Fakaʻilekitulōnika Pē: Kakai Lalahi Kei Talavoú
Founga Naʻe Tokoniʻi ai ʻe he BYU–Pathway ʻa e Kakai Lalahi Kei Talavoú ke Fakatupulaki ʻEnau Tuí
Ko e akó ʻa e founga ne liliu ai ʻe he fānau ako ʻe toko tolu ko ʻení ʻa e fakapoʻulí ki he māmá.
Loto-Veiveiuá. Fakapoʻulí. Vete Malí. Loto-mafasiá. Naʻe fehangahangai ha kakai lalahi kei talavou ʻe toko tolu mei he funga ʻo e māmaní mo e ngaahi tūkunga faingataʻa ko ʻení ʻi heʻenau lēsisita ʻi he BYU–Pathway Worldwide. Pea ʻi he polokalama mataʻitohi ʻi he ʻinitanetí, naʻe ʻikai ngata pē ʻi heʻenau hoko atu ʻenau akó, ka naʻa nau maʻu foki ha nonga lahi ange pea ʻiloʻi—pe toe ʻiloʻi—ʻa e maama ʻo e ongoongoleleí.
ʻOku fakaafeʻi kitautolu ʻe he ʻEikí ke tau “fekumi ki he ʻiló, ʻio, ʻi he ako pea ʻi he tui foki” (Tokāteline mo e Ngaahi Fuakava 88:118; tānaki atu hono fakamamafaʻí). Lau ʻa e founga naʻe fai ʻaki ʻe he kakai lalahi kei talavou ko ʻení pea mo e founga naʻe tataki ai kinautolu ʻe he fekumi ki he akó mo e ako māʻolunga angé ki ha mālohi ʻoku māʻolunga angé.
Fakafonu ʻaki e Māmá
Ko Tuaiti (lotomālie) mo ʻene faʻeé mo hono kaungāmeʻa ko Sefí ʻi hono ʻaho papitaisó.
Laʻitaá ʻi he angalelei ʻa Dwight G.
Ne u tupu hake ʻo ako e ngaahi tuʻunga ʻulungaanga mahuʻinga faka-Kalisitiané. Naʻá ku ʻiloʻi naʻe fakatupu au ʻe he ʻOtuá pea te Ne maluʻi au ʻi heʻeku tauhi ʻEne ngaahi fekaú. Ka naʻe faifai pē peá u hē mei heʻeku tuí pea fonu ʻi he loto veiveiuá. ʻI he 2020, naʻe fakamatalaʻi mai ʻe hoku kaungāmeʻa ko Sefí, ʻa ia ko ha mēmipa ʻo e Siasí, ʻa BYU–Pathway Worldwide kiate au, ʻa e founga ʻe lava ke tokoni ai ki he kau akó ke nau ako e lea faka-Pilitāniá mo maʻu ha mataʻitohi BA ʻi he ʻinitanetí.
Naʻá ku fie ako lahi ange!
ʻI hoku fonuá, ko e tokolahi taha ʻo e toʻu tupú ʻoku ʻikai ke nau lava fakapaʻanga ke ʻalu ki muli ke maʻu ha ako lelei ange. Ko e BYU–Pathway ʻa e founga naʻe ʻikai ke u ʻilo naʻá ku fie maʻú. Naʻe fetongi ʻeku manavasiʻi ki he kahaʻú ʻaki ha ʻamanaki lelei foʻou naʻe maamangia ʻi hoku lotó, pea naʻá ku ʻiloʻi kuo teʻeki liʻaki au ʻe he ʻOtuá.
Naʻá ku ako ha ngaahi tōʻonga mo ha ngaahi taukei mahuʻinga lahi ʻi heʻeku ngaahi kalasí, hangē ko e founga ke tokangaʻi ʻaki ʻeku ngaahi meʻa fakapaʻangá, fakaleleiʻi ʻeku lea faka-Pilitāniá, pea hoko ko ha tokotaha ngāue totongi lelei. Naʻe vave ʻeku ʻiloʻi ʻoku ʻikai ngata pē ʻi he hoko ʻa BYU–Pathway ko ha fononga fakaako ka ko ha fononga fakalaumālie foki. Naʻá ku ako foki ʻi heʻeku ngaahi kalasí fekauʻaki mo Nīfai mo e kau palōfita ʻo onopōní pea naʻá ku ʻiloʻi naʻe moʻoni ʻenau ngaahi akonakí. Pea naʻá ku fakatokangaʻi, kapau naʻá ku fie maʻu ke mahino kakato ʻa e meʻa naʻá ku akó, naʻe fie maʻu ke u ako lahi ange fekauʻaki mo e Siasí.
