma lava le mausali e talitalia mafui’e, pala, matagi malolosi, ma le magoto lemu ifo e lēmaalofia e aafia ai fale uma. O le galuega lavelave o le faamalosia o loo faagasolo nei o le a toe faamalosia ai lenei malumalu paia i se faavae e mafai ma o le a tu mausali i le taimi atoa.”

Ua tatou faia taumafaiga uma e mafai ai ona avatu i lenei malumalu mamalu, lea ua faateleina le lamatiaina, se faavae o le a tetee atu i malosiaga o le natura e oo atu i le Meleniuma. I se tulaga faapena, o le taimi lenei tatou te faatinoina ai taitoatasi ni fuataga tulagaese—masalo o ni fuataga tatou te le’i faia muamua lava—e faamalolosia ai o tatou faavae faaleagaga e patino i le tagata lava ia. O luitau sili ona faigata ua tatou i ai nei e manaomia ai ni auala fou tatou te foiaina ai.

O’u uso e ma tuafafine pele, o aso nei e gata ai. Afai e ao ia te oe ma a’u ona tetee atu i mea lamatia ma faatosinaga o loo agai mai, e taua tele le tofu maua e i tatou o se faavae faaleagaga mausali ua atia’e i luga o le papa o lo tatou Togiola, o Iesu Keriso.2

O lea ou te fesili atu ai ia te outou taitoatasi, o le a le mausali o lou faavae? Ma o a ni mea o loo manaomia e faamalosia ai lau molimau ma le malamalamaaga o le talalelei?

O le malumalu o le totonugalemu lea o le faamalosia o lo tatou faatuatua ma le malosiaga faaleagaga ona o le Faaola ma Lana aoaoga faavae o le taulaiga autu lea o le malumalu. O mea uma o loo a’oa’oina i totonu o le malumalu, e ala i a’oa’oga ma e ala i le Agaga, e faateleina ai lo tatou malamalama ia Iesu Keriso. O ana sauniga taua e fusia ai i tatou ia te Ia e ala i feagaiga paia o le perisitua. Ma, a tatou tausia a tatou feagaiga, Na te faaee mai ia i tatou Lona mana faamalolo ma faamalosiau.3 Ma ioe, oka so tatou manaomiaina o Lona mana i aso o i luma atu.

Ua folafola mai ia i tatou e faapea “afai ua [tatou] saunia o le a [tatou] lē matata’u.”4 O lenei faamautinoaga ua i ai ni taunuuga loloto i aso nei. Ua ta’utino mai e le Alii e faapea e ui i luitau faigata tele o nei aso, ae o i latou o ē atia’e o latou faavae i luga o Iesu Keriso, ma a’oa’o i le auala e utuvai ai mai Lona mana, e lē manaomia ona lolo atu i lagona popolevale o lenei vaitau.

O sauniga ma feagaiga o le malumalu e anamuā. Sa faatonu e le Alii Atamu ma Eva e tatalo, osi feagaiga, ma osi atu taulaga.5 O le mea moni, “soo se taimi lava e i ai tagata o le Alii i luga o le fogaeleele o ē o le a usitai i Lana afioga, ua poloaiina i latou e fausia malumalu.”6 Ua faatumulia tusitusiga faavae i mau e faasino i a’oa’oga o le malumalu, la’ei, gagana, ma isi mea e tele.7 O mea uma tatou te talitonu i ai ma folafolaga uma ua faia e le Atua i Lana fanau o le feagaiga e o mai faatasi i totonu o le malumalu. I tupulaga uma lava, ua faamamafa ai lava e le malumalu le upumoni taua e faapea o i latou e osi feagaiga ma le Atua ma tausi i ai o i latou ia o fanau o le feagaiga.

O lea, i totonu o le maota o le Alii, e mafai ona tatou osia ai feagaiga lava e tasi ma le Atua ia na osia e Aperaamo, Isaako, ma Iakopo. Ma e mafai ona tatou maua ia faamanuiaga lava e tasi!

