Lako Mai, Mo Muri Au

Na Veivakalougatataki ni Vulici ni Veiyalayalati Makawa

Mai vei Peresitedi Mark L. Pace

Peresitedi Raraba ni Matawilivola ni Sigatabu

Ni da wilika na wase kei na veitiki ni ivolanikalou makawa oqo, eda na vaqaqacotaki vakayalo.

Jesus Christ with stars in background — Era bibi sara na yalayala nei Peresitedi Nelson, ka ra dina.

Ni sa kidavaki mai ki na vulici ni Veiyalayalati Makawa ni 2022, kei na ivurevure ni Lako Mai, Mo Muri Au me idusidusi! Na Veiyalayalati Makawa e dua na ikumuni ni ivolanikalou tabu ka sa maroroi tu mai na liga ni Kalou vei keda meda wilika ka vakasamataka vakatitobu. E rawa ni veivakalougatataki ka veidusimaki vei keda ena iotioti ni veisiga oqo.

Na Veiyalayalati Makawa e vakarautaka vei keda e 3,500-na yabaki ni dua na iyaloyalo rabailevu ni vakabauta kei na yalodina mai na 4,000 BC ki na 500 BC. E 39 na ivola e tiko ena Veiyalayalati Makawa. Nai Vakatekivu e kovuta na va na itabagauna i Atama, Inoki, Noa, kei Eparaama. Na vo ni 38 na ivola, Lako Yani ki na Malakai, era sa vagolei ki na itabagauna i Mosese.

Ni da wilika na Veiyalayalati Makawa, eda na veikilai vakavinaka cake kei ira na kena parofita kei na nodra ivakavuvuli. Era vakavulica na kosipeli i Jisu Karisito. Era parofisaitaka ka nanamaki mai ki na nona lako mai na Mesaia. Sa maroroi tu na nodra ivakavuvuli veivakauqeti me baleta na noda gauna.

Ni da wilika na veiwase kei na veitikina ena Veiyalayalati Makawa, eda na taqomaki vakayalo. Na Yalo Tabu ena vagolei keda ki na veitiki ni ivolanikalou bibi ka na vakaukauwataki keda ni da vakanamata tiko ki na iKarua ni Lako Mai ni iVakabula.

E Dua na Taro Veivakauqeti

Au vinakata me’u wasea e dua na italanoa me baleta na kena sa vakauqeti au ena noqu bula taucoko e dua na tikina mai na Veiyalayalati Makawa.

Ena 1974, au a yabaki 17 kina. Au a marautaka tiko na noqu bula vaka itabagone ena koronivuli torocake. Au a nanamaki tiko ki na noqu kaulotu. Ena mekasini na Ensign ni Okotova 1974, au a wilika kina e dua na itukutuku mana mai vei Peresitedi Spencer W. Kimball (1895–1985) ka kena ulutaga “Na Gauna ena Saumaki Kina na Vuravura.”¹ Au sa wilika oti vakavuqa tekivu mai na gauna o ya. Me yacova mai nikua e se dau vakauqeti au tiko ga.

A vakaraitaka o Peresitedi Kimball e dua na rai sa roboti vuravura raraba tu me baleta na tubu ni Lotu i Jisu Karisito ni Yalododonu Edaidai ena itabagauna oqo. E vakavuvulitaka me baleta na noda madigi kei na itavi me da kauta na kosipeli ki vuravura taucoko. A cavuta o Peresitedi Kimball e dua na tikina mai na ivola ni Vakatekivu. A vakauqeti au ena gauna oya ka se vakauqeti au tikoga ena loma ni noqu bula taucoko: “E dua beka na ka sa dredre vei Jiova?” (Vakatekivu 18:14, ka sa tuvai me vulici ena Feperueri).

A railesuva o Peresitedi Kimball na kedrau italanoa o Eparaama kei Sera. A dredrevaka o Sera na yalayala ni Turaga ni na dua na luvedrau tagane kei Eparaama. Erau a se sega ni vakalougatataki me rau vakaluveni. Ena gauna oqo, sa yabaki 90 ko Sera ka 100 ko Eparaama. Erau sa sivita sara na yabaki ni vakaluveni.

“A sa kaya vei Eparaama ko Jiova, A cava sa dredre kina ko Sera?”

