Ngaahi Tefitoʻi Meʻa Mahuʻinga ʻo e Ongoongoleleí
Ko e Hingá ko ha konga ʻo e palani ʻa e ʻOtuá.
Koeʻuhí ko e Hingá, ʻoku tau haʻu ai ki he māmaní pea lava ke tau toe foki ʻi ha ʻaho ʻo nofo mo ʻetau Tamai ʻi Hēvaní.
Ko ʻĀtama mo ʻIvi ʻi he Ngoue ko ʻĪtení, tā fakatātaaʻi ʻe Robert T. Barrett; Kapusi ʻo ʻĀtama mo ʻIvi mei he Ngoué, tā fakatātaaʻi ʻe Gary L. Kapp, ʻoua naʻa hiki hano tatau; ʻĀtama mo ʻIvi, tā fakatātaaʻi ʻe Jay Bryant Ward; Ko e Toetuʻú, tā fakatātaaʻi ʻe Harry Anderson
Naʻe fekau ʻe he ʻOtuá kia ʻĀtama mo ʻIvi ʻi he Ngoue ko ʻĪtení, ke ʻoua naʻá na kai ʻa e ʻakau ʻo e ʻilo ʻo e leleí mo e koví. Naʻá Ne folofola ange leva, “ʻoku lelei ke [mo] fili [maʻamoua], … kae manatu ʻoku ou fakatapui ia” (Mōsese 3:17). Naʻe ʻahiʻahiʻi ʻe Sētane ʻa ʻIvi ke ne kai e fua ʻo e ʻakaú. Naʻá ne talaange kiate ia, “te [ke] tatau mo e ngaahi ʻotuá, ʻo ʻiloʻi ʻa e leleí mo e koví” (Mōsese 4:11). Naʻá ne kai ʻa e fuá peá ne vahevahe ia mo ʻĀtama. Naʻe tuku kinaua ki tuʻa ʻe he ʻOtuá mei he Ngoue ko ʻĪtení.
Ko e Hingá
ʻI he mavahe ʻa ʻĀtama mo ʻIvi mei he Ngoue ko ʻĪtení, naʻe ʻikai ke na toe ʻi he ʻao ʻo e ʻOtuá. ʻOku ui ʻa e mavahe ko ʻeni mei he ʻOtuá ko e mate fakalaumālié. Naʻe toe ʻuhinga foki ʻa e mavahe mei he ngoué ko e hoko ʻa ʻĀtama mo ʻIvi ʻo matelie pea naʻe malava ai ke na mate. Neongo naʻe ʻikai ke toe nofo ʻa ʻĀtama mo ʻIvi mo e ʻOtuá pea kuó na maʻu ha sino fakamatelie he taimí ni, ka naʻá na fiefia mo ʻamanaki lelei ʻi he taimi naʻá na ʻilo ai te na lava ʻo fakalakalaká (vakai, Mōsese 5:10–11). “Naʻe hinga ʻa ʻĀtamá koeʻuhí ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhí ke nau maʻu ʻa e fiefiá” (2 Nīfai 2:25)
Ko ha Taimi ʻo e ʻAhiʻahiʻi
ʻI he taimi ʻoku fanauʻi ai kitautolú, ʻoku tau mavahe ai mei he ʻOtuá, ʻo hangē pē ko ʻĀtama mo ʻIvi hili ʻa e Hingá. ʻOku ʻahiʻahiʻi kitautolu ʻe Sētane ke tau fakahoko ha ngaahi fili ʻoku kovi. ʻOku fakaʻatā ʻe he ngaahi ʻahiʻahi ko ʻení ke siviʻi kitautolu pea tau fili ʻi he totonú mo e halá (vakai, ʻAlamā 12:24). Ko e taimi kotoa pē ʻoku tau faiangahala ai pea ʻikai fakatomalá, ʻoku tau toe mamaʻo ange ai mei he Tamai Hēvaní. Ka ʻo kapau te tau fakatomala, ʻoku tau ofi ange ai ki heʻetau Tamai ʻi Hēvaní.
Mate Fakaesinó
Naʻe fakatupu ʻa e māmaní maʻatautolu (vakai, 1 Nīfai 17:36). Naʻe fakaʻatā ʻe he Hingá ke fakahoko ʻe ʻĀtama mo ʻIvi e fekau ʻa e ʻOtuá ke maʻu ha fānaú, ʻo fakaʻatā ai ke tau haʻu ki he māmaní ʻi ha sino fakamatelie. ʻE ʻi ai e ʻaho ʻe mate ai hotau sinó, ka ʻe kei moʻui pē hotau laumālié. ʻE toe fakataha hotau sinó mo e laumālié ʻi he taimi te tau toetuʻu aí.
Fakamoʻui ʻe Sīsū Kalaisi
Te tau lava ʻo ikunaʻi e mate fakaesinó mo fakalaumālié, ʻo fakafou ʻi he Fakalelei ʻa Sīsū Kalaisí. Koeʻuhí naʻe toetuʻu ʻa Kalaisi, ʻe toetuʻu ʻa e tokotaha kotoa pē ʻoku fāʻeleʻi mai ki he māmaní pea moʻui ʻo taʻengata. Pea koeʻuhí naʻe mamahi ʻa Kalaisi ko ʻetau ngaahi angahalá, te tau lava ʻo fakatomala pea fakamolemoleʻi kitautolu kae lava ke tau toe nofo fakataha mo ʻetau Tamai ʻi Hēvaní.