iTabagone Qase Cake
Yaco na Vakacokotaki na Yalo
E vakaitikotiko mai Seville, Spain, o vunivola.
Au a se sega mada ni bau vakila na nuiqawaqawa me yacova ni’u sa lesu ki vale mai na noqu kaulotu, ka’u sega ni vakadeitaka rawa na sala me’u toso kina ki liu.
iTaba vakarautaka o koya ka tabaki
Sa toso tiko na bula me vaka na ituvatuva.
Au sa vakarau vakacavara sara ga na noqu kaulotu. Ena loma ni 18 na vula sa oti, sa vaqaqacotaki na noqu ivakadinadina, ka vakarabailevutaki na noqu rai me baleta na ituvatuva ni veivakabulai. Au se bera vakadua ni’u vakila me’u volekata na noqu iVakabula kei na Tamaqu Vakalomalagi me vaka ena gauna oqo. Na bula e vaka me sinai tu ena marau.
E dina, ni keitou sotava tiko vakamatavuvale na neitou iwase ni veivakatovolei, ia vakararaba, au a marau ka tiko e levu na noqu ituvatuva me baleta na veika ena tarava mai. Ia au sa lesu i vale. Ka sa veivakidacalataki sara na veisau ni draki ni bula. Au sotava na dredre ena sasaga me’u lesu tale ki na ivakarau matau ni bula ni veisiga. Au lomaleqataka vakawasoma na vakayaco digidigi vinaka ka me’u uasivi sara ena noqu talairawarawa. Au dau vakasaurarataki au vakalevu me’u tiko ga ena itagede cecere vakayalo a tu vei au ena noqu gauna taucoko ni kaulotu baleta ni’u rerevaka kevaka e sega, au na malumalu mai vakayalo.
Ni toso cake tiko na kaukauwa ni noqu vakasaurarataki au, au sa tekivu vakila na nuiqawaqawa kei na veilecayaki. Sa yaco me talevi au mai vakawasoma, ka’u vakila ni vaka me’u sa luvu tiko.
E ka ni rarawa, ni’u a vunitaka na veika au a vakila tiko mai vei iratou na noqu matavuvale kei ira na itokani. Au kila ni nuiqawaqawa kei na yaluma e sega ni dua na ka me maduataki, ia au vakila ni’u sa sega ni lewai au rawa ka sese kau sa sega mada ga ni kila me’u vakaraitaka vakacava na veika au sotava tiko me’u rawata kina na veivuke.
Eda vakavinavinaka, ni Turaga sa dau tu voleka me dusimaki keda ni da gole Vua. Ni oti e so na vakanananu vakatitobu kei na masumasu, au a vakauqeti me’u tukuna vei tuakaqu kei watina na ka au sotava tiko. Erau a vukei au me’u kila ni’u a sega ni “lialia” me vaka na noqu nanuma, ka na rawa ni yaco vua e dua ga na tamata na dredre vakayalo.
E vakadinadinataka o Sisita Reyna I. Aburto, na iKarua ni Daunivakasala ena Mataveiliutaki Raraba ni iSoqosoqo ni Veivukei na dina oqo: “Kemuni na itokani lomani, e rawa ni yaco vei keda yadua—vakabibi vei keda sa vakabauta tiko na ituvatuva ni bula marau, eda vakalomaocataki keda vakaveitalia ni da nanuma meda sa uasivi ga nikua. Na vakasama vakaoqo e rawa ni veiuabaleti. Na rawati ni bula e vinaka sara edua na cakacaka ena taura na gauna taucoko ni noda bula vakayago kei koya se bera mai—ena loloma soliwale duadua ga i Jisu Karisito.”1
Dua na Vuli Vakauqeti
Ni’u masuta na veidusimaki nei Tamada Vakalomalagi, au kila ni’u gadreva me’u goleva na ivurevure eso sa vakarautaka tu vei keda o Koya, ka’u gadreva me’u vulica ka veisau me vinaka cake. Au vakavinavinakataka, ena gauna oya na madigi me’u tiko ena vuli ni veivakacokotaki ni yalo ni Lotu. Na madigi e vaka me a lako mai ena gauna donu, ka’u sega ni vakabauta ni a ka ni vakacalaka.
Ena ivolavakarau ni vuli, na vaqaqacotaki ni yalo e vakaibalebaletaki vakaoqo:
-
“Na kaukauwa me sotavi kina na bolebole ni lomada ena yaloqaqa kei na vakabauta ka yavutaki vei Jisu Karisito.
-
“Vukei iko kei ira na tani ena kena vinaka duadua o rawata.
-
“Dolele yani ena gauna e gadrevi kina na veivuke eso.”2
Ena dua tale na kena itukutukuni, na vaqaqacotaki ni yalo e dua na ka eda gadreva kece.
