Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Fakamolū ʻi he Falikí
Naʻe ʻikai ke u tokanga ki heʻeku tokoni ki heʻeku faʻeé ʻi heʻene ngāue fakaʻapí, ka ko e hā ne u faʻa maʻu maʻu ai pē ha pilo ʻi he falikí?
Kuo taʻu lahi ʻeku ʻaʻahi ki he ʻapi ʻeku faʻeé ke tokoni kiate ia ʻi heʻene ngaahi ngāue fakaʻapí. ʻOkú ne taʻu 80 pea ko ha mēmipa faivelenga ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Kuo nofo toko taha pē ʻeku faʻeé talu e mālōlō ʻeku tangataʻeikí. Ko ʻene fiefia lahi tahá ʻi heʻene ʻaʻahi ki he ʻapi ʻo ʻene fānau kotoa ʻe toko tolú, ʻo feohi mo kinautolu mo hono makapuná, mo hono ngaohi ʻo e meʻatokoni ʻokú ne fakafiefiaʻi ʻa e lotó.
Ko e taimi kotoa pē naʻá ku ʻaʻahi ai ki he fale ʻo ʻeku faʻeé ke fakamaʻa mo fakapapauʻi ʻoku maau ʻa e meʻa kotoa pē, naʻá ku maʻu ha fakamolū motuʻa ʻi he falikí. Ne u toutou toʻo hake ia ʻo hili ʻi ha saliote, ʻo lāunga loto pē fekauʻaki mo e taʻetokanga ʻeku faʻeé.
ʻI heʻeku toe foki mai ke ʻaʻahi mo tokoni ki heʻeku faʻeé, ne u toe maʻu pē e fakamoluú ʻi he falikí. Naʻe ʻikai ke u teitei lea ʻaki ha meʻa ki heʻeku faʻeé fekauʻaki mo e fakamoluú, ka ʻi ha pongipongi ʻe taha, ne u toki ʻiloʻi ai ʻa e ʻuhinga ʻoku ʻi he falikí maʻu ai peé.
Naʻe fie maʻu ʻe heʻeku faʻeé ha meʻa molū ke ne tūʻulutui ai ʻo lotu. Ko ha fefine toulekeleka ia, ka naʻe tataki ia ʻe heʻene tui taʻeueʻiá ke ne tūʻulutui ʻo lotu ʻi he ʻaho kotoa pē. Te ne lotua ʻene fānaú mo e makapuná. Te ne lotua hono ngaahi kaungāmeʻá. Te ne lotua ʻa kinautolu naʻe faingataʻaʻia tahá. Pea te ne lotua ʻa kinautolu naʻá ne ʻofa maʻu pē aí, pea naʻa mo hono taʻu motuʻá, naʻá ne kei tokangaʻi pē kinautolu.
ʻOku ʻikai ke u toe lāunga he ʻahó ni ʻi heʻeku sio ki he fakamoluú ʻi he falikí. ʻOku ou tūʻulutui ai he taimi ʻe niʻihi ʻo lotu ki he Tamai Hēvaní, ʻo fakahaaʻi ʻeku houngaʻia ʻi he tui mo e tā sīpinga ʻeku faʻeé.