O Malumalu o Katelani ma Navu

Na avea lava malumalu ma se vaega o lenei tisipenisione mai lava i ona uluai aso.8 Na tuu atu e Elia ki o le pule e fai ai faamauga ia Iosefa Samita i le Malumalu o Katelani. O le atoaga o le perisitua sa toefuataiina mai i totonu o le Malumalu o Navu.9

Sa faaauau pea ona maua e Iosefa Samita faaaliga na faalautele ai le toefuataiga o le sauniga o le faaeega paia ma faamauga se’ia oo i lona maliu faamaturo.10 Peitai, sa ia iloa sa manaomia lava se isi faaleleiga atili. Ina ua maea ona faatautaia le faaeega paia o Polika Iaga ia Me 1842, sa ta’u atu e Iosefa ia Polika e faapea, “E le o faatulagaina sa’o lenei vaega, ae ua tatou faia le mea sili tatou te mafaia i lalo o tulaga ua tuuina i ai i tatou, ma ou te faamoemoe mo oe e amata ona fuafuaina pe faapefea ona faatulaga ma faagasolo nei sauniga uma lava.”11

Ina ua mavae le maliu o le Perofeta, sa vaavaaia e Peresitene Iaga le faamae’aina o le Malumalu o Navu12 ma mulimuli ane fausia ni malumalu i le Teritori o Iuta. I le faapaiaga o fogafale a lalo o le Malumalu o St. George, sa tautino mai ai e Polika Iaga ma le malosi le naunautaiga mo galuega sui o le malumalu ina ua ia saunoa, “A ou mafaufau i lenei mataupu, ou te manao i laulaufaiva o faititili e fitu ina ia fafagu i luga tagata.”13

Mai lena taimi agai i luma, sa faasolosolo ai lava ona faaleleia sauniga o le malumalu. Sa faamalamalama mai e Peresitene Harold B. Lee le mafuaaga e faaauau ai pea ona suia faiga faavae, aiaiga faavae, ma e oo lava i sauniga o le malumalu i totonu o le Ekalesia toefuataiina a le Faaola. Sa saunoa Peresitene Lee: “O mataupu faavae o le talalelei a Iesu Keriso e paia. E leai se tasi na te suia mataupu faavae ma [a’oa’oga faavae] o le Ekalesia vagana ai le Alii e ala i faaaliga. Ae e suia faiga pe a oo mai le taitaiga musuia ia i latou o ē pulefaamalumalu i se taimi patino.”14

Mafaufau i le auala ua suia ai le faatautaiga o le faamanatuga i le aluga o tausaga. I aso anamua, o le vai o le faamanatuga sa tuu atu i le potopotoga i se fagu lapo’a se tasi. Sa feinu uma mai ai tagata. O le taimi nei ua tatou faaaogaina ipu taitasi e uma ma lafoai. Ua suia faiga faavae ae tumau pea le tutusa o feagaiga.

Mafaufau loloto i upumoni nei e tolu:

  1. O le Toefuataiga o se faagasologa, e le o se mea e tupu, ma o le a faaauau pea se’ia oo ina toe afio mai le Alii.

  2. O le faamoemoega sili o le faapotopotoina o Isaraelu15 o le aumaia lea o faamanuiaga o le malumalu i fanau faatuatua a le Atua.

  3. Pe a tatou saili atu i auala e faataunuu ai lena faamoemoega i le mataalia atili, e faaali mai e le Alii ni malamalamaaga sili atu. O le Toefuataiga faifai pea e manaomia ai faaaliga faifai pea.

E tele ina ōle atu le Au Peresitene Sili ma le Korama a Aposetolo e Toasefululua i le Alii pe i ai nisi auala sili atu e avatu ai faamanuiaga o le malumalu i Ana fanau faatuatua. Matou te saili atu e lē aunoa i le taitaiga i auala e faamautinoa ai le sa’olele ma le ogatusa o a’oa’oga, feagaiga, ma sauniga o le malumalu i le lalolagi atoa e ui i eseesega o gagana ma aganuu.

I lalo o le taitaiga a le Alii ma i se tali mai i a matou tatalo, ua faia ai ni fetuunaiga faalefaiga faavae lata mai. O Ia le Toatasi e finagalo ia e malamalama ma le manino tele i le mea tonu ua e osi feagaiga e fai. O Ia le Toatasi e finagalo ia e mauaina le aafiaga atoatoa o Ana sauniga paia. E finagalo o Ia ia e malamalama i ou avanoa, folafolaga, ma tiutetauave. E finagalo o Ia ia e mauaina ni malamalamaaga ma ni fagua faaleagaga e te le’i mauaina muamua lava. O le mea lenei ua Ia finagalo ai mo tagata uma e ulu atu i le malumalu, po o fea lava o latou nonofo ai.

