Ua Na’o Tusiga Faaeletonika
Iloaina o Le Tamā o le Tamā o Lo’u Tamāmatua i La’u Misiona
A o auauna atu i se misiona i nofoaga faasolopito, sa fesoasoani se uunaiga ou te lagona ai le latalata atu i lou tuaa.
Ata na pue e Valerie Ann Anderson
I se tasi taeao o le Aso Sa, na taunuu mai ai se imeli mai le FamilySearch i la’u pusameli. Sa talanoa mai e uiga i le tamā o le tamā o lo’u tamāmatua, o Thomas Jefferson Thurston. Sa ou aoaoina sa falelauasi o ia i St. George, Iuta, ISA, lea sa ou auauna atu ai o se faifeautalai i se nofoaga faasolopito. I le toe sailiili atili ai i lo’u gafa o le aiga, sa ou iloa ai na siitia atu Thomas i St. George i le 1880 i le 75 o ona tausaga ina ia latalata i le Malumalu o St. George Iuta. Sa ou aoaoina foi na fausia e Thomas se tasi o fale paina muamua i St. George. Sa ou fiafia ma faagaeetia ona o nei faamatalaga sa fou uma ia te au talu ai sa ou masani ia Thomas i le na o le igoa.
Sa ou manao e sue lona maa faamanatu i le aso na sosoo ai. I le amataga o le aso sa ou fai atu ai, “Sei ta o pe a uma ona ta auauna atu i le Maota o Jacob Hamblin” (o se tasi o nofoaga faasolopito i le mea sa ou auauna atu i ai). I se taimi puupuu mulimuli ane, sa uunaia au e fai atu, “Ta o loa.”
O le vaai atu i se ata o le maa faamanatu o Thomas i le FamilySearch.org, sa faigofie ai ona maua le maa faamanatu. A o ou tu i autafa o le maa faamanatu sa ou matauina se tamaitai o faatopetope mai i le mea sa ou iai. I le maa faamanatu o lo ma’ua tuaa, sa ma iloaina ai e ma te tausoga lona tolu. Sa ma feopoopoa’i, talie, ma pue faatasi ni ata. Sa ou lagonaina sa taialaina au e le Agaga Paia, aemaise lava i le taimi, ina ia taunuu i le fanuatanu a o lei tuua e Susan, lo’u tausoga fou, le fanuatanu.
Sa ou tuua le fanuatanu ma se naunautaiga fiafia e alu sa’o i le tuatusi o loo lisiina i luga o le FamilySearch lea sa nofo ai le tama o le tama o lo’u tamamatua. Sa tu ai iina lona fale. Ua 140 tausaga talu lona amata fausia o le fale. O le vaaia o lona fale, sa ou lagonaina ai ni lagona e lei mafaufauina o le sootaga ma le alofa mo le tama o le tama o lo’u tamamatua.
O se maa i luma o le fanua na faamautu ai o le fale lenei sa ia fauina. A o ou faitauina le maa, sa alu ese atu le e onaina le fale mai le auala taavale. Sa tu o ia ma sa ou fai atu o a’u o se afafine o le atalii o se atalii o le faufale o lenei fale. Sa ofo mai ma le agalelei le tamaloa e faaali mai ia te au le fale. Sa mafai ona ou vaai ma pa’i atu i le fale o le tama o le tama o lo’u tamamatua o le sa fanau i le 1805.
Sa ou savali i luga o le fola paina mao’i i le potu malolo. Sa ou tilotilo i uluai faamalama. Sa ou savali i luga o sitepu faasolopito i le fogafale lona lua. I le filemu, sa ou vaai faalemafaufau ai i o’u tuaa o aai, momoe, ma aoaoina le talalelei i lenei fale. Ana faapea ou te taunuu i ni minute mulimuli ane, semanu e le valaauliaina au i le fale sa nofo ai Thomas. Sa i ai lo’u Tama Faalelagi i auiliiliga a o ou asiasi atu i le fale o le tama o le tama o lo’u tamamatua ma lagonaina se latalata atu ia te ia e sili atu i lo se isi lava mea sa ou mafaufauina.
Sa ou mafaufau i upu a Elder David A. Bednar o le Korama a Aposetolo e Toasefululua: “O o tatou manaoga, faamaoni, ma le usiusitai e valaaulia ai i tatou ma fesoasoani tatou te iloa tino ai Lona alofa mutimutivale i o tatou olaga. … E mafai e i tatou taitoatasi ona i ai mata e vaai manino ai ma taliga e lagona tonu ai le alofa mutimutivale o le Alii, a o faamalolosia ma fesoasoani ia i tatou i nei aso e gata ai.”1
I le na o le 24 itula, sa ma fesootai ai ma le Tama o le tama o lo’u tamamatua o Thurston. Sa ou aoao e uiga i lona usiusitai, ositaulaga, ma ausiaga. O le FamilySearch o la’u punavai lea e aoao ai e uiga ia te ia, ae o musumusuga a le Agaga na fesootai atu ai a’u i lo’u tupuaga. O le alofa na faaali mai e lo’u Tama Faalelagi ia te a’u na faamalosia ai a’u ma o le a tumau ona ou manatua e faavavau. Ou te iloa o le faasologa o mea na tutupu ma auiliiliga o lo’u aso o ni faamanuiaga mai le Alii.