Maʻá e Ngaahi Mātuʻá
Ko Hono Akoʻi e Ngaahi Talaʻofa ʻa e ʻOtuá
Siʻi Ngaahi Mātuʻa,
ʻE lava ke tau takitaha ʻunu ke ofi ange ki he ʻOtuá ʻi heʻetau fai e ngaahi fuakava mo Iá. ʻE lava ke tokoni atu e makasini ʻo e māhina ní ke ke akoʻi hoʻo fānaú fekauʻaki mo e ngaahi fuakava naʻe fai ʻe he ʻOtuá mo Hono kakaí ʻi he kuonga muʻá pea pehē ki he ngaahi fuakava ʻoku tau fai mo Ia he ʻaho ní. ʻE lava ke tokoni atu ʻa e ngaahi fakakaukau ʻi laló ke ke aleaʻi mo hoʻo fānaú ʻa e ngaahi fuakavá pea tuʻu maʻu ʻi he ngaahi taimi faingataʻá.
Fealēleaʻaki ʻi he Ongoongoleleí
Hoko ko ha Kakai ʻo e Fuakavá
Ke akoʻi ʻa e ngaahi fakakaukau ʻi he “Ngaahi Tefitoʻi Meʻa Mahuʻinga ʻo e Ongoongoleleí” ʻi he peesi 10, te ke lava ʻo tā ha hala ʻoku fakatau ki hēvani. Tuku ha ngaahi fakaʻilonga ʻi he halá ke ne fakafofongaʻi ʻa e ngaahi ouau mahuʻinga, hangē ko e papitaisó, pea mo e ngaahi fuakava ʻoku tau fakahoko fekauʻaki mo iá. Ko e hā ʻe lava ke fai ʻe hoʻo fānaú ke teuteu ai ki honau ouau hokó? ʻOku teuteuʻi fēfē kitautolu ʻe heʻetau tauhi e ngaahi fuakava kuo tau ʻosi faí ke fai mo ha toe ngaahi fuakava kehe? ʻOku tokoniʻi fēfē kitautolu ʻe heʻetau ngaahi palōmesi mo e ʻOtuá ke tau ofi kiate Iá?
Te ke lava foki ʻo vahevahe ʻa e ngaahi tefitoʻi moʻoni mei he fakamatala ʻa Niila L. ʻEnitaseni ʻi he peesi 6. Ko e hā ha ngaahi tāpuaki mo ha ngaahi fatongia ʻoku maʻu mei he hoko ko e konga ʻo e kakai fuakava ʻa e ʻOtuá?
Fehangahangai mo e Ngaahi Faingataʻá ʻi he Tuí
Lau ha niʻihi ʻo e ngaahi lea mei he fakamatala ki hono fakatupulaki ʻo e loto-vilitakí (peesi 16). Fakaafeʻi e kau mēmipa ʻo e fāmilí ke nau vahevahe ʻo kau ki ha taimi ne tāpuekina ai kinautolu ʻi heʻenau vilitaki atu ʻi ha meʻa faingataʻa. Pea aleaʻi leva ʻa e ngaahi fehuʻi ko ʻení: Naʻe tokoniʻi fēfē koe ʻe he ʻOtuá ʻi he taimi faingataʻa ko iá? Ko e hā ʻoku tau ako mei he fakamatala ko ʻení ʻe lava ʻo tokoni ke tau laka ki muʻa ʻi he taimi ʻoku tau faingataʻaʻia ai, fai ha ngaahi fehalaaki, pe tōnounoú? Ko e hā mo ha toe meʻa te tau lava ʻo fai ke teuteu fakafāmili ai ki he ngaahi faingataʻa ʻe ala hoko maí?
Te ke lava foki ʻo lau ʻa e fakamatala ʻa ʻEletā ʻOsailani ʻi he peesi 42 ke ako fekauʻaki mo e ʻuhinga ʻo e maʻu “ha loto-mafesifesí” (3 Nīfai 9:20). ʻOku tokoniʻi fēfē kitautolu ʻe he loto-fakatōkilaló ke tau ikunaʻi hotau ngaahi faingataʻaʻiá?
Tokoni ki he Haʻu, ʻo Muimui ʻIate Aú
Vakai ki he peesi 46–48 ke ako lahi ange fekauʻaki mo e ʻaʻake ʻa Noá mo e ngaahi naunau kehe ke poupouʻi ʻaki e ako fakauike ho fāmilí ʻa e Haʻu, ʻo Muimui ʻIate Aú .
