Ինչպե՞ս են անցնում եկեղեցու կիրակնօրյա ժողովները

Նկար

գրկախառնված երկու կին

Հիսուս Քրիստոսի Վերջին Օրերի Սրբերի Եկեղեցու անդամները ամեն կիրակի հավաքվում են՝ Աստծուն երկրպագելու և միմյանց Հիսուս Քրիստոսի ավետարանն ուսուցանելու համար: Բոլորը կարող են գալ, իսկ անդամներն, ըստ ցանկության, հնարավորություն կունենան աղոթելու, ելույթ ունենալու և դասեր վարելու: Այս ժողովներն օգնում են անդամներին զորացնել միմյանց հավատքը և «միավորել իրենց սրտերը միությամբ ու սիրով» (Մոսիա 18.21)։

Նկար

հաշմանդամի սայլակով տղան բաժանում է հաղորդությունը

Հաղորդության ժողով

Ծխի կամ ճյուղի անդամները ամեն կիրակի հավաքվում են հաղորդության ժողովին։ (Նրանք, ովքեր մեր հավատքից չեն, նույնպես կարող են մասնակցել)։ Այս ժողովի ժամանակ անդամներին հաղորդություն է բաժանվում՝ օգնելով նրանց հիշել Հիսուս Քրիստոսին (հաղորդության համար ավելին իմանալու համար տես Ավետարանի հիմունքների հոդված, ապրիլ 2022)։ Ժողովը ներառում է նաև աղոթքներ, հոգևոր երաժշտություն և ելույթներ անդամների կողմից՝ Հիսուս Քրիստոսի ավետարանի մասին:

Նկար

ժպտացող աղջիկները՝ եկեղեցում

Այլ ժողովներ

Հաղորդության ժողովից հետո անդամները բաժանվում են դասարանների և քվորումների: 18 ամսականից մինչև 11 տարեկան երեխաները հաճախում են Երեխաների միություն: Յուրաքանչյուր ամսվա առաջին և երրորդ կիրակի օրերին բոլոր մյուս անդամները հաճախում են Կիրակնօրյա դպրոց: Երկրորդ և չորրորդ կիրակիները նրանք հաճախում են Սփոփող միության, Երիտասարդ կանանց կամ Քահանայության քվորումի ժողովներին:

Աղոթքներ

Եկեղեցու ժողովներում աղոթքներն ասում են անդամները։ Դրանք պարզ աղոթքներ են և ասվում են Սուրբ Հոգու առաջնորդությամբ։ Անդամներն աղոթում են՝ օգտագործելով բառեր, որոնք արտահայտում են սեր և հարգանք Երկնային Հոր հանդեպ: Դա ներառում է այնպիսի դերանուններ, ինչպիսիք են Քեզ, Քո և Դու։

Ելույթներ

Եպիսկոպոսության կամ ճյուղի նախագահության անդամը խնդրում է անդամներին ելույթ ունենալ հաղորդության ժողովի ժամանակ։ Այդ ելույթները կենտրոնանում են Հիսուս Քրիստոսի ավետարանի վրա: Ելույթ ունեցողներն իրենց ելույթները պատրաստում են՝ օգտագործելով սուրբ գրությունները և եկեղեցու ղեկավարների խոսքերը: Նրանք նաև վկայում են ավետարանի սկզբունքներից ստացած օրհնությունների մասին։

Դասեր

Հաղորդության ժողովից հետո անդամներն ուսումնասիրում են ավետարանը փոքր դասարաններում: Դասերը կարող են լինել սուրբ գրությունների, գերագույն համաժողովից ստացած ուսմունքների կամ այլ թեմաների մասին: Թեև ուսուցիչն է վարում դասը, սակայն դա դասախոսություն չէ։ Դասարանի բոլոր անդամները կարող են կիսվել իրենց մտքերով թեմայի վերաբերյալ:

Նկար

եկեղեցում ամբիոնից խոսող տղամարդը

Վկայություն

Ամիսը մեկ անգամ հաղորդության ժողովը ներառում է նաև վկայության ժողով: Սովորաբար, դա ամսվա առաջին կիրակին է։ Այս ժողովի ժամանակ անդամները կարող են բերել իրենց վկայությունները Հիսուս Քրիստոսի և Նրա ավետարանի մասին: Վկայություն տալ նշանակում է խոսել ավետարանի ճշմարտությունների մասին՝ ոգեշնչված Սուրբ Հոգուց։

Նախապատրաստություն

Անդամները պատրաստվում են կիրակնօրյա ժողովներին՝ աղոթելով, ուսումնասիրելով սուրբ գրությունները և պատրաստ լինելով ոգեշնչում ստանալ Սուրբ Հոգուց: Եթե ձեզ խնդրեն ելույթ ունենալ կամ դաս վարել, աղոթքով մտածեք, թե ինչպես կարող եք ուսուցանել ավետարանի սկզբունքները: Օգտագործեք սուրբ գրությունները: Վկայեք ճշմարտության մասին: Անհրաժեշտության դեպքում եկեղեցու ձեր ղեկավարները կօգնեն ձեզ պատրաստվել։

© 2022 by Intellectual Reserve, Inc. All rights reserved. Տպագրված է ԱՄՆ-ում։ Անգլերենի հաստատումը. 6/19։ Թարգմանության հաստատումը. 6/19։ Monthly Liahona Message, June 2022.-ի թարգմանությունը։ Armenian. 18315 201