“Pe Na o A‘u ea le Talavou Matua o Loo Tauivi e Saili Lo’u Faamoemoega?,” Liahona, Sete. 2022.
Autalavou Matutua
Pe Na o A‘u ea le Talavou Matua o loo Tauivi e Saili Lo’u Faamoemoega?
Sa ou lagona e pei ua ou faaleaogaina le fuafuaga—la‘u fuafuaga mo a’u lava, ma le fuafuaga a le Atua mo a‘u.
I lo‘u aso fanau lona 25, sa ou teuina lo‘u potumoe. Sa le‘i faatulagaina lelei lo’u potu, ma sa ou mafaufau pea i le lē faatulagaina lelei lo‘u olaga . Ou te lē o i ai i le mea sa ou manatu o le a ou i ai i le 25 o ou tausaga. Ou te lei i ai i le mea sa tatau ona ou i ai.
Sa ou mafaufau i o‘u lagona a o ou talavou ina ua maua lo’u faamanuiaga faapeteriaka. Soo se taimi lava ou te faitau ai e uiga i lo‘u lumanai, sa ou vaai faalemafaufau i se tasi sa toetoe lava a atoatoa. Ae sa ou iloaina ou te lei ola ae e avea ma lena tagata sa ou mafaufauina. Ma sa ou tau mafaufau, Afai e mafai ona vaai mai lo‘u tagata laitiiti ia te a’u i le taimi nei, faamata o le a lē fiafia o ia?
Sa faafuasei ona maligi o‘u loimata. Sa ou lagonaina e pei ua ou faaleaogaina la‘u fuafuaga o le olaga. Ou te lei faia ni mea sese matuiā, ae sa ou lagonaina foi e pei e leai se mea e faaalia mo lou olaga. Sa leai so’u faamoemoega. O isi tagata uma ua uma ona faataatia mea uma, ma sa ou i ai iina, tagi i luga o le fola o lo’u potumoe, ma le lagonaina e pei o lo‘u olaga atoa ua ma’umau.
Sa ou lagonaina le tuuatoatasi i lo‘u le mautonu ma le faanoanoa. Ae e oo lava i lena taimi, sa ou iloa e le na o au le talavou matua o loo tauivi e saili lo latou ala. A o ou talanoa atu i isi, ua ou iloa ai e toalaiti lava tagata na iu o latou olaga i le mea tonu lava na latou fuafuaina. Ma ua fesoasoani lena mea ia te au e faaitiitia ai le lagonaina o le tuuatoatasi.
Ua fesoasoani foi e faamanatu ai ia te au e lē finagalo le Tama Faalelagi ia ou lagona le toilalo. E finagalo o Ia ia ou “fetaomi atu i luma ma le tumau ia Keriso, ma se susulu atoatoa o le faamoemoe” (2 Nifae 31:20). E talitonu o Ia i lo’u tomai e suia ma tuputupu ae e ala i le mana o le Togiola a le Faaola. E na o Satani e manao ou te fai ifo ia te au lava ua leai so’u avanoa e avea ai ma tagata ua silafia e le Tama Faalelagi e mafai ona avea ai au.
Malamalama i le Fuafuaga o le Fiafia
O le toatele o i tatou e lagonaina le leai o se faamoemoe e uiga i le lumanai i nisi taimi. Ma atonu ona ua tatou le malamalama i le fuafuaga o le fiafia a le Atua. Atonu tatou te manatu o o tatou olaga ua pei o se taaloga vitiō—o se laina mautu o le tala e tatau ona tatou mulimuli ai ina ia manumalo. Ae e le o le auala lena e fai ai. O aso uma lava tatou te faia ai filifiliga, suia, ma tuputupu ae. E leai se mea e tāmau pe tumau e uiga i ai. O a tatou filifiliga o le a le avea lava ma se mea e faateia ai le Tama Faalelagi, ae e avea pea ma a tatou filifiliga. O loo tatou tusia a tatou lava tala, faatasi ma Ia, a o tatou tuputupu ae.
