“ʻE Lava Ke u Tokoni Atu?”
ʻI heʻeku fanongo ki he leʻó, naʻá ku manatuʻi ne u toki maʻu kimuí ni mai ʻa e meʻa-foaki ʻo e Laumālie Māʻoniʻoní.
Tā fakatātā mei he Getty Images
Hili ha māhina nai ʻe ua mei hoku papitaisó, naʻá ku kolosi ʻi ha hala lahi ʻi ha luelueʻanga ʻo ha hala fakakavakava ʻi ha feituʻu naʻe ui ko Pasitou Tūtū, ʻi he kolo ko Pānamilimi ʻi Palāsilá. Ko ʻeku ʻalú ki ha tauʻanga pasi ʻi he tafaʻaki ʻe tahá.
ʻI heʻeku kolosí, ne u fakalaka atu ʻi ha fefine naʻe piki ki ha ʻā maluʻi. Naʻe punou hono ʻulú pea tetetete hono sinó. Naʻe hangē naʻe ilifia ʻa e kakaí ʻiate ia ʻi heʻenau fakalaka hake ʻiate iá. Naʻá ku fakakaukau mahalo ne ʻi ai haʻane ngaahi palopalema fakaeʻatamai.
Hili ʻeku fakalaka aí, naʻá ku ongoʻi ha leʻo naʻe mahino tatau pē mo ha leʻo ʻo ha tangata naʻe pehē, “Foki ki mui!” Naʻe ʻikai ke u sio ki ha taha ne ofi mai kiate au pea ne u fakakaukau ne u fanongo ki ha ngaahi meʻa.
ʻI heʻeku toe lue ʻo kiʻi mamaʻo atú ne u toe ongoʻi ʻa e leʻó: “Foki ki mui!” Naʻá ku fakakaukau ke u foki ka naʻá ku kei lue pē, mo fifili pe ʻe fakalaveaʻi nai au ʻe he fefiné kapau te u toe foki ki ai.
ʻI heʻeku aʻu ki he tafaʻaki ʻe taha ʻo e luelueʻangá, ne u ongoʻi ʻa e leʻó ko hono tuʻo tolú: “Foki ki mui!” Naʻá ku tuʻu, ʻo manatuʻi naʻá ku toki maʻu kimuí ni mai ʻa e meʻa-foaki ʻo e Laumālie Māʻoniʻoní pea mo e tāpuaki ke maʻu e fakahinohino mei he Laumālié. Naʻá ku foki fakavave leva ki he fefiné.
“Kātaki, ka ʻe lava ke u tokoni atu?” Naʻá ku fehuʻi ange.
Naʻá ne tangi mo pehē mai, “ʻIo. “ʻOku ou fie maʻu ke u aʻu ki he tafaʻaki ʻe tahá ke maʻu ʻeku pasí, ka ʻoku ʻikai ke u lava ʻo aʻu ki ai he ʻoku ou manavasiʻi ʻi he māʻolungá. Kuo fuoloa ʻeku tuʻu heni ʻo ʻikai te u ʻiloʻi e meʻa ke faí.”
Naʻá ku talaange, “Te u tokoni atu kiate koe. “Puke hoku nimá, kuikui ho matá, pea te ta aʻu fakataha ki he tafaʻaki ʻe tahá.”
Naʻá ne piki maʻu ki hoku nimá, kuikui hono matá, pea lue māmālie mo au ki he tafaʻaki ʻe tahá. Naʻá ne pehē naʻá ne lotu ʻi ha taimi lōloa ke tokoniʻi ia ʻe he ʻOtuá ke ne kolosi. Naʻá ne fakamālō mai leva mo kole ki he ʻOtuá ke tāpuakiʻi au. Hili ʻene maʻu ʻene pasí, naʻá ku fakakaukau ʻi ha ngaahi miniti siʻi fekauʻaki mo e meʻa ne toki hokó.
Naʻe pehē ʻe he Fakamoʻuí, “ʻOku fanongo ʻeku fanga sipí ki hoku leʻó, ʻo hangē ko ʻeku tala kiate kimoutolú: pea ʻoku ou ʻiloa ʻa kinautolu, pea ʻoku nau muimui ʻiate au” (Sione 10:27). Naʻá ku ako ʻi he ʻaho ko iá ko e taha ʻo e ngaahi founga lelei taha ke muimui ai kiate Iá mo ongoʻi ʻEne ʻofá ko e tokanga ki he leʻo ʻo e Laumālié ʻi he taimi ʻoku ui ai kitautolu ke tau tokoniʻi e niʻihi kehé.