Ko e Fua Fatongia ʻi he Siasí
Ko e Hā Ha Founga Te Mau Tokoni Atu Ai?
ʻOku nofo ʻa e tokotaha naʻá ne faʻú ʻi ʻIutā, USA.
ʻI heʻeku hoko ko ha faifekau kei talavoú, naʻá ku faʻa vakai ki he ngāue tokoní ko ha meʻa ke fakataimi-tēpileʻi kae ʻikai ko ha meʻa ke u fai ʻi he taimi ʻoku fie maʻu ke fakahoko aí.
Tā fakatātaaʻi ʻe Kathleen Peterson
Lolotonga ʻeku teuteu ke akoʻi ha lēsoni efiafi fakafāmili ʻi ʻapí, naʻá ku fie ʻoange ki heʻeku fānaú ha fakakaukau ki he ngaahi ʻahiʻahi mo e ngaahi faingataʻa fakaʻaho ʻo e ngāue fakafaifekaú. ʻI heʻeku fakaava hake ʻeku tohinoa ngāue fakafaifekaú ke kumi ha sīpinga leleí, ne u maʻu ai ha fakamatala fakanounou ʻo ha ʻaho angamaheni.
ʻUluakí, naʻá ku ʻalu mo hoku hoá ʻo ʻaʻahi kia Malia, ʻa ia naʻe fai ʻene fō. Naʻá ne kole mai, “Te mo lava ʻo toki foki mai ʻanai ange he pongipongí ni?”
Ne ma ō ʻo ʻaʻahi ki ha fiefanongo ʻe taha, ka naʻá ne mohe. ʻI heʻema foki ki he ʻapi ʻo Maliá he 11:30 pongipongi, naʻe kei fai pē ʻene foó.
Kimui ange ai, ʻi he 3:00 efiafi, ne ʻi ai haʻama ʻapoinimeni mo ha fiefanongo ʻe taha. ʻI heʻema aʻu atú, naʻe fai ʻene ngaahi lolo ʻaʻana.
Naʻá ne pehē mai, “ʻOku ou fuʻu femoʻuekina he taimí ni. Te mo lava ʻo toki vilo mai ʻanai ange?”
Naʻá ma foki ki he ʻapi ʻo Maliá, ka naʻe hoko atu ʻene ngāué ki he fufulu peletí. Ne ma ō leva ke ʻaʻahi ki ha fiefanongo ʻe taha ko Hono hingoá ko Sūnia. Naʻá ne femoʻuekina he feimeʻatokoní.
Naʻá ne pehē mai, “Fēfē ʻapongipongi?”
Naʻá ku hiki ʻi heʻeku tohinoá: “ʻOkú ma feinga ke palani lelei ʻaupito, fai homa lelei tahá ke tauhi ʻema ngaahi ʻapoinimení, pea faʻu ha palani E mo ha palani F. ʻOkú ma lotua ha ueʻi fakalaumālie. Kuo pau pē ke ʻi ai ha founga ʻaonga ange ke tokoniʻi ʻaki e kakaí.
ʻI heʻeku toe lau e ngaahi aʻusia ko iá ʻi heʻeku matuʻotuʻa angé, naʻá ku kata. Hangē ne ʻikai toe fuʻu mahuʻinga e lēsoni naʻá ku fakataumuʻa ke akoʻi ki heʻeku fānaú fekauʻaki mo hono fakatupulaki ʻo e loto vilitaki ke fehangahangai mo e taʻefiemālie he taimi ní, ʻi he lēsoni ne u toki akó.
Kuo ngali fakaoli kiate au he taimí ni ʻa e kole fakamātoato ne u fai ʻi he taʻu ʻe 30 kimuʻá. Naʻe maʻu pē ʻa e tali ki heʻeku loto-hohaʻá ʻi heʻeku kolé. ʻI heʻeku fakakaukau ki heʻeku kei talavou angé, ne u pehē, “ʻEletā Siakisoni, fēfē kapau naʻá ke feinga ke tokoniʻi e kakaí ʻaki haʻo tokoniʻi kinautolu ʻi he taimi ʻo ʻenau faingataʻaʻiá?”
ʻI he ʻahó ni, kapau naʻá ku fakatokangaʻi mo hoku hoá e fō mo e fufulu peleti ʻa Maliá, ne ma mei pehē ange, “Ko e hā ha founga te ma lava ʻo tokoni atu ai?”
ʻI he ʻaho ní, kapau naʻe femoʻuekina ʻa e tangata naʻá ma fakataimi-tēpileʻi ke ʻaʻahi ki aí ʻi he ngaohi loló, te ma pehē ange, “Te ke lava ʻo akoʻi kimaua? Te ma fiefia ke tokoni atu!”
ʻI he ʻaho ní, kapau ne ma sio ʻoku femoʻuekina ʻa Sūnia ʻi hono teuteu ʻo e meʻakaí, te ma pehē ange, “ʻOkú ma ʻi hení ke tokoni atu! Ko e hā te ke loto ke ma fakahokó?
ʻI heʻeku hoko ko ha faifekau kei talavoú, naʻá ku faʻa vakai ki he ngāue tokoní ko ha meʻa ke fakataimi-tēpileʻi kae ʻikai ko ha meʻa ke fai ʻi he taimi ʻoku fie maʻu ke fakahoko ai iá. ʻOku ou feinga he ʻahó ni ke akoʻi e kakaí fekauʻaki mo e ʻofa ʻa Sīsū Kalaisí ʻaki hono fakahaaʻi kiate kinautolu ʻEne ʻofá.