“E dua beka na ka sa dredre vei Jiova? Au na lesu mai vei iko ena gauna sa lokuci, me vaka na kena gauna, ia ena dua na luvena tagane ko Sera” (Vakatekivu 18:13–14).

Erau a cakacakataka na vakabauta o Eparaama kei Sera. Sa maroroya na Turaga na Nona yalayala. A sucu ko Aisake. A yaco o Eparaama me tamadra e vuqa na veimatanitu.

Na Kaukauwa me Vorati na Bolebole

“E dua beka na ka sa dredre vei Jiova?” Na ivolanikalou ni Veiyalayalati Makawa oqo e dau vakaukauwataki au ni’u sotava na bolebole se nuiqawaqawa ni bula:

Ni’u se qai daukaulotu vou ena gauna au a dau luvuci kina. “E dua beka na ka sa dredre vei Jiova?”
Ni oti na noqu kaulotu, ni keirau vakasamataka tiko kei Anne Marie na vakamau ka lomaleqataka na kena saumi na kakana, rede, kei na icurucuru ni vuli ena koliji. “E dua beka na ka sa dredre vei Jiova?”
Ni se qai vakawati vou, ka kidavaki ira mai na gone ka kilai na icolacola vakailavo ni bula. “E dua beka na ka sa dredre vei Jiova?”
Sotavi tiko na bolebole ni koronivuli ni tauri ivola, tubucake tiko na matavuvale, kei na tekivutaki ni dua na cakacaka. “E dua beka na ka sa dredre vei Jiova?”
Ena gauna au a peresitedi tiko kina ni Tabana ni Kaulotu e Spain Barcelona, keirau dau cavuta vakawasoma kei Anne Marie na ivolanikalou oqo ni keirau dau vakavulici ira na daukaulotu. “E dua beka na ka sa dredre vei Jiova?” Na ivola vei ira na neitou daukaulotu e dau okati kina e dua na idusidusi “E dua beka na ka sa dredre vei Jiova?”

E Dua na Yavu Vaka i Volanikalou

reproduction of stone tablets with Ten Commandments

Na tiki ni ivolanikalou oqo e dua ga vei ira na vuqa na ivakaraitaki ni veitikina veivakauqeti ka kunei ena Veiyalayalati Makawa. Au kila ni vuqa era sa vakauqeti kemuni tiko. Ni da wilika ena gugumatua kei na masumasu na Veiyalayalati Makawa ena yabaki oqo, na Yalo Tabu ena kauta mai ki na noda vakasama na ikuri ni veitikina bibi ka na vaqaqacotaka na noda saumaki vei Jisu Karisito kei na Nona kosipeli.

Na Veiyalayalati Makawa e tiko kina na ivunau kei na ivakavuvuli ka tawa yalani rawa na kena bibi. E tiko kina na parofisai e se bera ni vakayacori. E vakavulica vei keda na vanua eda lako mai kina. Ka vakavulica vei keda na veiyalayalati vaka-Eparaama, ka se mana tikoga nikua.

Na Veiyalayalati Makawa e vakarautaka e dua na yavu ki na noda ivolanikalou tale eso. Na levu ga ni noda kila vinaka na Veiyalayalati Makawa, na levu cake ni noda kila na ivolanikalou tale eso, baleta na kena ivakavuvuli e basika ena veivola tale eso oqori ni ivolanikalou:

Ena Gauna ni Nona cakacaka vakalotu, a veivakatavulici na iVakabula ni vakayagataka na ivolanikalou mai na Veiyalayalati Makawa.
Eratou a kauta voli o Liai kei na nona matavuvale na peleti parasa, ka tu kina na ivolanikalou mai na Veiyalayalati Makawa.
A vakavulici Jekope o Nifai ena nona cavuta na vosa nei Aisea ena Veiyalayalati Makawa.
Ena Nona veisiko vei ira na Nifai ni oti Nona Tucaketale, a cavuvosa o Jisu Karisito mai vei Aisea kei Malakai ena Veiyalayalati Makawa.

beings appearing to Joseph Smith and Oliver Cowdery in Kirtland Temple

O ira na parofita kei na ivakavuvuli ena Veiyalayalati Makawa era sa uto talega ni itukutuku ni Vakalesui mai ni kosipeli ena noda gauna oqo:

Ena nona veisiko taumada vua na Parofita o Josefa Simici, a cavuta o Moronai na vosa nei Malakai.
Na Mataniciva Talei e tiko kina na ivola i Eparaama kei Mosese.
Eratou a solia na nodratou idola ni matabete o Mosese, Ilaisa, kei Ilaija vei Parofita Josefa Simici ena Valetabu e Kirtland.

