Haʻu, ʻo Muimui ʻIate Au
Ko Hai ʻa ʻĪnoke?
Ngaahi Fakatātā ʻa Denis Freitas
ʻOku fakahaaʻi ʻe he fuʻu ʻakau fakafāmili ko ʻení ha tangata ʻe toko ua ko ʻĪnoke ʻi he hako ʻo ʻĀtama mo ʻIví. ʻOku kehe e foha ʻo Keini ko ʻĪnoké, ko e mokopuna ʻo ʻĀtamá (vakai, Mōsese 5), mei he foha ʻo Sēleti ko ʻĪnoké, ʻa ia naʻe toʻu tangata ʻe ono meia ʻĀtama peá ne fokotuʻu e kolo ko Saioné (vakai, Mōsese 6–7).
Naʻe tali fēfē ʻe he palōfita ko ʻĪnoké hono uiuiʻí?
ʻI he taimi ne ui ai ʻa ʻĪnoke ke ne malanga ʻaki ʻa e fakatomalá, naʻá ne ongoʻi taʻefeʻunga, ʻo ne fakahā ki he ʻEikí ʻoku “tōʻohi [ʻene] leá” (Mōsese 6:31). Ka naʻe foaki ʻe he ʻOtuá kia ʻĪnoke ha mālohí mo talaʻofa ange, “Fakaava ho ngutú, pea ʻe fakafonu ia, pea te u foaki kiate koe ʻa ia ke ke lea ʻakí” (Mōsese 6:32). Naʻe omi ha tokolahi ke tui ki heʻene ngaahi leá, pea naʻe fokotuʻu ʻe ʻĪnoke ʻa e kolo ko Saioné.
ʻI he fakakaukau ʻa ʻEletā Tēvita A. Petinā ki he sīpinga ʻa ʻĪnoké, naʻá ne fakapapauʻi mai ai kiate kitautolu ʻoku ongoʻi lōmekina, taʻe taau, pe taʻe feʻunga ki ha uiuiʻi pe fatongia foʻoú “ʻoku ʻaonga tatau pē e talaʻofa ʻa e ʻEikí kia ʻĪnoké he … ʻahó ni” (“In the Strength of the Lord,” general conference, Oct. 2004).