O Loo i ai le Faamoemoe!

Ata

matua o loo talanoa ma le la tama teine

E tusa lava po o a luitau tatou te feagai, o Iesu Keriso o lo tatou faamoemoe. Ua faavaeina e Elder Ronald A. Rasband o le Korama a Aposetolo e Toasefululua le autu o le lomiga o lenei masina faatasi ma lena upumoni matagofie i lana tusiga fou, “Faamoemoe ma le Mafanafanaga ia Keriso” (itulau 4).

Mo le toatele o mātua, o lena sāvali o le faamoemoe e faapitoa lava le manaomia a o latou faia le mea sili latou te mafaia e tausia ai fanau i se lalolagi faigata. Ua aoao mai Peresitene Russell M. Nelson: “Ua faateteleina e le fili ana osofaiga i le faatuatua ma o tatou luga ma o tatou aiga i se saoasaoa matuā uigaese. Ina ia sao mai ai faaleagaga, tatou te manaomiaina ni fuafuaga mamao e faatoilalo ai le fili”(“Malelega Amata,” Liahona, Nov. 2018, 7). Ina ia lagolagoina mātua i lenei galuega paia, e faaauau pea ona saili le Ekalesia e tuuina atu punaoa e talafeagai ma aogā.

I le lomiga o lenei masina, ma te faasoa atu ai ma la‘u soa-tusitala se mamanu mo mātua e aumaia faatasi ai mataupu faavae o le talalelei ma fuafuaga faatino e mafai ona fesoasoani i mātua e fatu ni sootaga malolosi ma a latou fanau, faafailele lo latou faatuatua, ma fausia le lotogatasi (tagai “O Se Mamanu Mamana mo le Tulaga Faamatua” i le itulau 10).

E mafai e le Agaga Paia ona taiala i tatou i le faamoemoe ma le fesoasoani tatou te manaomia. Ua aoao mai e Elder José A. Teixeira o le Fitugafulu le ala e mafai ai ona tatou maua le taitaiga sili atu e ala i le Agaga Paia i le “Filifili ia Loto i La Le Agaga” (itulau 40).

Matou te faamoemoe o lenei lomiga e fesoasoani ia te oe ma lou aiga ia maua le faamoemoe, lagona atili le alofa, ma maua le olioli sili atu.

Ma le faamaoni lava,

Maren Daines, JD

Tagata Tomai Faapitoa i le Global Family Policy and Program Development