Haʻu, ʻo Muimui ʻIate Au
Ngaahi Fakataipe ʻi he Fuakava Motuʻá
ʻOku ngāue ʻaki ʻe he ngaahi folofolá ʻa e fakataipé ke akoʻi e ngaahi tefitoʻi moʻoni mahuʻingá. ʻE lava ʻe he mahino ki he ngaahi fakataipe ʻi he Fuakava Motuʻá ʻo fakatupulaki hoʻo aʻusia ʻi he laukongá, fakaloloto ange hoʻo mahino ki he ngaahi moʻoni ʻo e ongoongoleleí, mo fakalahi hoʻo houngaʻia ʻi he ngaahi folofola ʻa e ʻEikí.
ʻE lava ke fakaʻuhingaʻi ha ngaahi fakataipe ʻe niʻihi ʻi ha ngaahi founga kehekehe. ʻOku mahuʻinga ke manatuʻi ʻe hanga ʻe he ngaahi fakaʻuhinga totonu ʻo e ngaahi fakataipé ʻo langa mei he meʻa kuo akoʻi mahino ʻe he ngaahi folofola kehé mo e kau taki hotau Siasí.
Ko ha ngaahi fakataipe ʻeni ʻe fā te ke ako ki ai ʻi he laukonga ʻo e Haʻu, ʻo Muimui ʻIate Au ʻi he māhina ní.
Vaʻa ʻŌlivé
Takai fakatoʻomataʻu mei he tafaʻaki toʻohema taupotu taha ki ʻolungá: ʻū laʻitā ʻa iStock.com/RayTango; James Jeffrey; Matt Reier; mo Stephen Peel
ʻOku toutou fakamatala ʻa e folofolá ki he ngaahi fuʻu ʻōlivé. ʻOku fakataipe ʻe he ngaahi fuʻu ʻōlivé ʻa e fale ʻo ʻIsilelí, pea “ʻoku fakamahuʻingaʻi fakaemāmani lahi ʻa e vaʻa ʻōlivé ko ha fakataipe ʻo e melinó.”1 Ko e vaʻa ʻōlivé ʻa e fuofua ʻakau naʻe lau ki ai hili ʻa e Lōmakí (vakai, Sēnesi 8:11), ʻo fakataipe ne toe fakafoki mai ʻa e melinó ki he māmaní ʻi he maha ʻa e vaí.
ʻUmatá
Hili ʻa e Lōmakí, naʻe tuku ʻe he ʻOtuá ha ʻumata ʻi he langí (vakai, Sēnesi 9:12–17). Naʻe mahulu hake ʻa e ʻumatá ʻi ha meʻa fakaʻofoʻofa pē ke vakai ki ai; ko ha fakaʻilonga ia ʻo e talaʻofa ʻa e ʻOtuá he ʻikai toe ʻufiʻufi ʻa e māmaní ʻi ha lōmaki pea ʻe toe ʻafio pē ʻa e ʻEikí ʻi māmani (vakai, Liliu ʻe Siosefa Sāmita, Sēnesi 9:21–25 [ʻi he Joseph Smith Translation appendix]).
Sipí
ʻI he taimi naʻe kole ai kia ʻĒpalahame ke ne feilaulau ʻaki ʻa ʻAisaké, naʻe ʻomi ʻe he ʻOtuá ha sipi ke feilaulauʻi ia kae tuku ʻa ʻAisake (vakai, Sēnesi 22:13–14). Hangē ko hono fakamatala ʻe Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí: “Koeʻuhí ko ʻetau ngaahi angahalá mo ʻetau moʻui fakamatelié, ʻoku fakamalaʻiaʻi kitautolu ki he maté. ʻI he taimi ʻoku mole kotoa ai e ʻamanaki leleí, ʻoku ʻomi ʻe heʻetau Tamai Hēvaní ʻa e Lami ʻa e ʻOtuá, pea ʻoku fakahaofi kitautolu ʻi heʻene feilaulaú.”2
Mata-vai
ʻI he Sēnesi 26, te ke lau ai fekauʻaki mo e ngaahi vaikeli ʻa ʻAisaké. ʻOku faʻa fakataipe ʻe he vaí ʻa ʻetau fakafalala ki he Fakamoʻui ko Sīsū Kalaisí. “Hangē ko e mahuʻinga ʻo e vaí ki he moʻui fakatuʻasinó, ʻoku pehē hono mahuʻinga ʻo e Fakamoʻuí mo ʻEne ngaahi akonakí (vai moʻuí) ki he moʻui taʻengatá.”3