“Taitaiina e Perofeta Soifua,” Liahona, Sete. 2022.
Aoaoga Autu o le Talalelei
Taitaiina e Perofeta Soifua
O perofeta o ni tamalii ua valaauina e le Tama Faalelagi e saunoa mo Ia. Latou te molimau mai ia Iesu Keriso ma aoao atu Lana talalelei. E talitonu tagata o le Ekalesia a Iesu Keriso o le Au Paia o Aso e Gata Ai i perofeta anamua ma aso nei.
E Talanoa Mai le Atua e ala i Perofeta
E maua e perofeta faaaliga mai le Atua. Pe a musuia perofeta e aoao i tatou, e tutusa lava e pei o loo fetalai mai le Atua ia i tatou (tagai i le Mataupu Faavae ma Feagaiga 1:38). E mafai ona tatou faatuatuaina o loo latou ta‘u mai ia i tatou mea e finagalo le Atua ia tatou iloa.
E Aoao Mai Perofeta e uiga ia Iesu Keriso
E molimau perofeta uma ia Iesu Keriso. Latou te aoao mai ia i tatou o Ia o le Alo o le Atua. Latou te aoao i tatou e uiga i Lona soifuaga, faataitaiga, ma le Togiola. Ma latou te faaali mai ia i tatou le ala e mulimuli ai ia te Ia ma usitai i Ana poloaiga.
Tiutetauave o Perofeta
E aoao atu e perofeta le talalelei a Iesu Keriso. Latou te faamalamalama mai faamanuiaga tatou te maua pe a tatou usiusitai i poloaiga ma taunuuga foi tatou te maua pe afai tatou te lē usiusitai. E i ai taimi, e ono musuia ai i latou e ta‘u mai ia i tatou e uiga i mea e tutupu i le lumanai.
Perofeta Anamua
Mose ma Papamaa, saunia e Jerry Harston
Na aoaoina e le Atua tagata e ala mai i perofeta talu mai le amataga. O perofeta na soifua i taimi o le Feagaiga Tuai e aofia ai Atamu, Noa, Aperaamo, Mose, Isaia, ma isi. Sa i ai foi perofeta i tagata o le Tusi a Mamona. O nei perofeta na aofia ai Liae, Mosaea, Alema, ma Moronae. E mafai ona tatou aoaoina mea na latou aoao mai e ala i le faitauina o tusitusiga paia.
Perofeta o Aso Nei
O Iosefa Samita sa avea ma uluai perofeta o aso nei. Na ia toefuataiina mai le Ekalesia a Iesu Keriso i le lalolagi. O Russell M. Nelson o le perofeta ma le Peresitene o le Ekalesia i aso nei. O ona fesoasoani i le Au Peresitene Sili ma Aposetolo e Toasefululua, o ni perofeta foi, tagatavaai, ma talifaaaliga.
Faalogo i Perofeta
E saunoa mai le perofeta ia i tatou i le taimi o le konafesi aoao ma isi taimi. Na te aoaoina i tatou i mea e finagalo le Atua tatou te iloa ma le auala e mulimuli ai ia Iesu Keriso i aso nei. E mafai ona tatou maua ana aoaoga i le Liahona ma i le ChurchofJesusChrist.org.
O Faamanuiaga o le Mulimuli i le Perofeta
O le a faamanuiaina i tatou pe afai tatou te mulimuli i aoaoga a le perofeta. A tatou mulimuli i le perofeta, e mafai ona tatou iloa o loo tatou faia le mea e finagalo le Atua tatou te faia. E mafai ona tatou lagona le filemu i o tatou olaga ma latalata atili atu ai ia Iesu Keriso.