Vei au, na vuli veivakauqeti oqo e sa dua na ivakatakilakila matata ni kila vinaka tu na Tamada Vakalomalagi na veivakatovolei eda sotava tiko ena gauna oqo ni da sa lewe ni Lotu i Jisu Karisito. E vinakata o Koya me vukei keda meda toso tikoga ki liu ena salatu lesu Vua. Noqu raica rawa na veitikina totoka ni vuli oqo a vukei au me’u kila na nona kilai keda vakatitobu na Tamada Vakalomalagi kei na noda dui gagadre yadua, ka’u vakila ena gauna vata oya na vakacegu niu sa tekivu vuli. Na vuli oqo e vakatavulica vakamatata ka vakaukauwa na vei dina tawamudu ka rawa ni vakayagataki ki na noda bula nida sotava na leqa ni bula ni vakasama, se vua e dua eda lomana.
E dua vei ira na ivakavuvuli ka lauti au e kunei ena wase e 9, “Solia na Veivaqaqacotaki vei ira na Tani.” Na iwase oqo sai koya na ka a vukei au me’u vaqara yani na veivuke tale eso. E vakavulica na ivakavuvuli meda veiqaravi vakai keda. Au vulica na kena bibi mera qaravi na tani ena ciqomi ni veika era vakila, e lomadra kei na nodra nanuma, ka dodoliga yani ena yalololoma kei na kauwai. Au a qai kila talega ni gadrevi vei au me’u nuitaki ira na tani mera vukei au ena noqu sasaga.
Ena gauna au a rawa ni vakatovotovotaka kina na veivakasama oqo ka tukuna ki na noqu matavuvale kei ira na noqu itokani me baleta na dredre ni noqu bula ni vakasama, au kurabui ni ra a yalololoma ka sega ni veivakalewai. Au a ciqoma e levu na veitokoni mai vei ira.
Au vakila ni noqu lomaleqa a rawa ni vuki me ca vakalevu sara kevaka me’u a sega ni wasea na noqu bolebole vei ira na noqu daulomani. Na veika au sotava oqo a vukei au me’u dolele yani ka tu raviti ira na tani me baleta na nodra nuiqawaqawa kei na veileqa tale eso.
E Rawa ni da Sotava na Veisiga ni Mataka ena iNuinui
E ka ni lasa vei au ena noqu lesu mai ena kaulotu, ni’u a lomaleqataka vakalevu na noqu na vakayalia na “ivakatagedegede vakayalo” au sa rawata ena gauna ni noqu kaulotu, baleta oqo au qai kila ni lesu mai ki vale sa itekivu walega ni dua na iwase vou kau rawa ni kunea kina eso na sala vovou me’u vakatitobutaka kina na noqu vakabauta.
Na noqu veimaliwai kei na Tamada Vakalomalagi kei Jisu Karisito e sa tubu ka titobu cake sara mai na gauna au a lesu mai kina ki vale, vakabibi ena vuku ni ivakavuvuli au a vulica ena vuli ni veivakacokotaki ni yalo kei na noqu vakararavi vua na Tamada Vakalomalagi kei na iVakabula me vukei au. Au vakila ni Rau bula ka tiko vata kei au ena noqu bula e veisiga.
Au sa vulica ka ciqoma me vaka ni da luvena na Kalou, eda na dau veisau, vuli, ka tubu. Ia ena loma ni veiveisau ni noda bula, na Tamada Vakalomalagi e sega ni veisau rawa. E a sega ni namaka o Koya me’u vinaka sara ena noqu gauna ni kaulotu, ka sega tale ga ni namaka o Koya ena gauna oqo. O Koya e lomani au ga ka vinakata me’u tomana tiko noqu sasaga me’u voleka vei Koya ka cakava na kena vinaka duadua au rawata ena noqu ilakolako lesu vei Koya.
Ia oqo, baleta ga ni’u a taura na vuli ni veivakacokotaki ni yalo oqo, e sega ni kena ibalebale ni’u sa sega tale ni lomaleqa se taqaya se tiko na gauna au vakila kina ni’u luvuci ena rerevaka na veisiga ni mataka. Au se cakava tikoga ena so na gauna. Ia oqo au sa kila na ivakarau oqo ka vulica eso na iyaragi me vukea na kedra wali ena sala e bulabula cake, me vakavinakataki cake kina na noqu bula ni veisiga.
Kena itinitini, na vuli oqo e vakaiyaragitaki au me’u vorata rawa na gauna au dau sotava kina na nuiqawaqawa kei na bolebole eso. E vakavulici au me tiko vei au na yalovosota kei na yalololoma me baleti au kei na noqu malumalumu. Ka’u sa vulica me’u kila vinaka na sala e raici au kina na Kalou ka me’u kakua ni vakarerei ena veika tawakilai ni veisiga ni mataka.
Ena veivuke mai vei ira na kenadau kei lomalagi, sa yaco me’u kila kina ni sa tu vei keda na iyaragi e gadrevi me kilai kina na sala me da lewa kina vakai keda na ka me da “kitaka ka sega na ka me lewai keda” (2 Nifai 2:26) ena lomada kei na veika eda vakila ni da toso tikoga vei Karisito.