Fiefia Fakafāmili ʻi he Haʻu, ʻo Muimui ʻIate Aú
ʻOku ʻOmi ʻe he Vahehongofulú ʻa e Loto-houngaʻiá
ʻOku tau lau ʻi he Sēnesi 14:20, naʻe totongi vahehongofulu ʻa ʻĒpalahame. Kuo akoʻi ʻe ʻEletā Tēvita A. Petinā ko e ngaahi tāpuaki fakalaumālié “ʻoku huaʻi mai … ʻi he matapā ʻo e langí pea ki heʻetau moʻuí ʻi heʻetau tauhi e fono ʻo e vahehongofulú” (“Ko e Ngaahi Matapā ʻo e Langí,” Liahona, Nōvema 2013, 18).
-
Aleaʻi fakafāmili ʻa e ngaahi tāpuaki kuo mou mamata ai ʻi hoʻomou talangofua ki he fono ʻo e vahehongofulú.
-
Tuku ki ha taha ke ne hiki e ngaahi tāpuakí.
-
Mou toe vakaiʻi fakataha ʻa e lisí pea aleaʻi ha niʻihi ʻo e ngaahi founga ʻoku ʻai ai ʻe he ngaahi tāpuakí ni ke toe lelei ange hoʻomou moʻuí.
Naʻe akoʻi foki ʻe ʻEletā Petinā “ko e tāpuaki ʻoku ʻikai ke fakatokangaʻi kae mahuʻinga ʻoku tau maʻú [ʻi heʻetau fakaʻapaʻapaʻi e fono ʻo e vahehongofulú] ko e foaki fakalaumālie ia ʻo e loto-houngaʻia ʻa ia ʻoku malava ai … ʻo fakangatangata e ngaahi meʻa ʻoku tau holi ki aí. ʻOku fonu ʻa e tokotaha loto-houngaʻiá ʻi he fiemālié” (“Ko e Ngaahi Matapā ʻo e Langí,” 18). Kuo vakai fēfē ho fāmilí ki he loto-houngaʻiá ko ha tāpuaki ʻo e totongi vahehongofulú?
Fanga Monumanu ʻa Noá—Ngaahi Fehuʻi ʻe 20
Naʻe ʻoange ʻe he ʻEikí kia Noa ha ngaahi fakahinohino pau ke teuteuʻi ia mo hono fāmilí ki he lōmaki ʻe hoko maí. “Pea naʻe fai ʻe Noa ʻo hangē ko ia kotoa pē naʻe fekau ʻe [he ʻEikí] kiate iá” (Sēnesi 7:5). Neongo naʻe ʻikai ha fakamoʻoni ʻo e ʻuhá, ka naʻe fanongo ʻa Noa ʻo ne tānaki ʻa e fanga monumanú ki he ʻaʻaké.
-
Fakamatalaʻi nounou ʻa e talanoa ʻo Noa mo e ʻaʻaké (vakai, Sēnesi 6-8). Aleaʻi e founga naʻe fekauʻi ai ʻa Noa ke tokoni ki he fanga monumanú ke nau hū ki he ʻaʻaké (vakai, Sēnesi 6:20; 7:14).
-
Fakahingoa e faʻahinga kehekehe ʻo e fanga monumanu naʻe mei lava ke ʻomi ʻe Noa ʻi he ʻaʻaké.
-
Fai leva ha kiʻi vaʻinga fehuʻi ʻe 20 mo ho fāmilí. Tuku ki ha taha ke ne fakakaukau ki ha monumanu naʻe ʻi he ʻaʻaké. ʻE taufetongi ʻa e taha kotoa ʻi hono ʻeke ha ngaahi fehuʻi ʻoku tali ʻio pe ʻikai ke feinga ke mateʻi ʻa e monumanú.
-
Hokohoko atu hono fai ʻo e ngaahi fehuʻí kae ʻoua kuo mateʻi ʻe ha taha ʻo tonuʻa e monumanú pe ko e aʻu ʻo 20 ʻa e ngaahi fehuʻi kuo ʻeké.
-
Toutou fakahoko pē ʻa e foʻi vaʻingá kae ʻoua kuo maʻu ʻe he tokotaha kotoa ha [faingamālie] ke fakakaukau ki ha monumanu.
Fealēleaʻaki: Ko e hā ha ngaahi founga naʻe ngāue ai ʻa Noa ʻi he tuí? Ko e hā ha ngaahi meʻa kuo kole mai ʻe he Tamai Hēvaní ke tau fakahokó? ʻE tāpuekina fēfē kitautolu ko ha ngaahi fāmili ʻi heʻetau muimui ki he ngaahi akonaki ʻa Sīsū Kalaisí?