Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOku Nau Maʻu ha Tohi Molomona ʻi Heni!
ʻI heʻeku pukepuke e Tohi ʻa Molomoná ʻi hoku nimá, ne u ongoʻi hono fakamaʻamaʻa ʻeku ngaahi mafasiá ʻi he māfana ʻo e ʻofa ʻa e Fakamoʻuí.
Faitaaʻi ʻe Jacob A. Brown
ʻI ha ʻaho Tokonaki ʻe taha lolotonga e faʻahitaʻu momokó, naʻá ku fakaʻaongaʻi lelei mo hoku uaifí ha ʻaho laʻā mo momoko ke ma maheni lelei ange ai mo homa kaungāʻapí. Ne mau toki hiki mai ha maile ʻe lauiafe mei homau ʻapí ki he Matāfanga Fakahahake ʻo e ʻIunaiteti Siteití ke kumi ha ngaahi faingamālie fakaako mo fakangāue.
Naʻá ma fakakaukau ke ma lue ki ha ʻunivēsiti ofi mai pē kuo teʻeki ha taha ʻiate kimaua ʻe ʻaʻahi ki ai. Ne faifai pē peá ma maʻu e laipeli lahi ʻo e ʻunivēsití. ʻOkú ma manako he lautohí, pea naʻe fie ʻilo hoku uaifí, ko ha tokotaha ako mataʻitohi, pe ko e hā ha ngaahi maʻuʻanga tokoni te ne ala maʻu ki heʻene akó. Koeʻuhí naʻá ne ako e hisitōlia fakalotú, naʻá ma vakai takai ʻi he konga ʻo e ngaahi tohi fakalotu ʻo e laipelí. ʻI heʻema vakaiʻi ha niʻihi ʻo e ngaahi hingoa mālie ko ʻení, naʻá ku fakatokangaʻi ha kiʻi tohi takafi lanu pulū angamaheni.
“ʻOku nau maʻu ha Tohi Molomona ʻi heni!” Naʻá ku fanafana fiefia ange.
Ne u toʻo e tohí mei he funga laupapá. Ko ha tatau motuʻa ange ia, pea naʻá ku fifili pe ko e hā hono fuoloa ʻene ʻi aí. Ko e meʻa naʻá ne tohoakiʻi ʻeku tokangá ko ha kiʻi fakamatala makehe ne kuluuʻi ʻi loto he takafi muʻá.
Ko ha fakamatala ʻeni ʻo ha fakamoʻoni nounou ʻa ha ongomeʻa mali mei Pelekifuti, ʻAitahō, USA. Naʻá na fakamatalaʻi ʻi heʻena fakamoʻoní ʻa e Tohi ʻa Molomoná mo e ʻuhinga ʻoku mahuʻinga aí. Naʻá na vahevahe ha fakamoʻoni nounou mo mālohi ki he tohí, pea naʻá na fakaafeʻi ʻa e tokotaha laukongá ke lotu ke ne ʻiloʻi pe ʻoku moʻoni ia.
Naʻe mahinongofua pē ʻena ngaahi leá, ka naʻe fakapatonu ʻena pōpoakí ki hoku lotó. Mahalo naʻe ʻuhinga e ongo meʻá ni ke lau ʻena fakamoʻoní ʻe kinautolu ʻoku ʻikai kau ki heʻetau tui fakalotú. Mahalo ne na ʻoange e tatau ko ʻení ki ha taha ne na ʻiloʻi. Ko hai ʻokú ne ʻilo e tokolahi kuo nau maʻu ia kimuʻá pe ko e maile ʻe fiha kuo feʻaveʻaki holo ai ʻo toki aʻu mai ki he laipeli ʻo e ʻunivēsití?
ʻI heʻeku pukepuke e tohí ʻi hoku nimá, naʻe fakafonu ʻe he Laumālié hoku lotó. Naʻá ku ongoʻi ʻi ha kiʻi taimi siʻi, kuo matafi atu ʻeku ngaahi mafasiá ʻi he māfana ʻo e ʻofa ʻa e Fakamoʻuí.
ʻOku hokohoko atu hono fakamanatu mai ʻe he laipelí ʻi he ʻaho ko iá ʻa e ngaahi tāpuaki ʻoku ou maʻu ʻi hono lau ʻo e Tohi ʻa Molomoná pea mo e mahuʻinga ʻo hono vahevahe ʻeku fakamoʻoni ki aí. ʻE malava ke tō ʻetau fakamoʻoní ʻi ha ngaahi “potu makamaka” pe “kelekele lelei” (vakai, Mātiu 13:3–9), ka ʻoku mahuʻinga ke tau vahevahe ia. ʻE fakapapauʻi ʻe he ʻOtuá ʻe vahevahe kinautolu ʻi he taimi totonu, ʻi he feituʻu totonu, pea ki he kakai totonú.