Ko e ʻUhinga ʻo ʻEtau Totongi Vahehongofulú

ʻOku foaki ʻe he kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha vahe hongofulu ʻe taha ʻo ʻenau paʻanga hū maí ki he Siasí. ʻOku ui ʻeni ko e vahehongofulu. ʻOku fakaʻaongaʻi e paʻangá ki hono fakahoko e ngāue ʻa e Siasí ʻi he funga ʻo e māmaní.

Ko e Hā ʻa e Vahehongofulu?

Ko e taha ʻo e ngaahi fekau ʻa e ʻOtuá ke totongi vahehongofulu, ʻa ia ko e vahe hongofulu ʻe taha ʻo ʻetau paʻanga hū maí, ki Hono Siasí. ʻI he taimi ʻoku tau totongi vahehongofulu aí, ʻoku tau fakahaaʻi ʻetau houngaʻia ki he ʻOtuá koeʻuhí ko hotau ngaahi tāpuakí. ʻOku tau fakahaaʻi ʻoku tau falala ki he ʻEikí pea ʻoku tau loto-fiemālie ke talangofua kiate Ia ʻi he meʻa kotoa pē.

Melchizedek—Keeper of the Storehouse [Melekisēteki—Tauhi ʻo e Fale Tukuʻanga Koloá], tā fakatātaaʻi ʻe Clark Kelley Price

Ngaahi Akonaki ʻo e Fuakava Motuʻá

Kuo totongi vahehongofulu e kakai ʻa e ʻOtuá talu mei he kuonga ʻo e Fuakava Motuʻá. Hangē ko ʻení, naʻe totongi vahehongofulu ʻa ʻĒpalahame (vakai, Sēnesi 14:18–20). Naʻe akoʻi foki e fono ʻo e vahehongofulú ʻe he kau palōfita ʻo e kuonga muʻá, kau ai ʻa Mōsese mo Malakai (vakai, Levitiko 27:30–34; Nehemaia 10:35–37; Malakai 3:10).

Fakafoki Mai e Fono ʻo e Vahehongofulú

ʻI he 1838, naʻe fehuʻi ʻe he Palōfita ko Siosefa Sāmitá ki he ʻEikí e founga ʻoku totonu ke totongi vahehongofulu ai e kāingalotu ʻo e Siasí. ʻOku lekooti e tali ʻa e ʻEikí ʻi he Tokāteline mo e Ngaahi Fuakava 119, ʻa ia ʻoku pehē ai ʻoku totonu ke foaki ʻe he kāingalotú ha vahe hongofulu ʻe taha ʻo ʻenau tupú ki he Siasí (vakai, veesi 4). Kuo akoʻi ʻe he kau taki ʻo e Siasí ʻoku ʻuhinga ʻa e “tupú“ ki he paʻanga hū maí.

Laʻitā faitaaʻi ʻe Jamie Dale Johnson

Founga ʻo e Totongi Vahehongofulú

Te tau lava ʻo totongi vahehongofulu ʻaki ʻetau fakafonu e foomu foaki ʻi he ʻinitanetí ʻi he donations.ChurchofJesusChrist.org. Pe te tau fakafonu ha foomu pepa pea ʻave ʻa e paʻangá ki ha mēmipa ʻo e kau pīsopelikí pe kau palesitenisī fakakoló. ʻOku ʻave kotoa ʻa e paʻangá ki he ʻuluʻi ʻōfisi ʻo e Siasí, ʻa ia ʻoku fakakaukauʻi ai ʻe he kau taki ʻo e Siasí (kau Palesitenisī ʻUluakí, Kōlomu ʻo e Kau ʻAposetolo ʻe Toko Hongofulu Mā Uá, mo e Kau Pīsopeliki Pulé) ʻi he faʻa lotu ʻa e founga ke fakaʻaongaʻi aí.

Ngaahi tāpuakí

Kuo talaʻofa ʻe he ʻEikí ʻe tāpuekina fakatuʻasino mo fakalaumālie ʻa kinautolu ʻoku totongi vahehongofulú. ʻOku toe tāpuakiʻi foki ʻe he vahehongofulú e fānau kotoa ʻa e ʻOtuá ʻaki ha faingamālie ke ako kiate Ia mo tupulaki ʻi he ongoongoleleí.

Founga Fakaʻaongaʻi ʻo e Paʻanga Vahehongofulú

ʻOku fakaʻaongaʻi e paʻanga vahehongofulú ke langa hake ʻaki e Siasi ʻo e ʻEikí ʻi he funga ʻo e māmaní. ʻOku kau heni hono langa ʻo e ngaahi temipalé mo e ngaahi fale kehe ʻo e Siasí, paaki ʻo e folofolá mo e ngaahi naunau kehé, fakapaʻanga ʻo e ngaahi ʻapiako ʻa e Siasí, pea tokoni ʻi he hisitōlia fakafāmilí mo e ngāue fakafaifekaú.

Tali ki he Vahehongofulú

ʻOku fakataha tuʻo taha he taʻu ʻa e kāingalotu ʻo e Siasí mo ʻenau pīsopé (pe palesiteni fakakoló) ke fakahā kiate ia pe ʻoku nau totongi vahehongofulu kakato.