Lokol Pej
Stap Faenem Pis long Ol Taem blong Fraet
Long Eprel 2021, nambatu wev blong aotbrek blong Koronavaeres i kilim Fiji. Famli blong mi, olsem fulap nara famli, i mas rere mo jenis kwik folem ol fiuja plan we oli putum i stap blong stopem vaeres ia blong i no go olbaot. From se ples we aotbrek ia i kamaot long hem, hem i fo aoa draev longwe long ples we mi stap long hem, mi no bin ting se bae hemia i gat tumas paoa long famli blong mi, mo mi stap hop se bae vaeres i no go olbaot mo bae oli holemtaet i stap long eria ia.
Stret bifo nambatu wev blong KOVID i kilim Fiji, mi jes kasem nius blong ded blong bubuman blong mi long saed blong papa blong mi. Papa blong mi we i stap long wes blong Viti Levu, i no save go long funerol blong papa blong hem long Suva from mifala i no save muvmuv olbaot long Fiji taem ol wokman blong helt oli stap traem blong holemtaet mo blokem vaeres blong i no go olbaot. Hemia i mekem mi luksave se vaeres ia i moa kolosap long hom blong mi from i stap blokem famli blong mi blong kam tugeta blong gat kamfot long funerol blong bubuman blong mi.
Vaeres i gohed blong go olbaot long Fiji. Long taem ia, mi stap lukaot wan bisnis mo mi mas mekem sam wok mo dropem sam samting mekem se mi save mekem sam mani blong famli blong mi. Mifala i gohed blong wok mo putum ol rul i stap blong kipim famli blong mifala i sef olsem we i posibol. Hem i wan had taem blong traem blong jenis folem ol niu jenis ia from se mifala i no save kam tugeta wetem ol nara famli blong mifala, we fulap taem, mifala i stap kam tugeta long ol wiken. Hem i kam wan jalenj long saed blong tingting mo filing blong no save kam tugeta blong luk ol famli blong mifala.
Ril laef blong vaeres ia i kam moa tru taem smol famli blong mi i stat blong kasem ol saen blong flu. Mi tingting long miwan se, “Ating hemia nomol flu nomo we i stap goraon oltaem,” be afta mifala i go mekem tes blong stap sef nomo. Ol risal blong mifala i kambak mo i positif: hasban blong mi, gel blong mi blong 18 manis, mo mi, mifala evriwan i kasem KOVID-19.
Nius blong ol risal blong mifala we i positif i mekem mifala i wari long saed blong tingting, speseli long hasban blong mi mo mi. Mi filim se ol saen blong sik blong mifala i kam moa nogud mo taem mifala stap kam oraet, hem i bin sloslo tumas, i mekem mifala i stap wari moa se mifala i no stap kam oraet long Koronavaeres. Taem mifala i stap lukluk nomo long sik blong mifala, fraet blong mifala i kam moa bigwan mo i spolem mifala long saed blong tingting, filing mo Spirit blong mifala i no gat rum blong fet. Afta long tu wik we mifala i lokdaon wetem vaeres, mifala i luksave se mifala i no stap soem fet long Jisas Kraes from se mifala i letem fraet i win taem mifala i stap lukluk nomo long sik blong mifala. Mekem se blong stopem hemia, mifala i stat blong lukluk nomo long Sevya mo paoa we i kam taem yumi mekem samting wetem fet long Hem.
Long taem ia we mifala i jusum blong gat fet long Jisas Kraes mo mekem folem, tingting mo fasin blong mifala i stat blong jenis, mo ol aksen blong mifala i stat blong go wetem fet blong mifala. Mifala i bin prea wetem tru tingting mo gohed blong soem hemia long ol prea blong mifala se mifala i gat fet long Jisas Kraes mo paoa blong Hem blong hilim mifala long saed blong bodi. Mifala i stat blong ridim moa ol skripja mo serem ol skripja long mifala wanwan raon long haos.
Mifala i stat blong gat moa hop mo gohed blong bildimap hop. Mifala i nomo filim fraet o wari. Mifala i kam moa hapi raon long haos mo stat blong gat gudtaem wetem wanwan long mifala. Taem mifala i rili stat blong soem fet blong mifala long Jisas Kraes taem mifala i stap mekem ol samting ia, mifala i luksave se mifala i stat blong kam oraet moa kwik mo mifala i kam oraet fulwan sot taem nomo afta long taem ia.
Mi biliv strong se fet long JIsas Kraes i save karem paoa blong hiling i kam taem yumi yusum fet long Hem. Yumi save winim ol fraet mo wari blong yumi taem yumi putum tras mo lukluk blong yumi long Sevya Jisas Kraes. Mi talem tangkyu tumas we famli blong mi i save winim KOVID tugeta wetem help blong hiling paoa blong Sevya.