Na Cava na kena iNaki?

Ni da wilika na ivola eso ena Veiyalayalati Makawa, e dodonu meda vakasamataka ni ivola era digitaki, vakamatatataki, ka tuvai ena dua na sala digitaki me baleta e dua na inaki ni vakasama e vakalou. Eda rawa ni tarogi keda vakadodonu, “Na cava na vuna e okati kina na itukutuku oqo kei na inaki cava e veiqaravi kina?”

E dina ni so na tiki ni Veiyalayalati Makawa ena dredre beka me da kila, e dodonu me da nanuma ni tu kina na veika talei ka sega ni dodonu me vakawaleni. Me vaka e vakavulica o Josefa Simici, “Keimami vakabauta ni vosa ni Kalou na iVolatabu, kevaka e vakadewataki vakadodonu” (Na Yavu ni Vakabauta 1:8). Eda sa vakalougatataki vakaidina ni da vulica na vosa ni Kalou!

Ena rawa ni veivuke ena noda vulica na Veiyalayalati Makawa me vakasaqarai na ulutaga kei na raititobu eso. E dodonu meda vakasaqara na sala meda kila vakavinaka cake kina ni Kalou ni Veiyalayalati Makawa sa Kalou talega ni Veiyalayalati Vou. O Jiova sai Jisu Karisito. E vukei keda vakacava na noda vulica na Veiyalayalati Makawa meda kila vakavinaka cake kina na noda iVakabula?

Eso tale na ulutaga lelevu au raica ena Veiyalayalati Makawa e oka kina na veiyalayalati, savasava, parofita bula, solibula kei na talairawarawa, vakabauta kei na veivutuni, vakacaucautaka na Turaga, kei na nona vakatulewa na Kalou.

Ni da vuli tiko, e dodonu meda nanuma tiko ni ivakatakila ni gauna oqo e vakarautaka vei keda edua na kila-ka matata ka taucoko baleta na Veiyalayalati Makawa. Me ivakaraitaki, sa dua na ka vinaka e solia vei keda na ivakatakila ni gauna oqo, eda mai kila kina ni o ira na parofita ni Veiyalayalati Makawa era a taura tu na Matabete i Melikiseteki kei ira na parofita ena veitabagauna yani ki liu era a kila ka vakavuvulitaka na kosipeli i Jisu Karisito.

Na Yalayala ni Dua na Parofita

Ena itabagauna oqo, eda sa vakalougatataki tale meda kila ni o ira na parofita kei na apositolo era vakarautaka na ivakavuvuli kei na ivakasala veivakauqeti.

A vakamacalataka taumada o Elder Quentin L. Cook ena Kuoramu ni iApositolo Le Tinikarua na Lako Mai, Mo Muri Au—Baleta na Tamata Yadua kei na Matavuvale ena koniferedi raraba ni Okotova 2018.² Na ivurevure oqo sa dua na veivakalougatataki cecere kivei keda kece sara. Na tolu na yabaki sa oti oqo sa vakarautaka vei au eso na gauna bibi ka vakaibalebale duadua ni vulici ni ivolanikalou ena noqu bula. Au kila ni veivakalougatataki vata oya e waraki keda yadua ena 2022.

E kaya o Peresitedi Russell M. Nelson ni da veisautaka na noda itikotiko me vanua tabu ni vakabauta ka itikotiko liu ni vulici ni kosipeli, eda na ciqoma e va na veivakalougatataki vakatabakidua:

“Ni toso tiko na gauna na nomu Siga ni Vakacecegu ena ka rekitaki vakaidina.”
“Era na nanamaki na luvemuni me ra vulica ka bulataka na ivakavuvuli ni iVakabula.”
“Ena malumalumu na veivakauqeti nei vu-ni-meca ena nomuni bula kei na nomuni itikotiko.”
Na veisau ena nomu matavuvale ena totoka ka veitokoni.”³

Era bibi sara na yalayala nei Peresitedi Nelson, ka ra dina. Sa yaco me ka dina na veivakalougatataki oqo ka na tomani tiko ena 2022 ni da vulica ka vuli mai na Veiyalayalati Makawa.