O fetuunaiga o i ai nei i faiga faavae o le malumalu, faapea ma isi o le a mulimuli mai, o ni faamaoniga faifai pea ia o loo taitaia tonu e le Alii Lana Ekalesia. O loo Ia saunia avanoa mo i tatou taitoatasi e faamalolosia ai ma le mataalia atili o tatou faavae faaleagaga e ala i le faatutotonuina o o tatou olaga ia te Ia ma i sauniga ma feagaiga o Lona malumalu. Pe a e aumaia lau pepa faataga o le malumalu, se loto salamo, ma se mafaufau sailiili i le maota o a’oa’oga a le Alii, o le a Ia a’oa’oina oe.

Pe a oo ina taofia e le mamao, luitau faalesoifua maloloina, po o isi tapulaa lou auai i le malumalu mo se vaitau, ou te valaaulia oe ia seti se taimi masani e tauloto ai i lou mafaufau ia feagaiga ua e osia.

Afai e te lē fiafia lava e auai i le malumalu, ia alu soo i ai—ae lē faaitiiti. Ia faataga le Alii, e ala i Lona Agaga, e a’oa’o ma musuia oe iina. Ou te folafola atu ia te oe i le gasologa o taimi, o le a avea le malumalu ma se nofoaga o le saogalemu, mafanafana, ma faaaliga.

Ana mafai ona ou talanoa taitoatasi ma talavou matutua uma, semanu ou te aioi atu ia te oe ia saili se soa e mafai ona e faamau i ai i le malumalu. Atonu e te tomanatu po o le a le eseesega e mafai e lenei mea ona faia i lou olaga. Ou te folafola atu o le a faia ai le eseesega atoa! A e faaipoipo i le malumalu ma toefoi atu pea i ai, o le a faamalosia ma taialaina oe i au faai’uga.

Ana mafai ona ou tautala atu i tane taitasi ma ava o e e le’i faamauina lava i le malumalu, ou te aioi atu ia te outou ia faia laasaga talafeagai e maua ai lena sauniga tumutumu ua suia ai le olaga.16 Pe o le a faia ai se eseesega? Vagana pe afai e te manao e alualu i luma e faavavau ma ia faatasi e faavavau. O le tau na ona moomoo ina ia faatasi e faavavau o le a lē tupu ai. E leai se isi sauniga po o se feagaiga o le a tupu ai.17

Ana mafai ona ou tautala atu i alii ma tamaitai taitasi o loo faananau mo se faaipoipoga ae e le’i maua lava sana soa e faavavau, ou te augani atu ia te outou e ‘aua le faatali se’ia faaipoipo ina ia maua ai faaeega paia i le maota o le Alii. Amata nei e a’oa’o ma oo i aafiaga o le uiga o le faa’au’upegaina i le mana o le perisitua.

Ma ia te outou taitoatasi ua osia feagaiga o le malumalu, ou te aioi atu ia te outou ia saili—ma le agaga tatalo ma faifai pea—ia malamalama i feagaiga ma sauniga o le malumalu.18 O le a matala faitotoa faaleagaga. O le a e a’oa’o i le auala e vavae ai le veli i le va o le lagi ma le lalolagi, i le auala e ōle atu ai mo agelu a le Atua ia faatasi ma oe, ma le auala ia maua lelei ai le taitaiga mai le lagi. O au taumafaiga maelega e faia ai o le a faamausaliina ma faamalosia lou faavae faaleagaga.

O’u uso e ma tuafafine pele, pe a mae’a le faafouga o le Malumalu o Sate Leki, o le a le toe i ai se isi lava nofoaga e saogalemu atu i taimi o se mafui’e i le Vanu o Sate Leki nai lo totonu o lena malumalu.

E faapena foi, soo se taimi lava e tupu ai soo se ituaiga o faalavelave i lou olaga, o le nofoaga sili ona saogalemu e faaleagaga o le ola ma soifua lea i totonu o au feagaiga o le malumalu!