Naʻá ku vahevahe ʻeku ngaahi ongó mo Sefi, pea naʻá ne fetuʻutaki leva ki he ongo faifekau taimi kakató. Naʻe fakafonu au ʻe heʻeku ako mo e ongo faifekaú ʻi he ʻaho kotoa pē ʻaki ha maama naʻá ne fakamāmaʻi ʻeku vakai ki he māmaní. Naʻá ku hangē ha kiʻi tamasiʻi naʻe heé pea fāifai pea foki mai ki ʻapí. Naʻá ku ʻiloʻi ko e foha au ʻo e ʻOtuá, ʻoku ʻi ai ʻeku taumuʻa, pea ʻoku ʻi ai ha tohi ʻe taha (ko e Tohi ʻa Molomoná) naʻe hiki ʻe ha kakai he kuonga muʻá naʻa nau lekooti ʻa e ngaahi mana naʻe ʻomi ʻe he Tamai Hēvaní mo Sīsū Kalaisi maʻanautolú.
Naʻe faifai pea papitaiso mo hilifakinima au ko ha mēmipa ʻo e Siasi ʻo Sīsū Kalaisí. Pea kuo aʻusia ʻe heʻeku tui kia Sīsū Kalaisí ha tuʻunga māʻolunga naʻe ʻikai ke u teitei fakakaukau ʻe malava.
Dwight G., Maritime, Togo
Foki ki he Hala Fakaʻofoʻofa ʻo e ʻEikí
Laʻitaá ʻi he angalelei ʻa Stefanie D.
Naʻá ku hoko maʻu pē ko ha mēmipa mālohi ʻo e Siasí, ka ʻi he hili ʻeku vete malí, naʻe ʻikai ke u toe tokanga ki he palani ʻo e fakamoʻui ʻa e Tamai Hēvaní mo ʻeku tuí. Naʻá ku fetaulaki mo ha taha, pea kamata ke ma nofo fakataha. Ne liliu kakato ʻeku moʻuí. Naʻá ku ongoʻi naʻá ku ʻi he fakapoʻulí kakato, pea ʻikai ke u toe ʻalu ki he lotú koeʻuhí naʻá ku ongoʻi naʻe ʻikai totonu ke u ʻi ai.
Ka naʻe hokohoko atu pē ʻeku ʻalu ki he ʻinisititiutí. Pea ʻi he lolotonga ʻo e taimi ko ʻení, naʻe fakaafeʻi au ʻe ha faifekau ngāue tokoni naʻá ku fetaulaki mo ia ʻi he ʻinisititiutí ke u kau atu ki he BYU–Pathway. Naʻá ku kiʻi momou, ka naʻá ne palōmesi mai te ne liliu ʻeku moʻuí. Ko ia ne u fakakaukau ke u ʻahiʻahiʻi ia ʻi ha semesitā ʻe taha. Ka neongo ia, naʻe ʻikai fuoloa kuó u maʻu ʻeku fuofua pēpeé pea naʻe ʻikai ke u ʻilo pe ʻe anga fēfē haʻaku hoko ko ha faʻē foʻou fakataha mo e feinga akó, ko ia naʻá ku liʻaki ai ia.
Ne u manatuʻi kimui ange ʻa e ongo lahi ne u maʻu lolotonga e semesitā ko iá. Naʻá ku ongoʻi ofi ʻaupito ki he Tamai Hēvaní pea naʻá ku fie maʻu ʻa e ongo ko iá. Hili ha taʻu ʻe taha mei ai, naʻá ku toe kamata foʻou ʻa BYU–Pathway, pea naʻe lahi ha ngaahi tāpuaki ne u maʻu ʻi heʻeku moʻuí hili pē iá.
Naʻá ku kamata ha founga fakaʻofoʻofa ʻo e fakatomalá, mali mo e tangata naʻá ku nofo mo iá, pea aʻu ʻo maʻu ʻeku lekomeni temipalé. Naʻe ui au kimui ange ke u hoko ko e palesiteni ʻo e Fineʻofá. ʻOku ou hoko he taimí ni ko ha faiako ʻinisititiuti mo saiʻia ai! Kuo ako lahi ange foki hoku husepānití fekauʻaki mo e ongoongolelei ʻo Sīsū Kalaisí.
Te tau lava ʻo maʻu ʻa e ʻilo kotoa pē ʻoku tau ako ki aí ʻi he moʻui ka hokó (vakai Tokāteline mo e Ngaahi Fuakavá 130:18–19). ʻOku ʻikai ko ha ako pē ʻa e BYU–Pathway—naʻá ne fakafoki mai au ki he hala fakaʻofoʻofa ʻo e ʻEikí.
Stefanie D., Wanica, Suriname
Mei he Fakapoʻulí ki he Loto-falalá
Laʻitaá ʻi he angalelei ʻa Dane W.