Ma afai tatou te “avea Keriso ma taitai ma faaatoatoa o [a tatou] tala,”1 e mafai lava ona tatou vaai atu ma le mautinoa i se taunuuga fiafia e faavavau.
O nisi taimi tatou te faia ai ni mea sese pe tatou te le iloa le taitaiga, ma tuua ai i tatou lava e feseseai e faavavau.
Ae o se talalelei lenei o le faamoemoe. O mea leiloloa ua toe mauaina. O se talalelei o le aoaoina. O le faamagalo atu. O le toe taumafai. E pei ona sa aoao mai Elder Neil L. Andersen o le Korama a Aposetolo e Toasefululua, “O le salamo e le o le fuafuaga faaleoleo; o le fuafuaga lea.2
O le alofa o le Tama Faalelagi mo i tatou e atoatoa, ma o Lana fuafuaga mo i tatou e atoatoa foi. O se fuafuaga atoatoa mo tagata e le atoatoa, ua mamanuina ma le faaeteete ma se malamalamaaga i o tatou manaoga ma gafatia. O loo i ai se avanoa i Lana fuafuaga mo o tatou toilalo—o a tatou mea sese faamaoni ma a tatou agasala maaa ma lo tatou fesesetai i le vao. Ma o loo i ai se avanoa i Lana fuafuaga mo lo tatou manumalo, lea tatou te malupuipuia ai i taimi taitasi tatou te vaavaai atu ai ia te Ia ma toe taumafai.
Mauaina o Lou Faamoemoega
Sa ou faaaluina le tele o taimi talu mai lena aso fanau e mafaufau ai e uiga i lo‘u faamoemoega. Ou te le o iloaina lava mea uma. Ae ou te le o toe lagonaina le popole tele. Ou te iloa e silafia au e le Atua ma afai ou te liliu atu ia te Ia, o le a Ia fesoasoani mai ia te au e fatu se uiga anoa i le avanoa ua ou i ai i le taimi nei.
Atonu o le a i ai se aso o le a maua ai e se tasi se fofo o le kanesa po o le faamutaina o le fiaai i le lalolagi atoa pe ausia ai le filemu i le lalolagi. Ae o se tasi i le asō o le a faamafanafanaina se uo faavauvau pe fesoasoani i se tagata ese o loo tauivi pe tatalo mo le taimi muamua i le tele o tausaga. Ma ou te manatu o na mea uma e i ai sona uiga—e oo lava i mea uma.
O le mea moni, o le toatele o i tatou o le a le faia ni mea mamalu, ma faagatete lalolagi i lenei olaga. Ae e le faapea ai la e leai so tatou faamoemoega. O lo tatou faamoemoega tupito o ni fanau a le Atua o le avea lea faapei o Ia. Ma tatou te tuputupu ae i lena faamoemoega a o tatou faia mea iti i aso uma e mulimuli ai ia Iesu Keriso.
Ou te faamemelo i aoaoga a le talalelei lea e faapea: “o mea laiti ma faatauvaa e faataunuu ai mea tetele” (Alema 37:6). Pe a ou toe tepa i tua i lo’u olaga, ou te le vaaia lava se mea maoae. Ae ua ou vaai i le tele o “mea laiti ma faatauvaa” ua faia ai se eseesega tele. Ma ou te iloa e ala i le alofa tunoa o le Faaola, o a‘u taumafaiga laiti, ma le faamaoni o loo mamanuina lo’u ala e avea ai e faapei o Ia.
E leai se ala a se tasi o le a foliga tutusa ma oe. Ae afai o loo e taumafai i le mea sili e fai ni laasaga agai ia Keriso, o lou ala o se auala lelei lea. E talitonu le Foafoa Silisiliese ia te oe, o lea ia tu maualuga ma talitonu ia te oe lava. E i ai i le Atua ni mea ofoofogia o loo faapolopolo mo oe, ma e tusa lava pe e te lagonaina le itiiti ma le faatauvaa, o le a “fesoasoani le Atua ia te oe ia avea o se tagata sili atu i lo le tagata ua e manatu e mafai ona e avea ai.”3