Faamolemole talitonu mai ia te a’u pe a ou fai atu, a atiae lou faavae faaleagaga ma le mausali i luga o Iesu Keriso, e lē manaomia la ona e fefe. Pe a e faamaoni i au feagaiga na osia i totonu o le malumalu, o le a faamalosia oe e Lona mana. O lea, pe a oo ina tutupu mafui’e faaleagaga, o le a mafai ona e tu malosi ona ua mautu ma lē maluelue lou faavae faaleagaga.

Ou te alofa ia te outou, uso e ma tuafafine pele. Ou te iloa upumoni nei: E finagalo le Atua, lo tatou Tama Faalelagi ia outou filifili e toefoi atu i le aiga ia te Ia. O Lana fuafuaga o le alualu i luma e faavavau e lē lavelave, ma na te faamamaluina lau faitalia. Ua e saoloto e filifili po o ai le tagata o le a e avea ai—ma po o ai foi o le a oulua faatasi—i le lalolagi a sau!

O loo soifua le Atua! O Iesu o le Keriso! O Lana Ekalesia lenei, na toefuatai mai e fesoasoani ia te oe ia faataunuu lou taunuuga paia. O lea ou te molimau atu ai i le suafa paia o Iesu Keriso, amene.

Faamatalaga

  1. Tagai i le “Le Faavae Malosi,” Viiga, nu. 45.

  2. O lea, “pe a auina mai e le tiapolo … lana [afa] malosi, … o le a leai sona mana i luga o [i tatou] … ona o le papa lea ua [tatou] atinae ai i luga, o le faavae mautinoa lea o se faavae lea afai e atiae ai tagata e le mafai lava ona pauu i latou” (Helamana 5:12; ua faaopoopo le faamamafa).

  3. Tagai i le Mataupu Faavae ma Feagaiga 109:15, 22.

  4. Mataupu Faavae ma Feagaiga 38:30; tagai foi i le Mataupu Faavae ma Feagaiga 10:55.

  5. Tagai i le Mose 5:5–6.

  6. Bible Dictionary, “Temple.”

  7. Mo se faataitaiga, tagai i le Esoto 28; 29; Levitiko 8. O le tapeneko a Mose sa ta’ua o se “falefetāfa’i ua i ai le tulafono” (Numera 9:15) ma se “malumalu ua i ai le tulafono” (Esoto 38:21). Sa faatafunaina le malumalu o Solomona i le 587 T.L.M., i ni nai tausaga talu ona tuua e le aiga o Liae ia Ierusalema. O le toefuataiga o lenei malumalu e Serupapelu sa tupu i se taimi po o le 70 tausaga mulimuli ane. Ona faaleagaina lea i le afi i le 37 TLM. Na faalautele e Herota le malumalu pe tusa o le 16 TLM. Ona toe faaumatiaina lea o lenei malumalu, lea na silafia e Iesu, i le 70 T.A. Sa oo ai foi Nifae i ni aafiaga faapenei o malumalu e ala i le “alu soo i le mauga” e tatalo ai (1 Nifae 18:3) ma mulimuli ane fausiaina se malumalu “e pei o le malumalu o Solomona,” e ui sa le’i matagofie tele (tagai i le 2 Nifae 5:16).

  8. Tagai i le Mataupu Faavae ma Feagaiga 88:119; 124:31.

  9. Tagai i le Mataupu Faavae ma Feagaiga 110:13–16; 124:28. O le maa tulimanu o le Malumalu o Navu sa faataatia i le aso 6 Aperila, 1841, na o ni nai masina talu ona maua e Iosefa Samita le faaaliga e fausia. Sa i ai i le Malumalu o Navu nisi faamoemoega faaopoopo. Mo se faataitaiga, na faamalamalama mai e le Alii sa manaomia se vai papatiso mo le Au Paia ina ia papatisoina ai mo i latou ua maliliu (tagai i le Mataupu Faavae ma Feagaiga 124:29–30).

  10. Tagai i le Mataupu Faavae ma Feagaiga 131; 132. Mataupu Faavae ma Feagaiga 128 o loo ia i se tusi na tusia e Iosefa Samita e faatatau i le papatisoga mo ē ua maliliu. O iina na ia tautino mai ai e faapea o le olataga o ē ua maliliu “ua tatau ma taua tele mo lo tatou olataga, … [aua] e le mafai ona faaatoatoaina o i latou e aunoa ma i tatou—pe mafai foi ona faaatoatoaina i tatou e aunoa ma o tatou tagata maliliu” (fuaiupu e 15).

