Naʻe tokoni hono ʻiloʻi ʻoku ʻi ai ha maama ʻiate aú ke u fakatokangaʻi ʻa e maama ʻokú ne ʻākilotoa aú.
ʻĪmisi
ko ha fefine ʻoku hanga ki he huelo ʻo e laʻaá ʻoku ulo mai ʻi he matapā sioʻatá
ʻI he taʻu kuo ʻosí, naʻe fakautuutu ʻeku loto-hohaʻá mo e loto-taʻotaʻomiá. Neongo naʻá ku fefaʻuhi maʻu pē mo e moʻui lelei fakaeʻatamaí, ka naʻe toe kovi ange ʻa e taimi ko ʻení. Naʻe faifai peá u fekumi ki ha tokoni fakafaitoʻo, ka ko ha konga mahuʻinga ʻo hoku fakamoʻuí naʻe fakatefito foki ia ʻi he kumi tokoni ki hoku Fakamoʻuí.
ʻI heʻeku lotu ke maʻu ha fakafiemālié, naʻe ueʻi au ke u fekumi ki he maama ʻokú ne ʻākilotoa au ʻi he māmaní. Ne u feinga hoku lelei tahá. Naʻe ʻi ai ha ngaahi taimi naʻá ku ongoʻi ai ko e maama ne u maʻú naʻe kiʻi ulo hake pē kae mate vave ʻaupito ia. Ne tuʻo lahi ʻeku fakakaukauloto atu ki haʻaku tuʻu ʻi he fakapoʻulí ʻo tatali ki he hopo hake ʻa e laʻaá, he naʻá ku ʻiloʻi ʻe toe mate pē ia ʻi he poʻulí. Naʻe ngali taimi nounou mo fakataimi pē ʻa e māmá.
Hili ha ngaahi māhina ʻo e meʻá ni, ne u maʻu ha fakakaukau mālohi: “ʻOku ʻi ai ha maama ʻiate au.” ʻOku akoʻi ʻe he Tokāteline mo e Ngaahi Fuakava 88:13 ko e maama ʻo Kalaisí ʻoku “ʻi he ngaahi meʻa kotoa pē” (vakai foki, veesi 7). ʻOku ʻikai fiemaʻu ia ke u tuli ha huelo ʻo e māmá he ʻaho takitaha. Te u lava ʻo ʻave ʻa e māmá ʻi he taimi kotoa pē.
Naʻe kamata ke u vakai ʻoku ou maʻu ha konga ʻo e maama fakalangi ʻo ʻeku Tamai Hēvaní mo Sīsū Kalaisí, pea naʻá ku fakatokangaʻi naʻá ku maʻu ha maama naʻe ʻikai teitei mate. ʻI heʻeku tafoki ki hoku Fakamoʻuí, ne u ʻiloʻi ai ʻiate au pē “te tau lava ʻo ako fakalaumālie, fakalakalaka, mo tupulaki koeʻuhí he ʻoku fakafonuʻaki e māmaní e maama ʻo Kalaisí.”1
ʻI heʻeku fakakaukau ki he Maama ʻo Kalaisí, ʻoku ou mahuʻingaʻia he fakakaukau ko ia ʻoku tau lava kotoa ʻo fakatupulaki e maama kuo tau ʻosi maʻú pea tau lava ʻo ueʻi e niʻihi kehé ke nau fakahoko e meʻa tatau.