iVakavuvuli ni Veiqaravi

Vakayacori na Veiqaravi me Vakaibalebale

Kevaka o taroga lo tiko se vakaibalebale na nomu veiqaravi, vakananuma na veivakasama oqo.

woman hugging a young woman in a wheelchair

E rawarawa sara meda vakataroga se sa vakayaco veisau tiko na noda veiqaravi, vakabibi ni da sotava tiko na noda dui dredre yadua.

Ni bera na noqu mai dabe vakadua ena idabedabe qiqi, au dau taleitaka ni’u raica e dua na vavanikilipi me kau wavoki ena iSoqosoqo ni Veivukei. Au dau saini vakawasoma me’u veiqaravi. E a dua na sala me’u vakaraitaka kina na noqu lomasoli me’u “colata vata na nomudou icolacola” (Mosaia 18:8).

E sega ni cala ni vavanikilipi me’u sega ni rawa ni saini tale. Na ka dina, au sa sega sara ga ni sainitaka rawa na yacaqu. Ena vuku ni noqu vakaleqai tu vakayago, au sega mada ga ni rawa ni taura e ligaqu na vavanikilipi. E sega ni dua e namaka me’u sainitaka. Ia, isa, sa dua na ka na noqu vinakata! Na veiqaravi e ovici keda ena loloma ni Kalou ka semati keda vei ira na tani. Au gadreva sara vakalevu me’u vakila na isema vata o ya vakai au.

Baleta ni’u gadrevi ira na tamata me ra veivuke ni qaravi au, au nanuma na noqu veiqaravi e sega soti ni yaga me vakatauvatani kei na sasaga ena gadrevi mai vei ira tale eso me ra vukei au. Na vavanikilipi o ya a yaco me ivakananumi ni ka au na sega ni rawa ni cakava tale—me yacova na gauna a raica kina o noqu sisita dauveiqaravi na noqu gagadre.

A tarogi au o koya se cava au vinakata me’u cakava me’u veiqaravi kina, sega walega ni veika au gadreva me caka vei au. A qai sainitaka na yacaqu ena vavanikilipi. A lako mai ki vale o koya ka vukei au me’u cakava na kakana au a bolea tu me’u vakarautaka me baleti ira na tani. A sega vakadua ni vakatututaka me’u kakua ni vukei ira na tani baleta ni’u gadreva vakalevu cake na veivuke. E marautaka o koya na nona dau tiko vata kei au.

E muri, au qai kila ni sa yaga sara na noqu sasaga. Ena veivuke nei noqu sisita dauveiqaravi, au a rawa ni cakava kina e dua na ka. Kevaka e sega mada ni vakaibalebale kivua e dua tale na noqu veiqaravi, e a vakayacora edua na veisau vei au. E dina ga ni a sega ni yaga vakadodonu ki na noqu matavuvale se vakabula na yagoqu, e a vukea me vakabula na yaloqu.

EmRee Pugmire

Utah, Amerika

Ena Nona Veivuke, Sa na Rawa Kina ni O Cakava

the Old Testament prophet Enoch and people from the city of Zion

Sa kau cake na Koro ko Saioni, mai vei Del Parson; itaba ni iloilo ni vakalevutaki ka mai na Getty Images

Sa dau matau tu meda vakila ni da sega ni veiraurau me cakava na cakacaka ni Turaga. Na parofita o Inoki a vakila talega na ka o ya. Ni vakaroti koya na Turaga me kacivi ira na tamata me ra veivutuni, a lomaleqa baleta ni o koya “e gone ga, ka ra sa cudruvi au kecega na tamata; niu sa dau vosa malua” (Mosese 6:31).

Ia a yalataka na Turaga ni na tiko vata kei Inoki ka na tiko vata kei koya na Yalona, ka “au na vakadonuya na nomu vosa kecega; o koya,” a veisureti kina o Koya mo, “lako kina vata kei au” (Mosese 6:34).

A talairawarawa o Inoki ki na veika a vakarota na Turaga, ka yaco me dau vakayarayarataki ira vakalevu na tamata, sega ni baleta na nona kaukauwa ga ia e baleta “sa kaukauwa talega vakalevu na vosa sa solia vua na Kalou” (Mosese 7:13).

iVakavuvuli me Vakasamataki

Kevaka o vakataroga beka se vakaibalebale na nomu veiqaravi, vakasamataka mada na veivakavuvuli oqo:

1. Na kilai vakamatata ni veiqaravi kei na kena inaki ena vukei keda meda lewa cake vakadodonu na noda sasaga.

   • Na veiqaravi e sega walega ni baleta na taraicake ni veiwekani e qaqaco cake; ia e baleta na nodra vukei na tani me vaqaqacotaki na nodra veiwekani kei na iVakabula.¹

   • Na veiqaravi e sega walega ni dua na ilesilesi; ia sai koya na sala eda bulataka kina na noda veiyalayalati meda qaravi Koya ena noda veikauwaitaki vakaikeda.

   • Na veiqaravi e sega ni vakamuria e dua na ituvatuva sa lewai oti tu. E vakalevutaki keda ena noda moici keda ki na ituvaki ka vakasaqara na veivakauqeti me da veiqaravi me vaka ena vakayacora na iVakabula.

2. Na kilai vakamatata ni ivakarau e raica kina na Kalou na noda veiqaravi e rawa ni veisautaka na noda rai.

   • Na Kalou e sega ni vakarautaka na veiqaravi me yavutaki ena veika vakasakiti e basika kina se kevaka e mani taleitaki sara na noda sasaga (raica na ivakaraitaki nei Oliver Granger ena Vunau kei na Veiyalayalati 117:12–13).²

   • Ni sa vinaka na noda gagadre ka da sasaga dina, na noda veiqaravi ena vakaibalebale vei Koya (raica na Vunau kei na Veiyalayalati 4:2, 5).

   • Sa lomasoli na Kalou me vakalevulevuya na noda “veiqaravi e lailai se o koya e sega ni laurai”³ (raica na Vunau kei na Veiyalayalati 123:17).

Na Cava E Rawa Ni Da Cakava?

Vakaisosomitaka na nomu lomaleqataka na veika o nanuma ni o sega ni rawa ni cakava, kei na nomu vakasamataka ena masumasu na ka o rawa ni cakava. Qai cakacakataka. Ni ko cakacaka ena yaca ni Turaga, o Koya ena rawa ni vakalevulevuya na nomu sasaga ka vakayagataka me vakalougatataki iko kei ira na tani (raica na 2 Nifai 32:9).

Raica e Levu cake

Vulica eso tale na ka me baleta na veika e namaka vei keda na Kalou ena noda sasaga ni veiqaravi. Wilika na:

• Russell M. Nelson, “Veiqaravi ena Kaukauwa kei na Lewa ni Kalou,” Liaona, Me 2018, 68–70, 75.

• Jeffrey R. Holland, “Tiko Vata kei Ira ka Vakaukauwataki Ira,” Liaona, Me 2018, 101-3.

• Jean B. Bingham, “Veiqaravi me Vakataka na iVakabula,” Liaona,, Me 2018, 104-7.

iDusidusi

1. Raica na Russell M. Nelson,“Veiqaravi ena Kaukauwa kei na Lewa ni Kalou,” Liaona, Me 2018, 69-70.

2. Me da vulica eso tale na ka me baleti Oliver Granger kei na sala ni nona vakarautaka na Kalou na nona rawa ka, wilika na Boyd K. Packer, “The Least of These,” Liaona, Nove. 2004, 86–88.

3. Henry B. Eyring, “Rise to Your Call,” Liaona, Nov. 2002, 77.