  11. Iosefa Samita, i le Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagāvai o le Upumoni, 1815–1846 (2018), 454.

  12. “Sa faaiu mai e le Tusitalafaasolopito o le Ekalesia o George A. Smith e faapea e 5,634 uso ma tuafafine na maua o latou faaeega paia ia Tesema 1845 ma Ianuari 1846 i le Malumalu o Navu. Sa faaauau pea faamauga o ulugalii e oo atu i le aso 7 Fep., [1846,] o le taimi lea ua silia ma le 2,000 ulugalii na tuufaatasia e le perisitua mo le olaga nei ma le faavavau” (Bruce A. Van Orden, “Temple Finished before Exodus,” Deseret News, Dec. 9, 1995, deseret.com; see also Richard O. Cowan, “Endowments Bless the Living and Dead,” Church News, Aug. 27, 1988, thechurchnews.com).

  13. “O le a sou manatu o le a se tala a tama pe ana mafai ona tautatala mai tuugamau? Pe latou te le fai mai ea, ‘Ua fia afe tausaga o matou ta’o’oto ai iinei, iinei i lenei fale puipui, ma faatalitali mo lenei tisipenisione e oo mai’? … Aisea, ana fai ua ia i latou le mana, semanu e lagona e o tatou taliga faititili o le lagi, pe ana tatou iloaina le taua o le galuega ua tatou punouai ai. O agelu uma i le lagi o loo vaavaai mai i nei tama’i tagata to’alaiti, ma faaosofia i latou i le faaolataga o le aiga o le tagata. … Pe a ou mafaufau i lenei mataupu, ou te manao i laulaufaiva o faititili e fitu e fafagu i luga tagata” (Discourses of Brigham Young, sel. John A. Widtsoe [1954], 403–4).

  14. Harold B. Lee, “God’s Kingdom—a Kingdom of Order,” Ensign, Jan. 1971, 10. Tagai foi i se faamatalaga na faia e Peresitene Uitilafi Uilfotif i le 1896 faapea: “Ou te fia fai atu, i le avea ai ma peresitene o Le Ekalesia a Iesu Keriso o le Au Paia o Aso e Gata Ai, ua tatau nei ona tatou o atu pea ma agai i luma. E le’i mae’a lava a tatou faaaliga. O Peresitene [Polika] Iaga, o lē na mulimuli ia Peresitene Iosefa Samita, na taitai maia i tatou iinei. Sa ia faatulagaina nei malumalu ma faataunuu faamoemoega o lona valaauga ma le tofiga. … Na te le’i mauaina uma ia faaaliga e faatatau i lenei galuega; faapena foi ia Peresitene Teila, po o Uilifoti Uitilafi. O le a leai lava se mutaaga o lenei galuega se’iloga e faaatoatoaina” (The Discourses of Wilford Woodruff, sel. G. Homer Durham [1946], 153–54).

  15. Tagai i le 3 Nifae 29:8–9.

  16. Tagai i le Mataupu Faavae ma Feagaiga 131:2, 4.

  17. Tagai i le Mataupu Faavae ma Feagaiga 132:7.

  18. Sa tusia e Elder John A. Widtsoe: “I le alii ma le tamaitai e ulufale atu i le malumalu, ma gauai atu e a’oa’o, usitai i faatusa ma feagaiga, ma faia se taumafaiga mausali ma faifai pea ia malamalama ai i le uiga atoa, e fetalai mai e le Atua lana afioga, ma e oo mai faaaliga. O le faaeega paia ua tumu i faatusa lea e na o se tagata faavalevalea lava e taumafai e faamatalatala; ua matua faatumulia lava i faaaliga ia i latou e faaaoga lo latou malosi e saili ai ma vaai, lea e leai ni upu faaletagata e mafai ona faamatalaina pe faamaninoina avanoa o loo i ai i sauniga o le malumalu. O le faaeega paia lea sa tuuina mai e ala i faaaliga e mafai ona malamalama sili i ai e ala i faaaliga” (in Archibald F. Bennett, Saviors on Mount Zion [Sunday School manual, 1950], 168).