ʻI he akoʻanga māʻolungá, naʻá ku fefaʻuhi mo e loto-hohaʻá mo e loto-mafasiá, ko ia ne u iku ʻo nofo mei he akó. Naʻá ku fakamamaʻo mei he Siasí pea mo hoku fāmilí ʻi ha taʻu nai ʻe nima. ʻI he meimei taimi ko iá, naʻá ku kamata fakaʻaongaʻi foki ʻa e faitoʻo taʻe fakalaó mo e kava mālohí ke matuʻuaki ʻa e ongo fakataʻelata naʻá ku maʻú.
Ko ha taimi faingataʻa lahi ia.
ʻI ha taimi ʻe taha, naʻe ʻiloʻi ai ʻe heʻeku faʻeé ʻa e BYU–Pathway Worldwide pea kamata ke ne fakalotolahiʻi au ke u toʻo ia. Naʻe hoko ʻa e akó ko ha meʻa naʻá ku fie maʻu maʻu pē, ka naʻe taʻeʻaonga ʻeku loto falalá ʻi he ngaahi meʻa ne u aʻusia kimuʻa mo e akó.
Naʻá ku fakataʻeʻaongaʻi e tokoni ʻeku fineʻeikí ʻi he kamataʻangá, ka ʻi he uike pē ko iá, naʻá ku fakasio ai ʻa e BYU–Pathway ʻi he ʻinitanetí. Naʻe hangē ia ha meʻa lelei moʻoni kiate aú. Neongo ʻeku loto veiveiuá, ka naʻá ku fakakaukau ke u toʻo ia. ʻI he taimi tatau, naʻá ku kamata ngāue ke toe fakafenāpasi ʻeku moʻuí mo e ongoongoleleí.
ʻI heʻeku fuofua kamata ʻeku ngaahi kalasí, naʻá ku ongoʻi faikehe mo taʻeoliʻia. Kuo taʻu lahi ʻa e ʻikai ke u mālohi ʻi he Siasí, ka ko e kakai ʻi heʻeku ngaahi kalasí naʻa nau haʻu mei he ngaahi faʻahinga kehekehe ʻo e moʻuí mo fakahaaʻi mai naʻe ʻikai fie maʻu ia ke u haohaoa ka u toki ʻi ai.
Ne ʻikai fuoloa kuo kamata ke u ongoʻi lahi ange ʻa e Laumālié pea hangē naʻe huʻu ʻa e ngaahi meʻá ki he feituʻu totonú. Kimuʻá, ne u ongoʻi hangē ne ʻikai ke u lava ʻo fai e meʻa kotoa ʻi he moʻuí. Ka ko e fuofua taimi ia ʻi ha taimi lōloa, naʻá ku ongoʻi ʻo hangē kuó u fakalakalaka fakaʻatamai mo fakalaumālie fakatouʻosi.
Naʻe tokoniʻi au ʻe heʻeku ongoʻi e Laumālié ʻi heʻeku akó ke u toe feongoongoi mo ʻeku fakamoʻoní mo ʻomi ha mahino ki hoku ʻatamaí. Koeʻuhí naʻá ku ʻiloʻi naʻe ʻiate au ʻa e Tamai Hēvaní mo Sīsū Kalaisi, naʻá ku maʻu ʻa e loto falala ke fai ha ngaahi meʻa naʻe ʻikai ke u fakakaukau te u lava ʻo fai kimuʻa ʻi hono ʻākilotoa au ʻe he fakapoʻulí. Hili e meʻa kotoa ne u fouá, ne ʻikai ke u teitei ongoʻi te u aʻusia ʻa e akó—naʻe liliu ia ʻe BYU–Pathway mo tokoniʻi au ke u toe tui kiate au mo Sīsū Kalaisi.
Dane W., Utah, USA
Naʻe akonaki ʻa Palesiteni Lāsolo M. Nalesoni ʻo pehē:
“Hoko atu hoʻo akó ko ha meʻa mahuʻinga ʻi he tuʻunga māʻolunga tahá. Maʻu ʻa e ako kotoa te ke ala lavá. ʻI heʻetau hoko ko e Kau Māʻoniʻoni ʻi he Ngaahi ʻAho Kimui Ní, ko e akó ko ha fatongia fakalotu ia. …
“Ko ho poto fakatāutahá—ho tuʻunga fakatāutahá—ʻoku taʻengata mo fakalangi ia (vakai Tokāteline mo e Ngaahi Fuakavá 93:29).”1
Makehe mei he BYU–Pathway Worldwide, ʻoku lahi ha ngaahi faingamālie ako ʻi he Church Educational System pe ʻi ho ʻēlia fakalotofonuá. Tatau ai pē pe ko e fē ʻa e hala fakaako ʻokú ke filí, ʻe hanga ʻe he fekumi ki ha ngaahi faingamālie ke fakamālohia ho ʻatamaí mo e tuí ʻo faitāpuekina koe mo ho fāmilí, ʻo ʻikai ʻi he moʻuí ni pē ka ʻi he taʻengatá!