Savavali ma le Atua i Luga o le Ala o Feagaiga

Saunia e Elder Paul N Lekias

Fitugafulu Eria

I le amataga o le tausaga, sa faagaeetia lava a’u i a tatou suesuega o le Sau, Mulimuli Mai Ia Te A’u lea na taulai atu ai o tatou mafaufau ma loto i le fasifuaitau ‘Savavali ma le Atua’.

I o tatou olaga pisi, atonu tatou te malamalama i lagona o Enoka ina ua valaauina o ia e le Alii e alaga atu le salamo i Lana fanau¹. Sa fai atu Enoka, “Aisea ua amana’ia ai a’u i lau silafaga, ma o a’u ua na’o se tama, ma ua inoino mai tagata uma ia te a’u; ona e āmu la’u tautala; o lea, aisea ua avea ai a’u ma au auauna?”²

Afai sa tatou lagona faapea, e faapena foi le toatele. O le mea e lelei ai, e le tatau ona tatou faanoanoa ai, aua o le tali lenei a le Alii i le fesili a Enoka:

“Alu atu ma fai e pei ona ou poloaiina ai oe, ma e leai se tagata o le a atia oe. Tatala lou gutu, ma o le a faatumuina, ma o le a Ou tuu atu ia te oe upu e te tautala ai, aua ua i o’u lima tagata uma, ma o le a Ou faia e pei ona foliga lelei mai ia te a’u . . .

“ma o le a mau oe ia te a’u, ma a’u ia te oe; o lea, savali faatasi ma a’u.”³

I le Taiala Autu i tusi faavae, tatou te maua ai le sili atu ma le 100 faasinomaga i le fasifuaitau, Savavali ma le Atua. Na savavali Atamu ma le Atua i le faatoaga i Etena⁴; na savavali Enoka ma le Atua⁵; na savavali Noa ma le Atua⁶; na savavali foi Aperaamo ma Isaako ma le Atua⁷.

O le valaaulia e savavali ma le Atua e tumau pea i le asō, o le mea moni, “Ua ia valaauina i latou uma ia o mai ia te ia ma taumamafa i lona agalelei,”⁸ pe i nisi upu, savavali ma Ia.

Ina ia savavali ma lo tatou Tama Faalelagi ma Lona Alo o Iesu Keriso, e tatau muamua ona tatou iloa poo ai i La’ua. Tatou te iloa i La’ua a o tatou auauna atu ia i La’ua⁹ ma tausi a La’ua poloaiga.

Tatou te savavali ma le Atua pe a tatou alolofa i le Atua ma o tatou tuaoi¹⁰ ma auauna atu i ala ‘maualuluga ma paia’ atu. Ua tatou savavali ma le Atua pe a i ai Ona foliga i o tatou mata ma o’o le liuga tele i o tatou loto¹¹. Tatou te savavali ma le Atua pe a tatou tutū o ni molimau ia te Ia, siitia a’e le isi, tausia i latou e lē tagolima ma vaai ia leai se mativa i totonu ia i tatou¹².

I tausaga talu ai nei, sa sili ona faamatalaina e Peresitene Russell M. Nelson le uiga o le ‘Savavali ma le Atua’ ina ua ia saunoa mai:

“O lenei, i tagata taitoatasi o le Ekalesia ou te faapea atu, ia tumau i le ala o feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.

“I le avea ai ma se au peresitene fou, matou te fia amata ma le faatasi ai o le taunuuga i le mafaufau. Mo lenei mafuaaga, ua matou talanoa atu ai ia te outou i le asō mai se malumalu. I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—o le ola e faavavau. O sauniga o le malumalu ma Feagaiga e te osia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga.

“Ia, afai ua e laa ese mai le ala, ou te fia valaaulia oe ma le faamoemoe atoa i lo’u loto ina ia faamolemole toe foi mai. Po o a lava ou atugaluga, po o a lava ou luitau, o loo i ai se faamoemoega mo oe i lenei, le Ekalesia a le Alii. O le a faamanuiaina oe ma augatupulaga e le’i faananau mai e ala ia outou galuega i le taimi nei ina ia toe foi mai i le ala o feagaiga. E pele i lo tatou Tama oi le Lagi Lana fanau ma e finagalo o Ia mo i tatou taitoatasi ina ia toe foi atu ia te Ia i le aiga. E i ai se sini maoa’e a Le Ekalesia a Iesu Keriso o le Au Paia o Aso e Gata Ai—ina ia fesoasoani ia i tatou taitoatasi ia toe foi mai i le aiga.”¹³

I le avea ai ma tagata o Le Ekalesia a Iesu Keriso o le Au Paia o Aso e Gata Ai, ia tatou faia mea uma i lo tatou malosi e mulimuli ai i faataitaiga a ō tatou perofeta lelei, e ala i le savavali ai ma le Atua i luga o le ala o feagaiga, ina ia valaauina i tatou e le Alii o Siona i aso a sau ma talia i tatou o Āna lava¹⁴.